Ko hono Fakahaofi Hoku ʻAho Sāpaté

Fai ʻe Mackenzie Brown

ʻOku nofo e tokotaha naʻá ne fai e talanoá ʻi ʻIutā, USA.

Naʻá ku tōmui! Naʻá ku tui fakavavevave ha kofu fakaʻofoʻofa, hamusi mai ha līpine, fakaʻuli ki he lotú, tau e meʻalelé pea fakatovave atu ki loto. Hōi! Ne u maʻu ha nofoʻanga ʻi muʻa ʻo feʻunga tonu mo e tuʻu hake e pīsopé ke kamata e houalotu sākalamēnití.

Naʻá ku lea ʻi he Sāpate ko iá, ko ia ne u sio fakavavevave ki heʻeku malangá, ke fakapapauʻi naʻe ʻikai ke ngalo ha meʻa. Naʻe ʻikai hano taimi kuo tuku e houalotu sākalamēnití, pea ne u ʻalu ki he Lautohi Faka-Sāpaté. Ko ha toe houalotu sākalamēniti ola lelei ia!

Ka ko ia koā?

Ne kamata ke u fifili ʻi he uike hono hokó. Ne hoko mai ha toe Sāpate, pea ʻi heʻeku tangutu ʻi he houalotu sākalamēnití ʻo fakakaukau ki he ʻuhinga ʻo e sākalamēnití kiate aú, ne u maʻu ha fakakaukau: ʻoku ou toe fakatukupaaʻi au ʻi he uike kotoa pē ke manatu maʻu ai pē kia Sīsū Kalaisi, ka naʻe fakamātoato fēfē nai ʻeku fakahoko iá?

Naʻá ku fie liliu, ko ia ne u fakakaukau ai ke u faʻu ha palani fakauike.

• ʻI he lolotonga ʻo e uiké, te u tuku ha taimi ke fakakaukau ki heʻeku tōʻongá pea kole ha fakamolemole ki heʻeku ngaahi angahalá. Te u fakapapauʻi foki ke vave ki he lotú ke u fanongo ki he hiva talitalí pea ongoʻi e Laumālié.

• Lolotonga e sākalamēnití, te u fakakaukau kia Sīsū Kalaisi mo ʻEne Fakaleleí. Te u toe vakaiʻi ʻi he faʻa lotu ʻa e meʻa ne u fakahoko totonú mo e meʻa ne u fehalaaki aí. Te u fehuʻi loto pē, “[ʻEiki], ko e hā ʻoku ou kei hala aí?” (vakai, Mātiu 19:20).

• Ne u lotua ʻi he ʻaho kotoa pē hili e sākalamēnití ha tokoni ke u fakalakalaka pea mo manatua ʻa Kalaisi.

ʻI heʻeku muimuiʻi ʻeku palaní, ne fakaʻau ke u ʻofa moʻoni ʻi he sākalamēnití, Ne u saiʻia ke lotu ki he Tamai Hēvaní ʻo fakataufolofola kiate Ia fekauʻaki mo ʻeku moʻuí. Neongo pē ko e hā ʻeku tōʻonga ʻi he uike kimuʻá, naʻá ku houngaʻia maʻu pē ʻi he Fakalelei ʻa Sīsū Kalaisí mo e faingamālie ke liliu pea hoko ʻo toe lelei angé. Kuó u ako he taimí ni ko e sākalamēnití ʻoku ʻikai maʻá e Sāpaté pē; ʻoku maʻá e ʻaho kotoa pē.