Ngaahi Tali mei he Kau Taki ʻo e Siasí
Founga ke Maʻu Ai ʻa e Ngaahi Tāpuaki ʻo e Temipalé
Fai ʻe ʻEletā Ronald A. Rasband
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he fakataha lotu ʻa e ʻUnivēsiti Pilikihami ʻIongí ʻi he ʻaho 10 ʻo Fēpueli 2009. Ke maʻu kakato ʻi he lea Faka-Pilitāniá, ʻalu ki he speeches.byu.edu.
Ko e temipalé ko e fale ia ʻo e ʻEikí, ʻa ia ʻoku toe fakamoʻoniʻi ai e ngaahi akonaki ʻa e Fakamoʻuí ʻo fakafou ʻi he ngaahi ouau toputapu hangē ko e papitaiso maʻá e pekiá mo e malí, ʻa ia ʻokú ne fakatahaʻi e ngaahi fāmilí ki he kotoa ʻo taʻengatá.
ʻOku ou fokotuʻu atu kiate kimoutolu ko e moihū ʻi he temipalé ko ha sīpinga mahuʻinga ia ke mou takitaha fokotuʻu—fakafoʻituitui pea mo fakafāmili—ʻi hoʻomou fakakaukau ki he tafaʻaki ʻoku nofo taha ai hoʻomou tokangá mo tokanga ki aí fokotuʻu ha fakavaʻe mālohi ʻi hoʻomou moʻuí. ʻOku ou ʻilo kuo fakahoko ʻeni ia ʻe hamou tokolahi, pea ʻoku mau fakamālō atu ai.
Kuo fakahoko mai ʻe he Kau Palesitenisī ʻUluakí ha fakaafe ki he kāingalotu kotoa ʻo e Siasí, ʻa ia ʻoku tau kau kotoa ki ai: “ʻOku poupouʻi atu e kāingalotú ʻi he ʻi ai e taimi pea mo e faingamālié ke fetongi ha niʻihi ʻo e ngaahi ʻekitivitī fakafiefiá ʻaki e ngāue fakatemipalé.”
ʻOku ou fakatauange te tau fakakaukau ki he ngaahi tāpuaki kuo talaʻofa mai ʻe he kau palōfitá, kau tangata kikite, mo e kau tangata maʻu fakahā ʻi heʻetau ʻalu faivelenga ki he temipalé. ʻOku ʻomi ʻa e talaʻofa ko ʻení meia Palesiteni Tōmasi S. Monisoni: “Haʻu ki he temipalé pea tuku hoʻomou ngaahi kavengá ʻi he ʻao ʻo e ʻEikí pea ʻe fakafonu ʻaki koe ha laumālie foʻou mo e loto falala ki he kahaʻú. Falala ki he ʻEikí, pea kapau te ke fai ia te Ne tokoniʻi mo fakanonga koe pea tataki hoʻo laka kotoa ʻi he hala ʻoku fakatau ki he nāunau fakasilesitiale ʻo e ʻOtuá.”1
Ko ha tāpuaki fakafiemālie ʻe taha ʻo e lotu ʻi he temipalé ko e fakapapauʻi ʻo e malu mo e nonga mei he ngaahi faingataʻa ʻoku tau fehangahangai mo ia ʻi hotau kuongá. Ko e niʻihi ʻo e ngaahi feituʻu malu taha kuo fokotuʻu ʻe he Tamai Hēvaní ki hono tānaki Hono kakaí ko e ngaahi temipale ʻo e ʻEikí.
ʻOku tau lau e fakamatala ʻi tuʻa he holisi ʻo e temipale kotoa: “Māʻoniʻoni ki he ʻEikí / Ko e Fale ʻo e ʻEikí.” ʻOku ou fakamoʻoni ko e ngaahi temipale kotoa pē ʻo e ʻEikí ko Hono ngaahi hūfangaʻanga ia ʻi he māmaní. ʻOku ou fakaafeʻi ʻa kimoutolu kotoa ʻo fakatatau ki homou tūkungá, ke toe lahi ange hoʻomou hū he temipalé pea maʻu hoʻomou ngaahi tāpuaki mo e maluʻi kuo talaʻofa kiate kimoutolu ʻe he kau palōfita ʻa e ʻOtuá.