Tuʻu Maʻu ʻi Heʻenau Tuí

Ko e talanoa ʻa Palesiteni Monisoni ki ha fāmili paionia peá ne lea ʻaki ha lea ʻa Palesiteni Siaosi ʻAlipate Sāmita: “Te mou tauhi moʻoni nai e tui ʻa hoʻomou ongo kuí? … Feinga ke mou taau mo e ngaahi feilaulau kotoa [kuó na] fai maʻamoutolú.” ʻOku tatau ai pē pe ʻoku ʻi ai haʻo ngaahi kui paionia pe ko e fuofua toʻu tangata koe ʻoku kau ki he Siasí, ʻokú ke fakakaukau nai ki he ngaahi tā sīpinga ʻo e tuí ke maʻu ha tataki mo ha mālohí? Ko ha founga lelei ʻeni ke ke kamata ai:

1. Lisi ʻa e kakai ʻokú ke leleiʻia aí. ʻE lava pē ko ha mēmipa ho fāmilí (kuohili pe lolotonga), kaungāmeʻa, kau taki ʻi he Siasí, pe kakai ʻi he folofolá.

2. Hiki e ngaahi ulungaanga lelei ʻoku nau maʻu ʻokú ke saiʻia aí. ʻOku faʻa kātaki moʻoni nai hoʻo faʻeé? Mahalo pē ʻoku angaʻofa ho kaungāmeʻá ki he niʻihi kehé. Mahalo ʻokú ke saiʻia ʻi he loto-toʻa ʻa e ʻEikitau ko Molonaí.

3. Fili ha ʻulungaanga lelei ʻe taha mei hoʻo lisí pea fehuʻi loto pē kiate koe, “Te u lava fēfē ke maʻu e ʻulungaanga lelei ko ʻení? Ko e hā ʻoku fie maʻu ke u fai ke fakatupulaki ʻeni ʻi heʻeku moʻuí?”

4. Hiki hoʻo palani ki hono fakatupulaki e ʻulungaanga lelei ko ʻení pea tuku ia ʻi ha feituʻu te ke sio maʻu pē ki aí, ke fakamanatu kiate koe hoʻo taumuʻá. Lotua e tokoni ʻa e Tamai Hēvaní pea vakaiʻi maʻu pē hoʻo fakalakalaká. ʻI hoʻo ongoʻi pē kuó ke fakatupulaki feʻunga e ʻulungaanga lelei ko ʻení, te ke lava leva ʻo fili ha ʻulungaanga lelei ʻe taha ke ngāueʻi.

Manatuʻi ʻi heʻetau fakatupulaki ʻa e ngaahi ʻulungaanga leleí ʻiate kitautolú, ʻoku ʻikai ngata pē ʻi heʻetau fakaʻapaʻapaʻi e tui ʻa ʻetau ngaahi kuí mo e ngaahi feilaulau naʻa nau faí, ka ʻe lava foki ke tau hoko ko ha ivi takiekina ki he leleí ki he niʻihi ʻoku tau feohí.