Ko e Fānau Kotoa ʻa e ʻOtuá
ʻOku nofo e tokotaha naʻá ne fai e talanoá ʻi ʻIutā, USA.
“Ko ha temipale Puta,” ko e Fineʻeikí mai ia. “Ko e tui fakalotu ʻeni ʻa Iéié.”
“ʻOku mau ʻekea ʻa e faingamālie ke hū ki he ʻOtua Māfimafí ʻo fakatatau ki he ngaahi tuʻutuʻuni ʻa homau konisēnisi ʻomautolú pē, pea tuku ki he kakai kotoa pē ʻa e faingamālie tatau, ʻo tukuange ke nau lotu, pe ʻe founga fēfē, pe ʻe fai ʻi fē, pe ko e hā te nau lotu ki aí” (Ngaahi Tefito ʻo e Tui 1:11).
Naʻe fiefia ʻa ʻAilani ʻi heʻene ʻaʻahi ki Taiuaní. Ne ʻave ia ʻe heʻene kui tangatá, ʻa ʻene Iéié, mo hono kiʻi tuofefine ko ʻIlá ki he suú (zoo) pea ʻi ha vaka tahi ki ha kiʻi motu. Naʻa nau ō ki ha ngaahi ngoueʻanga fakaʻofoʻofa ne fonu ʻi he ʻulu mangó mo e ʻōketí. Pea naʻa nau ʻaʻahi ki ha moʻunga ʻa ia ne feinga ai e fanga ngelí ke kaihaʻasi ʻenau meʻakaí! Naʻe ilifia ʻa ʻIla ʻi he fanga ngelí, ka naʻe pehē ʻe ʻAilani ne nau fakaʻofoʻofa.
Naʻe fie akoʻi ʻe Iéié kia ʻAilani mo ʻIla ʻa hona tupuʻangá. Naʻá ne ʻave kinaua ke feʻiloaki mo honau kāingá kotoa pea ki ha ngaahi falekai ke na ʻahiʻahiʻi ha ngaahi meʻakai foʻou. Ne akoako ʻe ʻAilani hono fakaʻongaʻi ʻo e fanga kiʻi vaʻakau kaí (chopsticks). Ne fakaʻau ke ne fuʻu sai ʻaupito.
ʻI ha ʻaho ʻe taha ne ʻave ai ʻe Iéié ʻa ʻAilani, ʻIla mo ʻena ongomātuʻá ki ha feituʻu makehe. Ko ha fuʻu fale lahi mo ha matapā lalahi pea mo ha faliki papa ngingila. Kimuʻa pea nau hū ki lotó ne nau toʻo honau suú. Ne pehē ʻe he Fineʻeikí, “Ko ha feituʻu ʻeni ʻoku fie maʻu ai ke ke loto-ʻapasia. ʻO hangē ko ia ʻi he lotú.”
“Ko ha falelotu ʻeni?” Ko e fehuʻi ia ʻa ʻAilaní. Naʻe ʻikai ke tatau ia mo ha falelotu kuó ne sio ai. Ne piko hake e ngaahi tapa ʻo e ʻato lanu kehekehe ʻo e falé. Ne lue fakalongolongo mai ha niʻihi ʻi ha pulupulu lanu pulū fakapōpōʻuli ʻi he matapaá.
Ne pehē ʻe he Fineʻeikí, “Meimei pē. Ko ha temipale Puta. Ka ʻoku ʻikai ke mali pe silaʻi e kakaí ʻi heni ʻo hangē ko ia ʻi hotau ngaahi temipalé. Ko ha fale lotu ki he tui fakalotu ʻa Iéié. ʻOkú ne haʻu ki heni ke ako ʻa e ngaahi akonaki ʻa Putá mo tokoni ki he kakaí.”
Naʻe tānaki atu ʻe he Tangataʻeikí, “ʻOkú ke manatuʻi ʻa e mofuike ʻi Taiuani ne tau sio ai ʻi he ongoongó he māhina ʻe taha kuo hilí? Ne tokoni ʻa Iéié mo e kau ngāue tokoni kehe ʻi he temipalé ni ʻi he hili ko ia ʻa e mofuiké.”
Ne fehuʻi ange ʻe ʻIla, “Ko e hā e meʻa ne nau faí?”
Ne tali ange ʻe he Tangataʻeikí, “ʻOku ou tui naʻa nau ʻomi ha vai ki he kakaí mo fakamaʻa e ngaahi fale ne holó.” “Naʻa nau tokoni foki ki he kakai ne mole honau ngaahi ʻapí ke kumi ha feituʻu ke nau nofo ai.”
“ʻOi,” ko ʻAilani mai ia. Naʻá ne mamali kia Iéié. “Ko ha fuʻu ngāue lahi ia!”
ʻI heʻenau hū ki he temipalé, ne fakatokangaʻi ʻe ʻAilani ʻa ʻene lōngonoá mo ʻene nongá. Naʻá ne sio takai holo peá ne fakatokangaʻi ha ʻīmisi lahi ko ha papa tā tongitongi. Ne tuʻu ʻa ʻIla mo ʻAilani ʻo sio fakamamaʻu.
“Ko Puta ē?” Ko e ʻeke ange ia ʻe ʻIlá.
Naʻe kamokamo ange ʻa e Fineʻeikí.
Naʻe lea ange ʻa Iéié ki he Tangataʻeikí ʻi he lea faka-Siainá peá ne kuku fakataha hono ongo nimá pea punou tuʻo tolu ʻi muʻa ʻi he tā tongitongi ʻo Putá.
Naʻe lea leʻo siʻi ange ʻa e Tangataʻeikí ʻo pehē, “ʻOku akoʻi mai ʻe Iéié ʻa e founga ʻokú ne fakahaaʻi ai ʻene fakaʻapaʻapa kia Putá.”
Ne mahiki e kemo ʻo ʻAilaní. “ʻOku ʻikai nai ko e … ?” Naʻá ne feinga ke manatuʻi ha meʻa kuó ne fanongo ai kimuʻa. “ʻOku ʻikai nai ko e lotu tamapuá ia?”
Ne pehē ange ʻe he Tangataʻeikí, “ʻOku ʻikai ke lotu e kāingalotu Putá ia kia Puta. Naʻe hoko ʻa Puta ko ha faiako māʻongoʻonga, pea ʻoku nau ʻaʻahi ki hono tā tongitongí ke manatuʻi ʻa e meʻa naʻá ne akoʻí.”
Ne fanafana mai ʻa e Fineʻeikí, “ʻI he taimi ʻoku punou ai e kakai ʻi hení, ko ʻenau fakahaaʻi ia ʻenau fakaʻapaʻapá—ʻo hangē ko e lulululú.” “ʻOku punou ʻa Iéié ke fakahaaʻi ʻene fakaʻapaʻapa kia Puta mo e meʻa naʻá ne akoʻí.”
Ne puke mai ʻe he Fineʻeikí e nima ʻa ʻAilani mo ʻIla. “Pea ʻokú mo ʻilo ha meʻa?”
“Ko e hā?” Ko e ʻeke ange ia ʻe ʻIlá.
“Ko e fānau kotoa ʻeni ʻa e ʻOtuá. ʻOkú Ne ʻofa ʻiate kinautolu. ʻOkú Ne ʻofeina ʻenau fetokoniʻakí.”
Ne sio atu ʻa ʻAilani kia Iéié pea mo e kakai kotoa pē ne tangutu fakalongolongó. Naʻá ne ongoʻi māfana mo lelei ʻi hono lotó peá ne ʻiloʻi ko e moʻoni e meʻa ne lea ʻaki ʻe heʻene Fineʻeikí. Naʻe fai ʻe ʻAilani ha kiʻi lotu ki he Tamai Hēvaní: “Fakamālō atu ʻi hono tokoniʻi au ke u feʻiloaki mo ha toe konga lahi ange ʻo Hoʻo fānaú.”