Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Meʻa Naʻá ne Maʻunimā Aú; ko e Tokoni ʻa e Fakamoʻuí
Tā fakatātaaʻi ʻe Joshua Dennis
ʻI he ngaahi taʻu kuo hilí, ne ma mei māvae mo hoku uaifí koeʻuhí ko e palopalema ʻo ʻeku maʻu kava mālohí. Ne ʻikai ke liliu au ʻe ha meʻa ʻo aʻu pē ki he loʻimata ʻo hoku ngaahi ʻofefiné. ʻI he ʻahia ko ia ʻe he ongo faifekaú homau ʻapí, ne ʻikai ke fuoloa pea papitaiso hoku uaifí mo hoku ngaahi ʻofefiné, ka ne ʻikai pē ke u tali e ngaahi meʻa ʻa e ʻOtuá.
Ne puleʻi hono maʻunimā au ʻe he kava mālohí ʻa ʻeku moʻuí. Ne u ʻalu ki he paá ʻi he hili ʻa e ngāué pea faʻa liʻaki ngāue koeʻuhí ne u kei konā. ʻI he taimi ne u inu aí, ne fakaʻau ke u houtamaki. Ne u faʻa kē mo fuhu mo e niʻihi kehé.
ʻI he taimi te u ʻalu ai ki he ngāué, ʻe tangi hoku ngaahi ʻofefiné mo kole ke mau ō fakataha ki he ngāué ke taʻofi au mei heʻeku inú. Ne u palōmesi ange heʻikai ke u inu, ka ne ʻikai pē ke u tauhi ʻeku ngaahi palōmesí. Ne hokohoko atu pē ʻeku fie inú.
Ne faifai peá u fakatokangaʻi naʻá ku fie maʻu ha tokoni. Ne tokonia au ʻe he ongo faifekaú ke u ngāue ke ikunaʻi ʻa e meʻa naʻá ne maʻunimā aú. Ko e taimi lahi ne ʻikai ke u lava ʻo taʻeinu ʻo laka hake ʻi ha uike ʻe taha.
Pea ʻi ha ʻaho ʻe taha ne vahevahe mai ʻe he ongo faifekaú ha potufolofola mei he Tohi ʻa Molomoná ʻa ia naʻá ne liliu ʻeku moʻuí: “Pea kapau ʻe haʻu kiate au ʻa e tangatá te u fakahā kiate kinautolu ʻa honau vaivaí. ʻOku ou foaki ki he tangatá ʻa e vaivaí koeʻuhí ke nau loto fakatōkilalo; pea ʻoku feʻunga ʻa ʻeku ʻofá ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu” (ʻEta 12:27).
Naʻá ku fie maʻu e tokoni ʻa e Fakamoʻuí. Ka ne taʻeʻoua Ia, ʻe teʻeki ai ke u ikunaʻi e meʻa naʻá ne maʻunimā aú. Ne u fakatokangaʻi ko e lahi ange ʻeku fakafalala kiate Iá, ko e lōlōa ange ia ʻa e lava ke u taʻeinu kava mālohí. Hili ha ngaahi ʻaʻahi mo e ongo faifekaú, ne u tali ʻena fakaafe ke u papitaisó.
Talu mei ai mo e liliu ʻeku moʻuí. Kuo ʻosi ʻeni ha taʻu ʻe valu, mo e teʻeki ai pē ke u ʻahiʻahiʻi ha tulutā kava mālohi ʻe taha. ʻI he ʻahó ni ʻoku ou tauʻatāina, peá ne tupunga kotoa ia koeʻuhí ko e ʻEikí.