Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Fakamoʻuí: Ko e Toketā Lelei Tahá
Tā fakatātaaʻi ʻe Joshua Dennis
ʻI heʻeku hoko ko ia ko e toketaá, ne ʻi ai ha tokotaha ne haʻu kiate au hili ha maʻu ha meʻa ne ʻikai angamaheni ki ai ʻi heʻene sivi totó. ʻI he vahaʻa taimi hili ʻo ʻene siví mo ʻema feʻiloakí naʻá ne fekumi ʻi he ʻinitanetí ke ʻilo e ʻuhinga ʻo e ngaahi ola naʻá ne maʻú. Naʻá ne hohaʻa mo lotomamahi ʻi heʻema feʻiloakí. Naʻá ku feinga ke fakamatalaʻi e ngaahi olá, ka naʻá ne kei hohaʻa pē.
Naʻá ku talaange, “ʻOua te ke hohaʻa ki he ngaahi fehalaaki ʻe ala hokó.” Ko e ngāue ia ʻaʻaku! Ko e meʻa ia ʻoku ou ʻi heni aí. Ne u ako mālohi ke u ʻiloʻi e founga ke tokangaʻi ʻaki ʻení. Te ta ngāue fakataha mo au ʻi he meʻá ni, pea kapau te ke muimui ki heʻeku ngaahi fakahinohinó, te ke toe foki pē ʻo moʻui lelei. Falala mai pea tuku kiate au ke u hohaʻa ki he ngaahi meʻa fakafaitoʻó. Peá ke tokanga taha pē koe ke ke fakaakeake.”
Naʻe tokoni ʻeni ke fakanonga ʻene manavasiʻí. Ne ma palani ke fai ha ngaahi sivi lahi ange, pea ne u palōmesi te ma ngāue fakataha ki ha fakalakalaka.
Hili ha ngaahi māhina lahi, ne ʻi ai ha ngaahi faingataʻa ʻi heʻeku moʻuí. Ne hoko e ngaahi palopalema ʻi he ngāué, ʻa e hanganaki atu ki ha pēpē foʻoú, pea mo e teuaki ke ma hikí ko ha meʻa ia ke u ongoʻi lōmekina ai. Naʻe kamata ke u loto-foʻi, loto hohaʻa, mo ilifia.
Naʻá ku lotu fakamātoato koeʻuhí ko ʻeku ngaahi hohaʻá, ngaahi angahalá, mo ʻeku loto-foʻí. ʻI heʻeku lotú, ne fakamoʻoniʻi ai ʻe he Laumālié ʻa e mahuʻinga ʻo e Fakamoʻuí ʻi heʻeku moʻuí. Naʻe hangē naʻá Ne pehē mai:
“ʻOua ʻe hohaʻa ki he ngaahi meʻa kotoa pē ʻe ala hokó. Ko ngāue ia ʻaʻaku! Ko e meʻa ia ʻoku ou ʻi heni aí. Ne u fuesia e ngaahi meʻa kotoa ke u ʻiloʻi ʻa e meʻa ke fai ʻi he taimi pehení. Falala mai kiate au pea te ta ngāue fakataha ʻi he meʻá ni. Kapau te ke muimui ki heʻeku ngaahi fakahinohinó, te ke toe lava ke hoko ʻo maʻa. Falala mai kiate au pea tuku ke u toʻo ʻa e ngaahi kavenga fakalaumālié. Peá ke tuku taha pē hoʻo ngaahi feingá ke ke hoko ki hoʻo lelei tahá.”
ʻI heʻeku ʻilo ʻení, ne matafi atu ʻeku hohaʻá, loto halaiá, mo e loto-foʻí. Ne tafiʻi atu ʻe he Tui kiate Iá ʻa e ngaahi ongo taʻeʻaonga ne nau taʻofi ʻeku fakalakalaká ʻe he Tui kiate Iá. Ne lava ke u tokanga taha pē ki he ngaahi meʻa ne u lava ʻo mapuleʻí. Ne lava ke u moʻui ʻaki e ongoongoleleí pea hanga ki he Fakamoʻuí ʻi heʻeku ngaahi faingataʻaʻiá.
Ko e founga tatau pē ko ia ʻoku lava ai ʻe ha toketā ke tokonia kitautolu ki he moʻui lelei fakatuʻasinó, ʻe lava foki ʻe he Fakamoʻuí, ʻa ia ko e Toketā lelei tahá, ke toʻo atu ʻetau ongoʻi maá, hohaʻá, loto halaiá, ʻo aʻu pē ki heʻetau ngaahi ongoʻi manavasiʻí mo e lotomoʻuá pea tokonia kitautolu ke tau toe moʻui lelei fakalaumālie. Ko ʻEne ngāué ia, pea ʻokú Ne fakahoko lelei ia.