Ko ʻEtau Tafaʻakí

2017

Ko ʻEtau Tafaʻakí

Sepitema 2017

Ko ʻEtau Tafaʻakí

Ko e Ngaahi Tāpuaki ʻo e Seminelí

Lolotonga hoku taʻu hono ua ʻi he seminelí, naʻe toko tolu pē e fānau ako ʻi heʻemau kalasí, ka naʻa mau maʻu ha faiako lelei ʻa ia naʻá ne fiefia ʻi hono vahevahe ʻo e ongoongoleleí mo kimautolú. ʻI he kalasi ʻe taha ne mau ako ai fekauʻaki mo e pehē ʻe ha tokolahi ʻe holofa e Siasí hili ʻa e pekia ʻa Siosefa Sāmita mo hono tokoua ko Hailamé. Ka naʻe manatua ʻe he kau ʻuluaki kāingalotu ʻo e Siasí ko e Siasi ʻeni ʻa e ʻOtuá, ka ʻoku ʻikai ko ha Siasi ʻo ha tangata. Naʻe akoʻi kimautolu ʻe heʻemau faiakó ʻe ʻikai tō noa e Siasí koeʻuhí ko e Siasi ʻeni ʻo Sīsū Kalaisí.

ʻOku ʻikai ha veiveiua naʻe liliu ʻemau moʻuí koeʻuhí ko e lēsoni ko iá. ʻI he hoʻatā ko iá, ne mau fili ai te mau ngāue maʻá e ʻEikí ʻaki e kotoa homau lotó, laumālié, ʻatamaí, pea mo e mālohí. Ne mau teuteu ke ngāue fakafaifekau taimi kakato. Naʻe hokohoko atu ʻeku ʻalu ki he seminelí.

ʻI he taʻu ʻe ua hono hokó, ne u fakatokangaʻi e tāpuekina ʻo ʻeku moʻuí ʻi heʻeku ʻalu ko ia ki he seminelí, pea pehē foki ki hono fakatupulaki ʻo ʻeku fakamoʻoní mo ʻeku holi ko ia ke ngāué ʻi heʻeku teuteu ke ngāue maʻá e ʻEikí.

Ne fakamoʻoniʻi kiate au heʻeku ʻalu ko ia ki he seminelí ʻa ʻeku makehe ki he Tamai Hēvaní. Kuó ne tokoniʻi au ke u moʻuiʻaki ʻa e ongoongoleleí, pea mahulu haké kuó ne tokonia ke mahino kiate au ʻoku ʻikai ke tau moʻui ʻaki pē e ongoongoleleí ʻi he ʻaho Sāpaté. Ne fakapapauʻi mai ʻe he seminelí ʻa ʻeku holi ke ngāue fakafaifekaú. ʻOku ʻikai ha toe veiveiua ʻi hoku ʻatamaí ʻoku kei faitāpuekina pē ʻeku moʻuí ʻe he ngaahi tāpuaki ʻo e seminelí ʻo aʻu mai ki he ʻahó ni. Naʻe ʻikai ha taha te ne talamai ʻoku faingofua, ka ʻo kapau te tau fili ke ʻalu ki he seminelí, ʻe faitāpuekina kitautolu ʻe he ʻEikí ʻaki e mālohi ʻoku fie maʻu ke fakahoko ʻaki e ngaahi holi hotau lotó.

Begona C., Kuaiakuila, ʻEkuatoa