Kuó u fakatomala mei he ngaahi angahala ne toutou hokó ʻi hano tokonia au. Ka ʻoku ou manavasiʻi ʻi haʻaku toe fai ia. Te u lava fēfē ʻo tekeʻi e ʻahiʻahí pea hokohoko atu ʻeku fiefiá?
Fetongi hoʻo ilifiá ʻaki ʻa e tui kia Sīsū Kalaisi mo ʻEne Fakaleleí, ʻi Hono mālohi ke hiki hake mo liliu koé, pea ʻi Heʻene ʻofá mo e ʻaloʻofá. Manatuʻi ʻa e Tamai Hēvaní mo Sīsū Kalaisi mo ʻEna angalelei kiate koé. Loto-fakatōkilalo, lotu, ako e folofolá, pea tui faivelenga. (Vakai, Mōsaia 4:11–12.) Te ke lava leva ke maʻu ʻa e fiefiá, ʻa ia “ko ha meʻafoaki ia ʻoku maʻu mei he feinga moʻoni ke moʻui angatonú, ʻo hangē ko ia ne akoʻi ʻe Sīsū Kalaisí.”1ʻ
Oku malava ke faingataʻa e fakatomala kakató. ʻOku faʻa fie maʻu ki ai ha taimi, tautautefito kapau kuó ke toutou fai angahala. Fakaʻehiʻehi mei he ngaahi meʻa ʻokú ne ʻomi ʻa e ʻahiʻahí. ʻE ala fie maʻu ke ke liliu ʻa e ngaahi meʻa angamaheni fakaʻaho ʻokú ke faí, hoʻo ʻātakaí, mo hoʻo ngaahi kaungāmeʻá. Kapau te ke tō, manatuʻi te ke kei lava pē ke fakatomala pea liliu. Feinga pē. Heʻikai liʻaki koe ʻe hoʻo Tamai Hēvaní pea mo hoʻo Fakamoʻuí. “ʻE lava ʻe he Fakaleleí … ke fufulu ʻo maʻa e ʻuli kotoa pē ʻo tatau ai pē pe ko e hā hono faingataʻá pe lōloá pe tuʻo lahi ʻene toutou hokó.”2