Pōpoaki ʻa e Faiako ʻAʻahí
Fāitahá
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke ke vahevahé. ʻE anga fēfē hano maʻu ʻo ha mahino ki he taumuʻa ʻo e Fineʻofá, ʻo teuteuʻi e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
Koeʻuhi Ke Tau Taha Pē, tā ʻe J. Kirk Richards
“Pea naʻe ui ʻe he ʻEikí ʻa hono kakaí ko SAIONE, koeʻuhí he naʻa nau loto-taha pē mo fakakaukau taha, pea nau nofo ʻi he māʻoniʻoni; pea naʻe ʻikai ha kakai masiva ʻiate kinautolu” (Mōsese 7:18). Te tau lava fēfē ʻo fāitahá?
Naʻe pehe ʻe ʻEletā M. Lāsolo Pālati ʻo e Kōlomu ʻo e Toko Hongofulu Mā Uá: “ʻI he lotomālie ʻo e foʻi lea faka-Pilitānia ko e fakaleleí ʻoku ʻi ai e foʻi lea ko e taha. Kapau ʻe mahino ʻeni ki he faʻahinga ʻo e tangatá, he ʻikai teitei ʻi ai ha taha te tau taʻe tokanga ki ai, ʻo tatau ai pē pe ko e hā e taʻu motuʻá, matakalí, tuʻunga tangata pe fefiné, tui fakalotú, pe tuʻunga fakasōsiale pe fakaʻekonōmiká. Te tau feinga ke muimui ki he Fakamoʻuí pea he ʻikai ke tau angakovi, taʻetokanga, taʻefakaʻapaʻapa, pe taʻetokaʻi e niʻihi kehé.”1
Naʻe akoʻi ʻe Palesiteni Henelī B. ʻAealingi, Tokoni ʻUluaki ʻi he Kau Palesitenisī ʻUluakí: “ʻE lava ke ʻamanaki atu e kakaí ki he fāitahá ʻi he nofoʻia [kinautolu] [ʻe he] Laumālié. … ʻOku ʻikai teitei fakatupu ʻe he Laumālie ʻo e ʻOtuá ʻa e fakakikihí (vakai 3 Nīfai 11:29). …ʻOku fakaiku ia ki he nonga fakafoʻituituí mo e ongoʻi taha mo e niʻihi kehé.”2
Ne pehē ʻe Kalo M. Sitīveni, ne hoko ko e Tokoni ʻUluaki ʻi he Kau Palesitenisī Lahi ʻo e Fineʻofá, kau ki he ngaahi faingataʻa fakafāmilí: “Kuo teʻeki ai ke u foua e vete malí, ʻa e mamahi mo e ongoʻi taʻepauʻia ʻoku hoko mai ʻi hano liʻaki kitá pe aʻusia e fatongia ʻo e hoko ko e faʻē tāutahá. Kuo teʻeki ai ke u aʻusia ha mate haʻaku fānau, manavaʻi paʻá pe manako fefiné. Kuo teʻeki ai ke u kātekina ʻa e ngaohikoviá pe ʻi ai haku mahaki tauhi pe ko e maʻunimaá. Kuo teʻeki ai ke u aʻusia e ngaahi meʻá ni ke ne fakatupulekina au.
“… Ka ʻoku fakafou ʻi hoku ngaahi sivi mo e ʻahiʻahi fakatāutahá … ʻeku maheni lelei ai mo e Tokotaha ʻoku mahino kiate Iá. … Pea ʻikai ngata aí, kuó u aʻusia e ngaahi ʻahiʻahi fakamatelie kotoa pē kuó u lave atu ki aí ʻi he fofonga ʻo ha tama fefine, faʻē, kui fefine, tokoua, mehikitanga mo ha kaungāmeʻa.
“Ko hotau faingamālie ʻi heʻetau hoko ko e ngaahi ʻofefine tauhi fuakava ʻo e ʻOtuá, ʻoku ʻikai ko e ako pē mei hotau ngaahi faingataʻá; ka ke tau kafataha ʻi he angaʻofa mo e manavaʻofa, ʻi heʻetau poupouʻi e kau mēmipa kehe ʻo e fāmili ʻo e ʻOtuá ʻi honau ngaahi faingataʻaʻiá.”3
Ngaahi Potufolofola mo e Fakamatala Makehe
Tuí Fāmilí Fakafiemālié