Ko e Tohi Naʻá ne Fakahaofi ʻEku Moʻuí
Konga mei he Vakai Ki Hoʻomou Fānau Īkí, fai ʻe Robert Barrett
Ne u kau mai mo hoku fāmilí ki he Siasí ʻi hoku taʻu 12. Ne ʻikai mahino kiate au ʻi he taimi ko iá e kāfakafa ʻo e meʻaʻofa ko iá. Naʻe ʻikai ke u ʻilo pe ʻoku moʻoni e Siasí, ka ne fiefia ʻeku tamaí mo ʻeku faʻeé ʻi he pōpoaki ne omi mo e ongo faifekaú. Ne u saiʻia foki ʻi he ongo faifekaú ka naʻe ʻikai ke fuʻu mahino kiate au ʻena fakamatalá. Naʻe faifai pē pea naʻá na fakaafeʻi kimautolu ke mau papitaiso, pea naʻe fili hoku fāmilí ke mau kau kotoa ka ʻikai heʻikai ke mau papitaiso. Ne u loto ki ai pea naʻá ku papitaiso ka naʻe ʻikai ʻaupito ke u ului.
Naʻá ku ʻalu ki he lotú mo e seminelí, ka naʻe kimui ange ʻa e mavahe hoku fāmilí mei he Siasí. Naʻe ʻi ai haʻaku ngaahi kaungāmeʻa ʻi he Siasí pea ne u ʻalu ki he seminelí mo e Mutualé ke fakataha mo kinautolu. Naʻe ʻikai ke u tokanga ki he ongoongoleleí pe ko e ngaahi akonakí peá u fakakaukau ʻoku taʻeoli e konga lahi ʻo e Siasí. Naʻe fakaʻau ke palopalemaʻia ʻeku moʻuí ʻi he kamata ke u kau ʻi he ngaahi ʻekitivitī hangē ko e kaihaʻá mo e maumauʻi koloá. Naʻe ngaohikovia au ʻe heʻeku tamaí, pea naʻá ku fakakaukau ki he taonakitá.
Ka neongo iá, naʻe ʻikai ʻaupito ke hoko e taonakitá ko ha meʻa ia ke u fili mei ai. Naʻe ʻikai ke u lava ʻo fai ia ki heʻeku faʻeé, ʻa ia ne u ʻofa lahi aí. Ko ia ko e meʻa ne toé ke u fekumi ki ha tali. Naʻá ku vakavakai holo ʻo sio ki hoku ngaahi kaungāmeʻa mei he lotú. Ko e meʻa ʻe taha ne nau maʻu ne ʻikai ʻiate aú ko ha fakamoʻoni. Ko ia ʻi hoku taʻu 16, taʻu ʻe fā mei hono papitaiso aú, ne u tangutu hifo ke u toki lau e Tohi ʻa Molomoná.
Naʻe faingataʻa, pea ne mei lava ha taʻu ʻe ua. ʻI heʻeku lau ʻi he 3 Nīfaí kau ki he ʻaʻahi ʻa e Fakamoʻuí ki he kau Nīfaí hili ʻEne Toetuʻú, ʻo Ne tāpuakiʻi ʻenau longaʻi fānaú pea ne ʻalu hifo ha kau ʻāngelo mei langi ʻo takatakaiʻi kinautolú, naʻe hangē naʻá ku tuʻu ʻi he lotolotonga ʻo e kau Nīfaí pea mamata tonu ʻi he meʻa fakaofo ko iá. Naʻe fakamoʻoniʻi ʻe he Laumālie Māʻoniʻoní e momeniti māʻongoʻonga ko iá.
Ne ʻikai ke u toe lava ʻo lau he naʻá ku loʻimataʻia. ʻI heʻeku toe mapuleʻi aú, ne hoko atu ʻeku laú. Ne ʻosi atu mo ha ngaahi uike siʻi, pea ne u ʻosiki e tohí, peá u tūʻulutui ʻo lotu ke ʻilo pe ʻoku moʻoni. Ka naʻe ʻikai ke u maʻu ha tali.
Ne ʻosi ha ngaahi ʻaho lahi ʻeku toutou tūʻulutui mo tautapa ke ʻilo pe ʻoku moʻoni ʻa e tohí, pe ʻoku moʻoni ʻa e Siasí, ka naʻe ʻikai pē ke u maʻu ha tali. Ne ʻikai toe ʻi ai haʻaku tuʻamelie, pea ʻi he hili ha ngaahi uike mei heʻeku ʻosiki ʻo e tohí, ne u toe tūʻulutui fakaʻosi peá u kole, “ʻE Tamai Hēvani, ʻoku moʻoni nai e Tohi ʻa Molomoná?” Ko e tali ne ʻomaí ne kehe ia mei he meʻa ne u ʻamanaki ki aí: “Kuó u ʻosi tala atu. ʻOkú ke ʻilo ʻoku moʻoni ia.”
Ne u maʻu ʻeku fakamoʻoní ʻi he ngaahi uike kimuʻá, ʻi heʻeku lau fekauʻaki mo hono tāpuakiʻi ʻe Kalaisi e longaʻi fānaú. Naʻá ku ʻiloʻi ko e Siasí ni, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e puleʻanga ia ʻo e ʻOtuá ʻi he māmaní, ʻa ia ne toe fakafoki mai ʻi ha palōfita pea ʻoku tataki ʻe ha palōfita, ʻo hangē ko e kuonga muʻá.
ʻOku ʻikai ko ha fakalahi ke pehē ne fakahaofi ʻe he Tohi ʻa Molomoná ʻeku moʻuí, ka ʻe tonu ange ke pehē ne fakahaofi au ʻe he ongoongolelei kuo toe fakafoki maí pea ʻokú ne kei hokohoko atu ke fakafoʻou mo tokonia au ʻi he ʻaho takitaha. Ko ʻeku koloa mahuʻinga tahá ia.