Ang Hingpit nga Kalipay sa mga Santos
Ang hingpit nga kalipay moabut gumikan sa pagtuman sa mga sugo, gumikan sa pagbuntog sa kasubo ug kahuyang pinagi Kaniya, ug sa pagserbisyo sama nga Siya miserbisyo.
Ang propeta sa Basahon ni Mormon nga si Enos, apo ni Lehi, misulat og usa ka mahinungdanon kaayong kasinatian nga nahitabo sa sayong bahin sa iyang kinabuhi. Samtang nangayam nga nag-inusara sa lasang, si Enos nagsugod og pamalandong sa mga panudlo sa iyang amahan, si Jacob. Siya misaysay, “ang mga pulong nga akong madunggan kanunay nga gipamulong sa akong amahan mahitungod sa kinabuhi nga dayon, ug ang hingpit nga kalipay sa mga santos, mituhop gayud pag-ayo sa akong kasingkasing.”1 Sa espiritwal nga kagutom sa iyang kalag, si Enos miluhod sa pag-ampo, usa ka talagsaon nga pag-ampo nga milungtad sa tibuok adlaw ug hangtud sa gabii, usa ka pag-ampo nga nagdala kaniya og mahinungdanong mga pagpadayag, mga kasiguroan, ug mga saad.
Adunay daghang makat-unan gikan sa kasinatian ni Enos, apan karong adlawa ang nagpatigbabaw sa akong hunahuna mao ang panumduman ni Enos sa iyang amahan nga namulong kanunay sa “hingpit nga kalipay sa mga santos.”
Niini nga komperensya tulo ka tuig ang milabay, si Presidente Russell M. Nelson namulong bahin sa hingpit nga kalipay.2 Sa ubang mga butang, siya miingon:
“Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.
“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang hingpit nga kalipay moabut gikan ug tungod Kaniya. … Alang sa mga Santos sa Ulahing mga Adlaw, si Jesukristo mao ang hingpit nga kalipay!”3
Ang mga santos mao kadtong misulod ngadto sa pakigsaad sa ebanghelyo pinaagi sa bunyag ug naningkamot nga mosunod ni Kristo isip Iyang mga disipulo.4 Sa ingon, “ang hingpit nga kalipay sa mga santos” nagpasabut sa kalipay sa pagkahimong Kristohanon.
Buot kong mamulong bahin sa kalipay nga gikan sa pagsunod sa Iyang mga sugo, ang kalipay nga moabut gikan sa pagbuntog sa kasubo ug kahuyang pinaagi Kaniya, ug ang kalipay nga anaa sa pangalagad sama nga Siya mialagad.
Ang Hingpit nga Kalipay sa Pagtuman sa mga Sugo ni Kristo
Kita nagpuyo sa panahon nga lawasnong katagbawan ang gitinguha diin daghan ang mokwestyon sa kaimportante sa mga sugo sa Ginoo o yanong mobaliwala niini. Kasagaran, ang mga tawo kinsa wala magpakabana sa balaan nga mga mando sama sa balaod sa kaputli, sa sumbanan sa pagkamatinuoron, ug sa kabalaan sa Igpapahulay daw molambo na hinoon ug makatagamtam og maayo nga mga butang sa kinabuhi, usahay gani mas labaw pa kaysa niadtong naningkamot nga magmasulundon. Ang uban magsugod sa paghunahuna kon ang paningkamot ug mga sakripisyo may bili pa ba. Ang karaang mga tawo sa Israel kausa mibagulbol:
“Kawang ang pag-alagad sa Dios, ug unsa ang kapuslanan nga kita maghupot sa iyang mga ordinansa, ug kita naglakaw nga masulub-on sa atubangan sa Ginoo sa mga Panon?
“Ug karon kita motawag sa mapagarbuhon nga malipayon; oo, sila nga nagbuhat og pagkadautan gipahimutang; oo, sila nga mitintal sa Dios gani giluwas.”5
Paghulat lang, miingon ang Ginoo, hangtud sa “ adlaw nga buhaton ko kini. … Ug unya kamo makaila … tali sa matarung ug sa dautan, tali kaniya nga nag-alagad sa Dios ug kaniya nga wala mag-alagad kaniya.”6 Ang dautan tingali “makabaton sa kalipay sa ilang mga buhat sa mubo nga higayon,” apan kanunay kini nga temporaryo.7 Ang hingpit nga kalipay sa mga Santos malungtaron.
Ang Dios makakita sa mga butang sa ilang tinuod nga panglantaw, ug Iyang ipakigbahin kana nga panglantaw kanato pinaagi sa Iyang mga Sugo, epektibong mogiya kanato paglikay sa mga lit-ag ug mga libaong sa mortalidad padulong sa mahangturong hingpit nga kalipay. Si Propetang Joseph Smith mipasabut: “ Kon ang Iyang mga sugo motudlo kanato, kini naglantaw sa kahangturan; kay kita gitan-aw sa Dios ingon og kita anaa sa kahangturan; ang Dios nagpuyo sa kahangturan, ug wala maglantaw sa mga butang sama sa atong paglantaw.”8
Wala pa ako makasugat og bisan usa nga nakakaplag sa ebanghelyo sa ulahing bahin sa kinabuhi kinsa wala mangandoy nga na sayo-sayo pa unta. “O, ang mga dili maayong pagpili ug mga sayop ako untang nalikayan,” sila moingon. Ang mga sugo sa Ginoo mao ang atong giya ngadto sa mas maayo nga mga pagpili ug mas malipayon nga mga dangatan. Kinahanglan kitang magmaya ug magpasalamat Kaniya sa pagpakita kanato niining mas maayo nga paagi.
Isip tin-edyer, si Sister Kalombo Rosette Kamwanya nga taga D.R. Congo, karon nagserbisyo sa Côte d’Ivoire Abidjan West Mission, nagpuasa ug nag-ampo og tulo ka adlaw aron sa pagpangita asa ang direksyon nga buot sa Dios alang kaniya. Sa usa ka talagsaon nga panan-awon sa gabii, siya gipakita og duha ka gambalay, usa ka chapel ug sa karon siya nakaamgo nga usa ka templo. Siya nagsugod sa pagpangita ug sa wala madugay nakit-an ang chapel nga iyang nakita sa iyang damgo. Ang timailhan nag-ingon, “Ang Simbahan ni Jesukristo sa mga Santos sa Ulahing mga Adlaw.” Si Sister Kamwanya nabunyagan ug dayon ang iyang inahan ug iyang unom ka mga igsoong lalaki. Si Sister Kamwanya miingon: “Sa dihang akong nadawat ang ebanghelyo, akong gibati nga mura og dinakpan nga langgam nga gibuhian. Ang akong kasingkasing napuno sa hingpit nga kalipay. … Ako adunay kasiguroan nga ang Dios naghigugma kanako.”9
Ang pagsunod sa mga sugo sa Ginoo makapahimo kanato nga mas hingpit ug mas sayon nga mobati sa Iyang gugma. Ang higpit ug pig-ot nga dalan sa mga sugo magdala direkta ngadto sa kahoy sa kinabuhi, ug ang kahoy ug ang bunga niini, ang labing tam-is ug “labing madanihon sa tanan nga mga butang,”10 mga simbolo sa gugma sa Dios ug mopuno sa kalag “sa tuman og hingpit nga kalipay.”11 Miingon ang Manluluwas:
“Kon tumanon ninyo ang akong sugo, magapabilin kamo sa akong gugma; maingon nga gituman ko ang mga sugo sa akong Amahan, ug nagapabilin ako diha sa iyang gugma.
“Kining mga butanga gisulti ko kaninyo, aron ang akong kalipay magapabilin diha kaninyo, ug ang inyong kalipay mamahingpit.”12
Ang Hingpit nga Kalipay sa Pagbuntog pinaagi kang Kristo
Bisan kon kita nagmatinud-anon sa pagtuman sa mga sugo, adunay mga pagsulay ug mga trahedya nga makabalda sa atong kalipay. Apan samtang kita maningkamot sa pagbuntog niining mga hagit uban sa tabang sa Manluluwas, kini magpatunhay sa kalipay nga atong gibati karon ug sa kalipay nga atong gilauman. Si Kristo mipasalig pag-usab sa Iyang mga disipulo, “Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan.”13 Diha sa pagsimba Kaniya, pagtuman Kaniya, pagbugkos sa atong kaugalingon Kaniya nga ang pagsulay ug kagul-anan mahimong kalipay. Mohisgut ko og usa ka ehemplo.
Niadtong 1989, si Jack Rushton nagserbisyo isip presidente sa Irvine California Stake sa Estados Unidos. Atol sa usa ka bakasyon sa pamilya ngadto sa California coast, si Jack nag-bodysurfing sa dihang usa ka balod ang nibanlas niya ngadto sa dili makita nga dakong bato, nga mibali sa iyang liog ug hilabihang pagkadaot sa iyang dugukan. Si Jack sa ulahi miingon, “Sa pagkaparok nako, nahibalo ko nga maparalisar ko.”14 Dili na siya makasulti o bisan makaginhawa sa iyang kaugalingon.15
Pamilya, mga higala, ug mga miyembro sa stake misuporta ni Brother Rushton ug sa iyang asawa, si Jo Anne, ug, sa ubang mga butang, mipausab sa usa ka bahin sa ilang panimalay aron masulod ang iyang wheelchair. Si Jo Anne nahimong nag-unang tig-amuma ni Jack sa mosunod nga 23 ka tuig. Nagpasabut sa mga istorya sa Basahon ni Mormon nga kon sa unsang paagi nga ang Ginoo mibisita sa Iyang katawhan diha sa ilang kasakit ug mipagaan sa ilang mga palas-anon,16 si Jo Anne miingon, “kasagaran matingala ko sa kalipay nga akong gibati sa pag-amuma sa akong bana.”17
Usa ka gamay nga pag-adjust sa iyang respiration system nakapabalik sa pagsulti ni Jack, ug sulod sa maong tuig, si Jack gitawag nga magtutudlo sa Doktrina sa Ebanghelyo ug patriyarka sa stake. Kon siya maghatag og patriyarkal nga panalangin, laing naghupot sa pagkapari ang mobutang sa kamot ni Brother Rushton sa ulohan sa tawo nga modawat sa panalangin ug suportahan ang iyang kamot ug bukton atol sa pagpanalangin. Si Jack mitaliwan sa Adlaw sa Pasko atong 2012, human sa iyang mahalarong 22 ka tuig nga pagserbisyo.
Sa makausa atol sa interbyu, si Jack nakamatikod: “Ang mga problema moabut sa kinabuhi natong tanan; kabahin kini sa pagka-anaa lang dinhi sa kalibutan. Ug ang ubang mga tawo maghunahuna nga ang relihiyon o ang pagkaadunay hugot nga pagtuo sa Dios mopanalipod kanimo gikan sa dautan nga mga butang. Dili siguro gyud na mao ang punto. Tingali ang punto mao nga kon ang atong pagtuo lig-on, sa dihang ang dautang mga butang mahitabo, og kini mahitabo gayud, kita makasagubang kanila. … Ang akong hugot nga pagtuo wala pa gayud magduhaduha, apan wala kana magpasabot nga wala akoy mga depresyon. Tingali sa unang higayon sa akong kinabuhi nga, ako nahagit kutob sa akong limitasyon, ug sa literal wala nay kapaingnan, ug mao nga midangop ako sa Ginoo, ug hangtud karon, ako mibati og kalit nga walay kabutangang kalipay.”18
Karon ang panahon nga usahay walay kalooy ang pagpangataki sa social media ug sa personal batok niadtong nagtinguha sa pagsunod sa sumbanan sa sininaan, kalingawan, ug sekswal nga kaputli. Kasagaran ang mga kabatan-onan ug mga young adult sa mga Santos, ingon man ang kababayen-an ug mga inahan, ang kinsa nag-antos sa pagbiay-biay ug pagpanggukod. Dili sayon ang pagbuntog sa sama nga pang-abuso, apan hinumdomi ang mga pulong ni Pedro: “Kon kamo panamastamasan tungod sa ngalan ni Kristo, bulahan kamo; kay ang espiritu sa himaya ug sa Dios anha man kaninyo.”19
Sa Tanaman sa Eden, si Adan ug Eva anaa “sa kahimtang nga walay sala, walay hingpit nga kalipay, tungod kay wala sila makasinati sa pagkauyamot.”20 Karon, isip may tulubagon nga mga tawo, atong makita ang hingpit nga kalipay sa pagbuntog sa pagkauyamot sa bisan unsang klase, ma sala man kini, pagsulay, kahuyang, o bisan unsang babag sa kalipay. Mao kini kalipay sa pagkamatikod og pag-uswag diha sa dalan sa pagkadisipulo, ang kalipay sa “nakadawat og usa ka kapasayloan sa … mga sala, ug pagbaton og kalinaw sa ilang tanlag”;21 ang kalipay nga mabati sa tawo kansang kalag mitubo ug milambo pinaagi sa grasya ni Kristo.22
Ang Hingpit nga Kalipay sa Pagpangalagad sama sa Pagpangalagad ni Kristo
Ang Manluluwas makakaplag og hingpit nga kalipay sa pagpahinabo sa atong pagka-imortal ug sa kinabuhi nga dayon.23 Sa paghisgut bahin sa Pag-ula sa Manluluwas, si Presidente Russell M. Nelson miingon:
“Sama diha sa tanang butang, si Jesukristo mao ang atong labing halangdong ehemplo, ‘nga tungod sa kalipay nga gibutang sa iyang atubangan miantus sa krus’ [Mga Hebreohanon 12:2]. Hunahunaa kana! Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!
“Ug unsa man ang kalipay nga giandam diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takus—aron nga mopuyo uban sa atong Langitnong mga Ginikanan ug mga pamilya.”24
Sa samang paagi, ang kalipay nga “giandam diha sa atong atubangan” mao ang kalipay sa pagtabang sa Manluluwas diha sa Iyang buhat sa katubsanan. Isip mga binhi ug mga anak ni Abraham,25 kita kabahin sa pagpanalangin sa tanang mga pamilya sa kalibutan “sa panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon.”26
Ang mga pulong ni Alma akong nahinumduman:
“Kini mao ang akong himaya, nga tingali ako mahimo unta nga himan diha sa mga kamot sa Dios aron sa pagdala sa pipila ka mga kalag ngadto sa paghinulsol; ug kini mao ang akong hingpit nga kalipay.
“Ug tan-awa, kon ako makakita og daghan sa akong mga kaigsoonan nga matinud-anon nga naghinulsol, ug moduol sa Ginoo nga ilang Dios, niana ang akong kalag mapuno uban sa hingpit nga kalipay. …
“Apan ako wala malipay sa akong kalampusan lamang, apan ang akong kalipay labaw nga napuno tungod sa kalampusan sa akong mga kaigsoonan, kinsa mitungas ngadto sa yuta sa Nephi. …
“Karon, kon ako maghunahuna sa kalampusan niini nga akong mga kaigsoonan ang akong kalag pagabayawon, gani ngadto sa pagkabulag niini gikan sa lawas, sa ingon niini, hilabihan ka dako sa akong hingpit nga kalipay.”27
Ang mga bunga sa atong pagserbisyo sa usag usa diha sa Simbahan kabahin sa hingpit nga kalipay nga “giandam sa atong atubangan.” Bisan sa panahon sa pagkawalay kadasig ug kaluya, makapangalagad kita nga mapailubon kon nakapunting sa kalipay nga makapahimuot sa Dios ug magdala og kahayag, kahupayan, ug kalipay ngadto sa Iyang mga anak, nga atong mga igsoong lalaki ug mga babaye.
Sa didto ko sa Haiti sa miaging bulan alang sa pagpahinungod sa Port-au-Prince Temple, si Elder David ug Sister Susan Bednar nakahimamat og usa ka sister kansang bana namatay sa usa ka makalilisang nga aksidente pipila ka adlaw ang milabay. Mihilak sila uban kaniya. Apan sa Domingo kining minahal nga babaye anaa sa iyang dapit isip usa ka tigpahiluna sa tulumanon sa pagpahinungod nga adunay malumo, maabiabihon nga pahiyom alang sa tanang misulod sa templo.
Ako nagtuo nga ang labing taas nga “hingpit nga kalipay sa mga santos” moabut sa pagkasayud nga ang Manluluwas nangamuyo alang sa ilang kahimoan,28 “ug walay makasabut sa hingpit nga kalipay nga [mopuno] sa atong mga kalag [samtang] kita [makadungog ni Jesus] nga mag-ampo kanato ngadto sa Amahan.”29 Uban ni Presidente Russell M. Nelson, ako mopamatuod nga ang hingpit nga kalipay usa ka gasa alang sa matinud-anon nga mga Santos “kinsa nakaantus sa mga kasakit sa kalibutan”30 ug kinsa “tinuyo nga naningkamot sa pagpuyo og matarung nga kinabuhi, sama sa gitudlo ni Jesukristo.”31 Unta ang inyong kalipay mahingpit, ako nag-ampo sa ngalan ni Jesukristo, amen.