Ang Mga Lider Mipaila sa Bag-ong Paningkamot alang sa Kabataan ug Kabatan-onan
Ang Kabataan ug Kabatan-onan iimplementar sa Enero 2020 aron sa pagtabang sa kabatan-onan sa pagsunod sa Manluluwas samtang sila molambo sa espiritwal, sosyal, pisikal ug intelektwal nga paagi. Alang sa mga pakigpulong niini nga magasin nga naghisgut sa Kabataan ug Kabatan-onan, tan-awa sa pahina 40 ug 53.
“Miabut na ang panahon sa bag-ong pamaagi, gidesinyong makatabang sa mga bata karon ug sa mga batan-on sa tibuok kalibutan,” miingon si Presidente Russell M. Nelson sa usa ka espesyal nga sibya sa Septyembre 29, 2019.
“Imbis hatagan kamo og daghang mga buluhaton,” miingon siya ngadto sa kabataan ug kabatan-onan, “nagdapit kami nga kamo makigtambag sa Ginoo kon unsaon ninyo pag-uswag sa balansing paagi. Kini magantihon ug makalingaw, apan kini magkinahanglan og paningkamot sa inyong bahin. Kinahanglan nga magtinguha kamo og personal nga pagpadayag. Kinahanglan nga mopili kamo alang sa inyong kaugalingon kon unsaon kini sa pagbuhat. Usahay ang Espiritu modasig ninyo sa paghimo og mga butang nga lisud. Nagtuo ko dawaton ninyo ang hagit. Makahimo kamo sa lisud nga mga butang.”
Si Presidente Nelson miingon usab nga ang mga ginikanan adunay importanting tahas nga buhaton. “““Lig-una palihug ang inyong relasyon sa inyong mga anak ug mga batan-on,” miingon siya. “Ang mga lider sa simbahan makatabang, apan inyo kining mga anak. Walay lain nga adunay mas dakong impluwensya sa ilang kalampusan kay kaninyo. Hatagi sila og gugma, pag-awhag, ug tambag, apan batuki ang tintasyon nga mobuot kanila. Mobuhat sila sa pinakamaayo samtang gamiton nila ang kaugalingon nilang kabubut-on.
“Kini nga tambag magamit usab sa atong talagsaong mga lider ug mga magtutudlo sa kabataan ug kabatan-onan,” mipadayon si Presidente Nelson. “Kinahanglan nga atong tugutan ang atong kabatan-onan nga mangulo, ilabi na niadtong gitawag ug gi-set apart nga moserbisyo sa klase ug sa mga kapangulohan sa korum. Ang katungod sa pagkapari nadelegar na diha nila. Makakat-on sila unsaon sa pagdawat og inspirasyon sa pagpangulo sa ilang klase o korum.”
Sa samang pasundayag, si Presidente M. Russell Ballard, Akting nga Presidente sa Korum sa Napulog Duha ka mga Apostoles, mipaila sa panglantaw sa Kabataan ug Kabatan-onan: nga “lig-unon ang pagtuo sa nagtubo nga henerasyon diha kang Jesukristo, ug tabangan ang kabataan, kabatan-onan, ug ilang mga pamilya nga mouswag subay sa dalan sa pakigsaad samtang mag-atubang sila sa mga hagit sa kinabuhi.”1 Miingon siya nga “ang pagtabang sa kabataan ug kabatan-onan sa pag-angkon og pagpamatuod kang Jesukristo mopanalangin kanila ug kanatong tanan sa tanan natong kinabuhi.”
Human ang kabatan-onan nga anaa sa pagsibya miapil sa usa ka kalihokan sa pagpakita sa paggamit sa Pasiuna nga Giya alang sa Kabataan ug Kabatan-onan, si Presidente Ballard miingon: “Kini mao ang sinugdanan lamang. Karon, mao pa lamang ang pagsugod nato niini nga kalihokan. Kini mao ang butang nga magpadayon sa inyong mga pamilya ug samtang magtinabangay kamo. Kami nagdapit kaninyo nga ipadayon ang kalihokan. … Mga ginikanan, palihug ipadayon kini sa panimalay.” Iyang gihatagan og gibug-aton nga “kini mao ang usa ka nakasentro sa panimalay, gisuportahan sa Simbahan nga programa” ug nga “ang mga pamilya nahilakip niini nga programa. Mao kini ang makahimo niini nga talagsaon kaayo.”
Sa daghang mga dapit sa kalibutan, ang mga ginikanan ug mga lider nakadawat usab og kaugalingon nilang giya sa pasiuna. Ang ubang mga dapit hubaron ang Kabataan ug Kabatan-onan sa ilang mga pinulongan sa ulahing bahin sa 2020.
Ang pagkat-on sa ebanghelyo, pagserbisyo ug mga kalihokan, ug personal nga kalamboan (lakip ang paghimo ug pagtuman og mga tumong) mao ang labing importanteng mga bahin sa Kabataan ug Kabatan-onan, ug ang kabatan-onan kinahanglan mangulo sa pagplano. Ang kabataan ug kabatan-onan magtinguha og personal nga pagpadayag samtang sila molambo diha sa dalan sa pakigsaad, uban sa suporta gikan sa pamilya, mga lider, ug sa uban. Si Presidente Ballard mitimaan nga ang Kabataan ug Kabatan-onan usa ka tibuok kalibutan nga paningkamot ug busa mouyon-uyon ra kon “asa ka nagpuyo ug sa kahimtang sa inyong pamilya.”
Dugang nga mga detalye ug mga kapanguhaan ihatag diha sa usa ka Face to Face nga sibya alang sa kabataan ug kabatan-onan sa Nobyembre 17, 2019, nga inubanan ni Elder Gerrit W. Gong sa Korum sa Napulog Duha ka mga Apostoles. Ang kabataan ug kabatan-onan nga mag-edad og 8 hangtud 18 sa 2020, ang ilang mga ginikanan, ug mga lider sa Young Women, mga tigtambag sa Aaronic nga Pagkapari, ug mga lider sa Primary gidapit sa pagtambong. Isumiter ang inyong mga pangutana mahitungod sa programa sa Kabataan ug Kabatan-onan ngadto kang Elder Gong sa facetoface.ChurchofJesusChrist.org. Human sa live nga kalihokan, nga isibya sa 18 ka mga pinulongan, ang video tipigan aron nga kini ma-stream o ma-download sa bisan unsang panahon.