Iloaina, Alofaina, ma le Tuputupu A’e
Tau ina ia tatou malamalama uma i la tatou vaega i lenei galuega sili o le auaunaga ina ia mafai ona tatou avea atili e pei o Ia.
I le 2016 na o mai ai le Aufaipese a le Tapeneko i le Lotoa o le Malumalu e asiasi mai i Netalani ma Peleseuma. Talu ai sa ou aafia i lena faafiafiaga mata’ina, sa ou maua ai le avanoa e olioli faalua ai ia latou faafiafiaga.
I le taimi o a latou faafiafiaga sa ou mafaufau ai e uiga i le maeu o se taumafaiga ofoofogia o le feaveai solo o se aufaipese toatele faapena. Na taulai atu lo’u mafaufau i le gong lapoa, lea sa faigata ma e masalo e taugata tele le lafoina pe a faatusatusa i le vaiolini, pu, po o isi meafaili ia e faigofie ona afisi i lalo o lou lima. Ae o le tilotilo atu i le aafiaga moni o lenei gong, sa na o ni nai taimi e ta ai, a o isi meafaili laiti atu sa tele atu le faaaogaina i le konaseti. Na ou tomanatu faapea a aunoa ma le leo o le gong o le a le tutusa le faafiafiaga ma o lea e tatau ai ona faia le taumafaiga e fesiitai lenei gong lapoa i le salafa o le vasa loaloa.
O nisi taimi atonu tatou te lagona ai le faapei o lena gong, e nao sina vaega itiiti e lelei ai i le faafiafiaga. Ae ou te fia tau atu ia te oe o lou leo o loo faia se eseesega tele.
Tatou te manaomia uma mea faifaaili O nisi o i tatou e faigofie ona aoao ma lelei tele i le a’oga, a o isi e i ai ni taleni faatufugaga. O nisi e mamanu ma fausia ni mea po o le tausia, puipuia, po o le aoao atu o isi. O loo manaomia i tatou uma e aumaia ai le eseesega ma le uiga i lenei lalolagi.
Ia i latou o lagona e le’o ia i latou se mea e saofagā ai pe talitonu e leai so latou taua po o se taunuuga i soo se tagata, i isi atonu o loo latou lagonaina ua latou i ai i le tumutumu o le lalolagi, ma soo se tagata o i le ogatotonu, ou te fia tuuina atu lenei savali.
Po o fea lava o e i ai i le ala o le olaga, o nisi o outou ua lagona le matua mamafatu i avega ua e le mafaufau ai ia te oe lava ia i luga o lena ala. Ou te fia valaaulia oe ia laa ese i fafo mai le pouliuli ma alu atu i le malamalama. O le malamalama o le talalelei o le a maua ai le mafanafana ma le faamalologa ma o le a fesoasoani ia te oe ia malamalama po o ai moni lava oe ma po o le a lou faamoemoega i le olaga.
O nisi o i tatou na fesesetai solo i ala faasaina, e taumafai e saili le fiafia iina.
Ua valaaulia i tatou e se Tama Faalelagi alofa e savalia le ala o le avea ma soo ma toe foi atu ia te Ia. E alofa o Ia ia i tatou i se alofa atoatoa.1
O le a le ala? O le ala ia fesoasoani ia i tatou ia malamalama po o ai i tatou e ala i le auauna atu i le tasi ma le isi.
Ia te a’u, o le auauna atu o le faatinoina lea o le alofa faalelagi.2 I lena ala, tatou te fatuina ai se siosiomaga lea e maua uma ai e le tagata foai ma le tagata e taliaina se manao ia salamo. I nisi upu, tatou te suia le itu e agai i ai ma o mai ia latalata atili i lo tatou Faaola, o Iesu Keriso, ma avea atili e faapei o Ia.
Mo se faataitaiga, e le manaomia le ta’u soo atu i o tatou taitoalua po o fanau le auala e mafai ona faaleleia ai i latou; ua uma ona latou iloaina na mea. O le fatuina o lenei siosiomaga o le alofa o le a faamalosia ai i latou e fai ni suiga manaomia i o latou olaga ma avea ma tagata sili ona lelei.
I lenei auala, e avea ai le salamo ma se faagasologa i aso taitasi o le toe faaleleia, lea e ono aofia ai le faatoese atu mo se amioga le lelei. Ou te manatua ma o loo aafia pea i tulaga ia e vave ona ou faamasino atu ai pe tuai foi ona ou faalogo. Ma i le faaiuga o le aso i le taimi o la’u tatalo patino, ou te lagona ai le fautuaga alofa mai le lagi ia salamo ma ia lelei atili. O le siosiomaga alofa na muamua fatuina e o’u matua, le uso, ma tuafafine ma mulimuli ane e lo’u toalua, fanau, faapea ma uo na fesoasoani ia te a’u ia avea ma se tagata lelei atili.
Ua tatou iloa uma le mea e mafai ona tatou lelei atili ai. E le manaomia le faamanatu atu pea i isi, ae o loo i ai se manaoga ia alofa ma auauna atu i le tasi ma le isi ma o le faia o lena mea, e maua ai se siosiomaga o le naunautaiga ia suia.
I lenei lava siosiomaga e tasi o loo tatou aoao ai po o ai moni lava i tatou ma po o le a la tatou matafaioi o le a i ai i nei aso mulimuli o le talafaasolopito o le lalolagi a o lumanai ai le Afio Mai Faalua o le Faaola.
Afai o e tuufesili e uiga i lau vaega, ou te valaaulia oe e saili se nofoaga e mafai ona e i ai na o oe ma ōle atu i le Tama Faalelagi ia faailoa atu ia te oe po o le a le vaega e te faia. Atonu o le a faasolosolo malie mai lava le tali ma o le a manino atu pe a faamausali atili o tatou vae i luga o le ala o feagaiga ma le auaunaga.
O loo tatou aafia i nisi o faigata na fetaiai foi ma Iosefa Samita a o i ai o ia “i le lotolotoi o se taua o upu ma le vāvāō o manatu.” E pei ona tatou faitau i lana lava tala, sa masani ona ia fai ifo ia te ia lava: “O le a le mea e ao ina faia? O ai o nei vaega uma ua sa’o; pe, ua sese faatasi ea i latou uma? Afai e i ai se tasi o i latou ua saʼo, o ai lea, ma e faapefea ona ou iloaina?”3
Faatasi ai ma le malamalama na ia maua i le Tusi a Iakopo, lea na fai mai “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia,”4 na iu lava ina “i ai le naunautaiga ia Iosefa e ‘ole atu i le Atua.’”5
Na tatou faitau atili faapea o le taimi muamua lava lea i lona olaga na ia faia ai se taumafaiga faapea, ona i le lotolotoi o ona atuatuvalega uma, sa ia lei faia lava se taumafaiga e tatalo atu ma le leo.”6
Ma e mafai foi mo i tatou i le uluai taimi tatou te talanoa atu ai i lo tatou Foafoa i se ala tatou te lei faia muamua.
Ona o le taumafaiga a Iosefa, na faaali mai ai le Tama Faalelagi ma Lona Alo, o Iesu Keriso ia te ia, ta’u mai lona igoa, ma o se taunuuga ua tatou maua ai se malamalamaaga manino tele atu po o ai i tatou ma e taua moni lava i tatou.
Ua tatou faitau atili faapea i ona tausaga talavou maaleale “na sauaina ai [Iosefa] e i latou na tatau ona avea ma [ana] uo ma e na tatau ona taulimaina ma le agalelei o [ia].”7 Ma e tatou te ono faamoemoe foi i ni mea faafeagai a o tatou ola ai i se olaga o le avea ma soo.
Afai o e lagona i le taimi nei lou le mafai ona avea ma se vaega o le faili ma ua foliga faigata le ala o le salamo ia te oe, faamolemole ia silafia afai tatou te taumafai pea o le a aveesea le avega mai o tatou tauau ma o le a toe i ai le malamalama. O le a le tuua lava i tatou e le Tama Faalelagi pe a tatou aapa atu ia te Ia. E mafai ona tatou pa’u’u ma toe tutu i luga ma o le a Ia fesoasoani ia i tatou e tafiese le palapala mai o tatou tulivae.
O nisi o i tatou ua manunua, ae o loo i ai i le ato fesoasoani muamua a le Alii ni fusi manu’a ua lava le tetelē e fusi ai o tatou manuaga uma.
O lena la alofa, lena alofa lē faatuaoia lea tatou te ta’ua foi o le alofa mama po o le “alofa lē pona o Keriso,”8 lea e manaomia i o tatou aiga e auauna atu ai matua ia latou fanau ma fanau i o latou matua. E ala i lena alofa, o le a suia ai loto ma fanau mai ai le manao ia faia Lona finagalo.
O lena alofa o loo manaomia i a tatou fegalegaleaiga ma le tasi ma le isi o ni fanau a lo tatou Tama Faalelagi ma tagata o Lana Ekalesia lea o le a mafai ai e i tatou uma ona faaaofia meafaili faamusika uma i a tatou aufaili ina ia mafai ai ona tatou faatino ma le mamalu faatasi ai ma aufaipese a agelu o le lagi pe a toe afio mai le Faaola.
O lena alofa, lena malamalama lea e manaomia ona susulu ma faamalamalamaina ai o tatou siosiomaga a o tatou fegasoloai i o tatou olaga i aso taitasi. O le a maitau e tagata le malamalama ma o le a tosina atu i ai. O le ituaiga lenei o galuega faafaifeautalai o le a aumaia isi ia “o mai ma vaai, o mai ma fesoasoani, ma o mai ma nofomau.”9 Faamolemole, a e mauaina lau molimau e uiga i lenei galuega maoae ma la tatou vaega, tau ina ia tatou olioli faatasi ma lo tatou perofeta pele o Iosefa Samita, o le na tautino mai, “Aua sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e le mafai ona ou faafitia lena mea.”10
Ou te molimau atu ia te outou ou te iloa po o ai a’u, ma ou te iloa po o ai outou. O i tatou o fanau uma a se Tama Faalelagi, o le e alofa ia i tatou. Na te lei auina maia i tatou iinei ia toilalo ae ia toe foi atu ma le mamalu ia te Ia. Ina ia tatou malamalama uma i la tatou vaega i lenei galuega maoae faaleauaunaga ina ia tatou avea atili faapei o Ia pe a Ia toe afio mai o la’u tatalo lea i le suafa o Iesu Keriso, amene.