Malelega Faaiu

Saunia e Peresitene Russell M. Nelson

O le agavaa faaletagata lava ia e manaomia ai se liua atoa o le mafaufau ma le loto ina ia avea atili e faapei o le Alii.

Ou uso e ma tuafafine pele, a o tatou oo mai ai i le faaiuga o lenei konafesi faasolopito, tatou te faafetai i le Alii mo le musuiaina o savali ma musika ua faagaeetiaina ai i tatou. Ua tatou olioli moni lava i se tausamaaga faaleagaga.

Ua tatou iloa o le talalelei toefuataiina a Iesu Keriso o le a aumaia le faamoemoe ma le olioli i tagata o le a faalogo ma usitai i Lana aoaoga faavae. Ua tatou iloa foi e mafai ona avea aiga taitasi ma se malutaga moni o le faatuatua, lea e mafai ona i ai le filemu, alofa, ma afio ai le Agaga o le Alii.

O le mea moni, o le maataua silisili o le Toefuataiga o le malumalu paia. O ona sauniga ma feagaiga paia ua matua taua i le tapenaina o se nuu o ē ua saunia e faafeiloai le Faaola i Lona Afio Mai Faalua. O le taimi nei e 166 a tatou malumalu ua faapaiaina, ma isi o le a oo mai.

O le a faia se fale tatala a o lumanai ai le faapaiaga o malumalu fou ma toefaafouina taitasi. E toatele uo e le o nisi o lo tatou faatuatuaga o le a auai i maimoaga o na malumalu ma o le a aoaoina se mea e uiga i faamanuiaga o malumalu. Ma o nisi o na tagata asiasi o le a uunaia ia iloa atili. O nisi o le a faia ni fesili faamaoni pe faapefea ona latou agavaa mo faamanuiaga o le malumalu.

I le avea ai ma tagata o le Ekalesia, e manaomia ona tatou saunia e tali atu i a latou fesili. E mafai ona tatou faamalamalama atu o faamanuiaga o le malumalu e avanoa i soo se tasi ma i tagata uma o ē o le a sauniaina i latou lava. Ae a o lei mafai ona latou ulufale atu i se malumalu ua faapaiaina, e manaomia ona latou agavaa. E finagalo le Alii i Ana fanau uma ia tofo i faamanuiaga e faavavau o loo maua i totonu o Lona malumalu. Ua Ia faatonuina mea e tatau ona faia e tagata taitoatasi e agavaa ai e ulufale atu i Lona maota paia.

O se nofoaga lelei mo i tatou e amata ai se avanoa faaleaoaoga faapena o le valaau ia gauai atu i upu ua vaneina i fafo o le malumalu: “E Paia i le Alii: O Le Maota o le Alii.” O le savali a Peresitene Henry B. Eyring i le asō ma le toatele o isi ua musuia i tatou ia paia atili. O malumalu taitasi o se nofoaga paia; o tagata taitoatasi e ulu atu i le malumalu e tauivi ia paia atili.

O tulaga manaomia uma e ulufale ai i le malumalu e fesootai i le paia o le tagata lava ia. Ina ia iloilo lena saunia, o tagata taitasi e manao e olioli i faamanuiaga o le malumalu o le a faia ni faatalanoaga se lua: muamua ma se epikopo, se fesoasoani o se epikopo, po o le peresitene o le paranesi; o le lona lua ma se peresitene o se siteki po o se misiona po o se tasi o ona fesoasoani. I na faatalanoaga, o le a fesiligia ai ni fesili.

O nisi o na fesili ua toefaafouina talu ai nei mo le manino atili. Ou te fia iloiloina na fesili ma outou i le taimi nei:

E i ai sou faatuatua ma sau molimau i le Atua, le Tama Faavavau; o Lona Alo, o Iesu Keriso; ma le Agaga Paia?
E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola?
E i ai sau molimau i le Toefuataiga o le talalelei a Iesu Keriso?
E te lagolagoina le Peresitene o Le Ekalesia a Iesu Keriso o le Au Paia o Aso e Gata Ai o le perofeta, tagatavaai, ma tali faaaliga ma ua na o ia lava le tagata i le lalolagi ua faatagaina e faaaogaina ki uma o le perisitua?

E te lagolagoina ia sui o le Au Peresitene Sili ma le Korama a Aposetolo e Toasefululua o ni perofeta, tagatavaai, ma tali faaaliga?

E te lagolagoina isi Au Pulega Aoao ma taitai o le Ekalesia i le lotoifale?
Ua fetalai mai le Alii o mea uma e ao ona “faia i le mamā” i Ona luma (Mataupu Faavae ma Feagaiga 42:41).

O e tauivi mo le mamā atoa i ou mafaufauga ma amioga?

O e usiusitai i le tulafono o le ola mamā?
O e mulimuli i aoaoga a le Ekalesia a Iesu Keriso i au amioga faalilolilo ma amioga i nofoaga faitele i tagata o lou aiga ma isi?
O e lagolagoina pe faalauiloa atu soo se aoaoga, o faiga masani, po o aoaoga faavae e feteenai ma aoaoga a Le Ekalesia a Iesu Keriso o le Au Paia o Aso e Gata Ai?
O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma agavaa e taumafa i le faamanatuga; ma soifua i lou olaga ia ogatusa ma tulafono ma poloaiga o le talalelei?
O e tauivi ina ia faamaoni i mea uma e te faia?
Pe o oe o se tagata e totogi atoa le sefuluai?
O e malamalama ma usiusitai i le Upu o le Poto?
O i ai ni au matafaioi tautupe po o nisi matafaioi i se toalua muamua po o le fanau?

Afai o le ioe, o e tausia i le taimi nei na matafaioi?
O e tausia feagaiga sa e osia i totonu o le malumalu, e aofia ai le laeiina o ofusa o le malumalu, e pei ona faatonuina ai i le faaeega paia?
O i ai ni agasala ogaoga i lou olaga o manaomia ona foiaina ma taitai perisitua o se vaega o lou salamo?
Pe e te manatu ua e agavaa e te ulu atu i le maota o le Alii ma auai i sauniga o le malumalu?

O taeao, o le a tufatufa atu ai nei fesili ua toefaafouina o pepa faataga o le malumalu i taitai o le Ekalesia i le lalolagi atoa.

E faaopoopo atu i lo latou taliina o na fesili ma le faamaoni, ua malamalama lelei e laeiina e tagata matutua taitoatasi ua ulu atu i le malumalu le ofusa paia o le perisitua i lalo ifo o lavalava masani. O le faatusa lenei o se tautinoga i le loto e tauivi i aso taitasi ia avea atili e faapei o le Alii. Ua faamanatu mai ai foi ia i tatou ia tumau faamaoni i aso taitasi i feagaiga e osia ma ia savavali i luga o le ala o feagaiga i aso taitasi i se ala maualuga atu ma paia atu.

Ia, mo sina taimi lava, ou te fia talanoa atu ai i le tatou autalavou. Matou te uunaia outou ia agavaa mo pepa faataga o le malumalu e tapulaa le faaaogaina. O le a fesiligia oe mo na o fesili na e faatatau ia te outou i au sauniuniga mo sauniga o sui papatisoga ma faamauga. Matou te faafetai tele mo lo outou agavaa ma le naunautaiga e auai i lena galuega paia o le malumalu. Matou te faafetai atu!

O le agavaa faaletagata lava ia e ulufale atu ai i le maota o le Alii e manaomia ai le tele o sauniuniga faaleagaga a le tagata lava ia. Ae faatasi ai ma le fesoasoaniga a le Alii, e leai se mea e faigata. I nisi tulaga, e faigofie atu le fausiaina o se malumalu nai lo le fausiaina o se nuu ia saunia mo se malumalu. O le agavaa faaletagata lava ia e manaomia ai se liua atoa o le mafaufau ma le loto ina ia avea atili e faapei o le Alii, ia avea ma se tagatanuu faamaoni, ia avea ma se faataitaiga sili atu, ma ia avea ma se tagata paia atu.

Ou te molimau atu o se galuega sauniuni faapena e aumaia ni faamanuiaga lē mafaitaulia i lenei olaga ma faamanuiaga e le o mafaufauina mo le olaga a sau, e aofia ai le faaauau pea o le iunite o lou aiga i le faavavau atoa “i se setete o le fiafia e le gata.”¹

Ia ou te fia liliu atu nei i se isi autu: fuafuaga mo le tausaga a sau. I le taimi o le tautotogo o le tausaga 2020, o le a atoa tonu i ai le 200 tausaga talu ona maua e Iosefa Samita le faaaliga ua tatou iloaina o le Uluai Faaaliga. Na faaali mai ai le Atua le Tamā ma Lona Alo Pele, o Iesu Keriso, ia Iosefa, o se talavou e 14 tausaga le matua. O lena mea na tupu na faailogaina ai le amataga o le Toefuataiga o le talalelei a Iesu Keriso i lona atoaga, e pei ona muaita’u manino mai i le Tusi Paia.²

Ona oo mai ai lea o se soloaiga o asiasiga mai avefeau faalelagi, e aofia ai Moronae, Ioane le Papatiso, ma uluai Aposetolo o Peteru, Iakopo, ma Ioane. O isi na sosoo mai ai, e aofia ai Mose, Elia, ma Elaia. Sa toe aumai e i latou taitoatasi le pule paia e faamanuia ai le fanau a le Atua i luga o le fogaeleele.

I se vavega, ua tatou maua foi le Tusi a Mamona: O Se Tasi Molimau ia Iesu Keriso, o se soa o tusitusiga paia i le Tusi Paia. O faaaliga ua lolomiina i le Mataupu Faavae ma Feagaiga ma le Penina Tau Tele ua matua faamauoaina ai lo tatou malamalama e uiga i poloaiga a le Atua ma le upumoni e faavavau.

O ki ma tofi o le perisitua ua toefuataiina mai, e aofia ai tofi o le Aposetolo, Fitugafulu, peteriaka, faitaulaga sili, toeaina, epikopo, ositaulaga, aoao, ma le tiakono. Ma o tamaitai o e alolofa i le Alii e auauna atu ma le totoa i le Aualofa, Peraimeri, Tamaitai Talavou, Aoga Sa, ma isi valaauga o le Ekalesia—o vaega taua uma ia o le Toefuataiga o le talalelei a Iesu Keriso i lona atoaga.

O lea, o le tausaga 2020 o le a atofaina e faamanatu ai le 200 tausaga. O le Konafesi Aoao ia Aperila a sau o le a ese mai soo se konafesi ua maea. I le isi ono masina e sosoo ai, ou te faamoemoe o le a saunia tagata uma ma aiga uma mo se konafesi tulagaese o le a faamanatu ai faavae tonu o le talalelei toefuataiina.

Atonu e te manao e amata au tapenaga e ala i le toe faitauina o le tala a Iosefa Samita o le Uluai Faaaliga e pei ona tusia i le Penina Tautele. O le tatou kosi suesue mo le tausaga fou i le Sau, Mulimuli mai ia te Au o le Tusi a Mamona. Atonu e te manao e mafaufau loloto i fesili taua e pei o le, “O le a faapefea ona ese lo’u olaga pe afai e aveese faafuasei lo’u malamalama na maua mai le Tusi a Mamona?” po o le “Na faapefea e taualumaga ia na sosoo mai ma le Uluai Faaaliga ona faia se eseesega mo a’u ma e pele ia te a’u?” Ma le isi, faatasi ai ma vitio o le Tusi a Mamona ia ua maua nei, atonu e te manao e faaaofia ai i au suesuega faaletagata lava ia ma faaleaiga.

Filifili au oe lava fesili. Mamanuina lau oe lava fuafuaga. Faatofu oe lava ia i le malamalama mamalu o le Toefuataiga. A e faia, o le konafesi aoao ia Aperila a sau o le a le gata e manatua pea; ae o le a le galo lava.

I le faaiuga, ou te tuua outou i lo’u alofa ma a’u faamanuiaga ina ia fiafia atili outou taitoatasi ma paia atu i aso taitasi. A o le taimi lenei, faamolemole ia mautinoa o loo faaauau pea faaaliga i totonu o le Ekalesia ma o le a faaauau pea i lalo o le taitaiga a le Alii seia oo ina “faataunuu faamoemoega o le Atua, ma fetalai ai le Ieova Silisili ua maea le galuega.”³

Ou te faamanuia ai ia te outou, ma toefaamautu atu lo’u alofa mo outou, faatasi ma la’u molimau o loo soifua le Atua! O Iesu o le Keriso! O Lana Ekalesia lenei ma o i tatou o Lona nuu. I le suafa paia o Iesu Keriso, amene.