Fua

Saunia e Elder Neil L. Andersen

O Le Korama a Aposetolo e Toasefululua

Ia tāmau o outou mata ma loto ia faatotonugalemu i le Faaola o Iesu Keriso, ma le olioli faavavau lea e na o Ia e oo mai ai.

Ua ou iloa le mea o loo e mafaufau i ai! Toe tasi lava le failauga ona tatou faafofoga atu lea ia Peresitene Nelson. O le faamoemoe ai ina ia outou mataala pea mo ni nai minute ao tatou talitali ai lo tatou perofeta pele, ua ou filifilia ai se autu mataina: o la’u mataupu o le fua.

Faatasi ai ma le lanu, foliga, ma le suamalie o peri, fa’i, meleni, ma mago, po o fualaau suamalie e ese atu e pei o le kiwano po o le pomegranate, ua leva ona avea fualaau suamalie ma matai’ai taua.

I le taimi o Lana galuega i le lalolagi, sa faatusatusa ai e le Faaola fua lelei i mea e faavavau le taua. Na Ia fetalai, “Tou te iloa i latou i o latou fua.”¹ “E faapea foi laau lelei taitasi ma fua mai i fua lelei.”² Na Ia uunaia i tatou e ao mai “fua e oo i le ola e faavavau.”³

I se miti manino ua tatou iloa lelei i le Tusi a Mamona, na maua ai e le perofeta o Liae o ia lava i “se vao pouliuli ma le pagatia.” E i ai vai eleelea, o se puao o le pogisa, ala ese, ma ala faasaina, faapea foi ma le āi u’amea⁴ i se ala sa’o ma le vaapiapi e tau atu i se laau matagofie e tumu i “fua [e] faafiafia ai le tagata.” O le toe faamatalaina o le miti, na fai mai ai Liae: “Sa ou … ‘ai i [le] fua; … ua sili ona suamalie, nai lo o mea uma sa ou tofo muamua i ai. … [Ma] sa faatumulia loʼu agaga i le olioli tele.” O lenei fua sa “[sili] ona manaomia [nai] lo se isi lava fua.”⁵

O le Uiga o le Laau ma le Fua

O le a le mea o faatusa i ai lenei laau ma ona fua e silisili ona pele? E faatusa i “le alofa o le Atua”⁶ ma o loo folafola mai ai le fuafuaga ofoofogia o le togiola a lo tatou Tama Faalelagi. “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”⁷

O lenei fua taua e faatusa i faamanuiaga matagofie o le Togiola le mafaatusalia a le Faaola. E le gata o le a tatou toe ola pe a mavae lo tatou olaga faaletino, ae o lo tatou faatuatua ia Iesu Keriso, lo tatou salamo, ma lo tatou tausia o poloaiga, e mafai ai ona faamagaloina a tatou agasala ma tutu i se aso i le mama i luma o lo tatou Tama ma Lona Alo.

O le ‘aai i le fua o le laau e faatusa foi i lo tatou taliaina o sauniga ma feagaiga o le talalelei toefuataiina—o le papatisoina, mauaina o le meaalofa o le Agaga Paia, ma le ulu atu i le maota o le Alii ina ia faaeeina i le mana mai luga. E ala atu i le alofa tunoa o Iesu Keriso ma e ala i le faamamaluina o a tatou feagaiga, tatou te maua ai folafolaga le mafuatia o le ola ai ma o tatou aiga amiotonu i le faavavau atoa.⁸

E leitioa faamatala e le agelu le fua o se mea e “silisili ona olioli i le agaga.”⁹ E moni lava!

O le Luitau o le Tumau Faamaoni

E pei ona tatou aoaoina uma, e oo lava ina ua uma ona tofo i le fua faapelepele o le talalelei toefuataiina, o le tumau moni ma le faamaoni i le Alii o Iesu Keriso e le faigofie ona faia. E pei ona ta’ua i le tele o taimi i lenei konafesi, tatou te faaauau pea ona fetaiai ma mea faalavefau ma taufaasese, fenumiaiga ma le vāvāō, faatosinaga ma faaosoosoga ia e taumafai e toso ese o tatou loto mai le Faaola atoa ai ma olioliga ma mea matagofie ua tatou oo i ai i le mulimuli ai ia te Ia.

Ona o lenei faigata, ua aofia ai foi i le miti a Liae se lapataiga! Sa i ai i le isi itu o le vaitafe se fale tele ma le ateatea o i ai tagata o soo se matutua o loo tusitusi mai o latou tamatamailima, tauemu, ma faifai mai i soo amiotonu o Iesu Keriso.

O tagata o i le fale o loo tauemu ma taliē mai ia i latou o loo tausia poloaiga, ma faamoemoe e ta’uleagaina ma faamaasiasi lo latou faatuatua ia Iesu Keriso ma i Lana talalelei. Ma talu ai o osofaiga i faamatalaga o le masalosalo ma le inoino na tauvalaau atu i e talitonu, na amata ai ona lagona e nisi o i latou na tofo i le fua le maasiasi i le talalelei lea na latou taliaina muamua. O faatosinaga sese a le lalolagi na faatosinaina i latou; ua latou liliuese ai mai le laau ma le fua ma, i upu a tusitusiga paia, ua “pauu ese atu i ala faasaina ma ua leiloloa.”¹⁰

I lo tatou lalolagi i lenei vaitaimi, o loo galulue faasoloatoa le aufaigaluega a le fili, e faavave ona faatumulia le fale tele ma le ateatea. Ua faalautele atu i le isi itu o le vaitafe, ma le faamoemoe e siomia ai o tatou fale, a o tauvalaau mai pea le au tusitusilima ma le au tauemu i le ao ma le po mai mea o loo i luga o le initoneti.¹¹

Na faamalamalama mai e Peresitene Nelson, “Ua matuā faateleina e le tiapolo ana taumafaiga e faavaivaia molimau ma taofia le galuega a le Alii.”¹² Sei o tatou toe manatua upu a Liae: “Sa matou lē amanaiaina i latou.”¹³

E ui e le manaomia ona tatou fefefe, ae e ao ona tatou faaeteete. E i ai taimi e mafai ai e mea itiiti ona faaatuatuvaleina lo tatou paleni faaleagaga. Faamolemole ‘aua ne’i faatagaina a outou fesili, upu faifai a isi, uo lē faamaoni, po o ni measese ma ni lē fiafia e liliuesea oe mai faamanuiaga suamalie, mama, ma faamalie loto ia e oo mai i le fua faapelepele o le laau. Ia tāmau o outou mata ma loto ia faatotonugalemu i le Faaola o Iesu Keriso, ma le olioli faavavau lea e na o Ia e oo mai ai.

O le Faatuatua o Jason Hall

Ia Iuni, na ma auai atu ai ma lo’u toalua, o Kathy i le faalelauasiga o Jason Hall. I le taimi o lona maliu, ua 48 ona tausaga ma na auauna atu o se peresitene o le korama a toeaina.

O upu nei a Jason e uiga i se mea na tupu na suia ai lona olaga:

“[I le 15 tausaga sa] ou i ai i se faalavelave a o puna maulu. … Na [gau] lo’u ua ma pe [lo’u tino] mai le fatafata agai i lalo. Na pe atoa lava o’u vae ma se vaega o o’u lima. Sa le mafai ona ou toe savali, tu, … pe fafaga a’u lava. Sa tau le mafai ona ou manava pe tautala.”¹⁴

“‘Tama pele [o i le Lagi],’ ou te aioi atu, ‘pe mafai lava ona [faaaoga] na’o o’u lima, ou te iloa e mafai ona ou taulimaina [lenei tofotofoga]. Faamolemole, Tama, faamolemole. …

“… ‘Tuu pea o’u vae, Tama; na’o le faaaogaina lava o o’u lima o loo ou [tatalo atu ai].’”¹⁵

E lei mafai lava e Jason ona faaaoga ona lima. E mafai ona e lagona leo mai le fale tele ma le ateatea? “Jason Hall, e le o mafai ona faafofoga mai le Atua i au tatalo! Afai o le Atua o se Atua alofa, aisea ua Ia tuua ai oe faapea? Aisea e faatuatua ai ia Keriso? Na lagona e Jason Hall o latou leo ae e lei faalogo ia i latou. Nai lo lena na ‘ai o ia i le fua o le laau. Na amata ona mausali lona faatuatua ia Iesu Keriso. Na ia faauu mai le iunivesite ma faaipoipo atu ia Kolette Coleman i le malumalu, ma faamatalaina o ia o le pele toatasi o lona olaga.¹⁶ Ina ua mavae le 16 tausaga talu ona faaipoipo, na fanau mai se isi vavega, o lo la atalii pele o, Coleman.

Na faapefea ona latou faatupuina lo latou faatuatua? Na faamatalaina e Kolette: “Sa ma faatuatua i le fuafuaga a le Atua. Ma na aumaia ia i maua le faamoemoe. Sa ma iloa o le a [i ai se aso i le lumanai] o le a atoatoa ai Jason. … Sa ma iloa na saunia e le Atua mo i tatou se Faaola, o Lana taulaga togiola ua mafai ai ona tatou taulai atu ai pea i luma pe a tatou fia faavaivai.”¹⁷

I le lauga ai i le maliu o Jason, na fai mai ai Coleman e 10 tausaga le matua na aoao o ia e lona tama “ua [i ai] i le Tama Faalelagi se fuafuaga mo i tatou, o le a matagofie le olaga faalelalolagi, ma e mafai ona tatou ola i ni aiga. … Ae … e tatau ona tatou feagai ma mea faigata ma o le a tatou faia ni mea sese.”

Sa faaauau pea Coleman: “Na auina mai e le Tama Faalelagi Lona Alo, o Iesu, i le lalolagi. O Lana galuega o le atoatoa. Ia faamalolo tagata. Ia alofa atu ia i latou. Ona mafatia lea mo o tatou tiga, faanoanoaga, ma agasala uma. Ona Ia maliu lea mo i tatou.” Ona faaopoopo mai lea e Coleman, “Ona sa Ia faia lenei mea, e silafia e Iesu o’u lagona i le taimi nei.”

“Tolu aso talu ona maliu Iesu, na Ia … toe soifua mai, ma Lona tino ua atoatoa. E taua lenei mea ia te a’u aua ou te iloa … o le a atoatoa le tino o lo’u [tama] ma o le a matou faatasia o se aiga.”

Na faaiuina e Coleman faapea: “O po uma talu mai ona ou pepe, e fai mai lo’u tama ia te a’u, ‘E alofa Tama ia te oe, e alofa le Tama Faalelagi ia te oe, ma o oe o se tama lelei’”¹⁸

E Oo Mai le Olioli Ona o Iesu Keriso.

Na faamatala e Peresitene Russell M. Nelson le mafuaaga e lagona ai e le aiga o Hall le olioli ma le faamoemoe. Sa Ia saunoa mai:

“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.

“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma. …

“Afai tatou te vaai atu i le lalolagi … , tatou te le iloaina lava le olioli. … O le [olioli] o se meaalofa e sau mai le taumafai ma le leai o se mafaufau i ai ia ola i se olaga amiotonu, e pei ona aoao mai e Iesu Keriso.”¹⁹

O Se Folafolaga a o E Toefoi Atu

Afai na leai sau fua o le laau o le ola mo sina taimi, faamolemole ia silafia o loo faaloaloa mai pea aao o le Faaola ia te oe. O loo Ia talotalo mai ma le alofa, “Salamo ma o mai ia te a’u.”²⁰ O Ana fua e tele ma e fua i vaitau uma. E le mafai ona faatauina i tupe, ma e leai lava se tasi e manao moni i ai ua teenaina.²¹

Afai e te manao e toe foi i le laau ma toe tofo i le fua, amata e ala i le tatalo atu i lou Tama Faalelagi. Talitonu ia Iesu Keriso ma le mana o Lana taulaga togiola. Ou te folafola atu ia te outou afai tou te vaavaai atu i le Faaola “i mafaufauga uma,”²² o le a toe avea ma oe le fua o le laau, suamalie i lau tofo, olioli i lou agaga, “o le [meaalofa] aupito silisili o meaalofa uma a le Atua.”²³

O Elder Andersen faatasi ai ma Au Paia Potukale i le faapaiaina o le Malumalu o Lisbon

O le tolu vaiaso ua mavae, sa ou vaaia ai le faaalia atoatoa o le olioli o le fua a le Faaola a o ma auai atu ma Kathy i le faapaiaga o le Malumalu o Lisbon Potukale. Na tatala upumoni o le talalelei toefuataiina i Potukale i le 1975 ina ua i ai le saolotoga o tapuaiga. O le toatele o Au Paia tamalii o e na muai tofo i le fua i le taimi na leai ai ni faapotopotoga, leai ni falelotu, ma e leai se malumalu e latalata nai lo le 1,000 maila (1,600 km) ua fiafia faatasi ma i matou ona ua i ai nei fua taua o le laau i le maota o le Alii i Lisbon, Potukale. E maeu lo’u faamamaluina ma faaaloalo i nei Au Paia o Aso e Gata Ai o e na faatumauina le tāmau o o latou loto i le Faaola.

Na fetalai mai le Faaola, “O lē tumau ia te au, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai.”²⁴

O le lauga atu i lenei taeao i tagata o le Ekalesia i le salafa o le lalolagi, na saunoa atu ai Peresitene Nelson, “O’u uso e ma tuafafine pele, o outou o ni faataitaiga ola o fua e maua mai i le mulimuli i aoaoga a Iesu Keriso.” Ona ia faaopoopo mai lea, “Ou te faafetai atu ia te outou! Ou te alofa ia te outou!”²⁵

Matou te alolofa ia te oe, Peresitene Nelson.

O a’u o se molimau patino i le mana o faaaliga lea e taoto i luga o lo tatou Peresitene pele. O Ia o le perofeta a le Atua. E pei o Liae anamua, o loo talotalo mai Peresitene Russell M. Nelson ia i tatou ma tagata uma o le aiga o le Atua ia o mai ma ‘aai i le fua o le laau. Tau ina ia tatou maua le lotomaualalo ma le malosi e mulimuli ai i lana fautuaga.

Ou te molimau atu ma le lotomaualalo o Iesu Keriso o le Alo o le Atua. O Lona alofa, o Lona mana, ma Lona alofa tunoa e aumaia mea uma e faavavau lona taua. Ou te molimau atu ai i le suafa o Iesu Keriso, amene.