Taulai Atu Suiga o le Faalapotopotoga i le Faamalolosia o le Autalavou

I le avea ai ma se vaega o le taumafaiga ina ia mafai atili ai e le autalavou o le Ekalesia ona ausia o latou gafatia paia, o lea na fofogaina mai ai ni fetuunaiga i faalapotopotoga a Alii Talavou ma Tamaitai Talavou i le konafesi aoao ia Oketopa 2019 e Peresitene Russell M. Nelson (tagai i le itulau 38) ma faamalamalama mai e Elder Quentin L. Cook o le Korama a Aposetolo e Toasefululua (tagai i le itulau 40) faatasi ai ma Sister Bonnie H. Cordon, o le Peresitene Aoao o Tamaitai Talavou (tagai i le itulau 67).

O nei suiga ua faamamafa mai ai le “tiutetauave muamua ma le sili ona taua [a le epikopo] o le tausia lea o alii talavou ma tamaitai talavou o lana uarota,” na saunoa ai Peresitene Nelson. O suiga e aofia ai le faamutaina o au peresitene o Alii Talavou a uarota. O le au epikopo, i le avea ai ma au peresitene o le Perisitua Arona, o le a fesoasoani atu i ai ia faufautua o korama ma i nisi o tulaga o ni tagata faapitoa. O le a lipoti sao atu le peresitene o Tamaitai Talavou o le uarota i le epikopo.

O au peresitene o korama ma vasega o le a taulai atu i le galuega o le faaolataga, e aofia ai galuega faamisiona a le au paia, faatumauina o tagata liliu mai, faatoagaina mai, galuega o le malumalu ma talafaasolopito o aiga, ma le aoaoina atu o le talalelei. O peresitene o le korama ma vasega a le autalavou e fuafuaina ma taitaiina ia sauniga i Aso Sa, galuega fesoasoani, ma isi gaoioiga.

O gaoioiga mo le autalavou e le toe ta’ua o le “Mutuale” ae e mafai ona ta’ua o “gaoioiga a Tamaitai Talavou,” “gaoioiga a le korama a le Perisitua Arona,” po o “gaoioiga a le autalavou.” O le paketi alauni mo gaoioiga a le autalavou e tatau ona vaevaeina i ni vaega tutusa, e fua i le aofai o le autalavou i faalapotopotoga taitasi.

Ua uma ona toe faafouina le autu a tamaitai talavou, ma e tatau ona faatulaga le aofaiga o vasega a tamaitai talavou e tusa ai ma le aofai ma manaoga o tamaitai talavou. O vasega o le a faaigoaina o “Tamaitai Talavou,” sosoo ai ma tausaga o i latou o loo i le vasega, e pei o “Tamaitai Talavou 12 – 14,” pe na o “Tamaitai Talavou” pe afai e potopoto faatasi uma. O igoa o le “Ofagapi,” “Maea Meite,” ma le “Lora” o le a le toe faaaogaina.

O se tasi o fautua maualuga a le siteki o le a avea ma peresitene o Alii Talavou a le siteki, ma o le au peresitene o Alii Talavou ma Tamaitai Talavou a le siteki e galulue i le komiti a le Perisitua Arona–Tamaitai Talavou, o le fautua maualuga e tofia i Tamaitai Talavou, ma le fautua maualuga e tofia i le Peraimeri.

O isi suiga, o le a ta’ua le Aualofa, Tamaitai Talavou, Alii Talavou, Peraimeri, ma le Aoga Sa o ni “faalapotopotoga” nai lo “ausilali” ma o taitai o le ta’ua o ni “Taitai Aoao” i le tulaga o le Ekalesia i le lalolagi atoa ma “taitai o siteki” ma “taitai o uarota” i le tulaga faalelotoifale.