Mana e Faatoilalo ai le Fili

Saunia e Elder Peter M. Johnson

O Le Fitugafulu

E faapefea ona tatou maua lenei filemu, manatua po o ai i tatou, ma faatoilalo ai F e tolu a le fili?

Uso e ma tuafafine, faafetai mo mea uma o loo tou faia ina ia avea ai, ma ia fesoasoani ai i isi ina ia avea ai, ma soo moni o Iesu Keriso ma olioli i faamanuiaga o le malumalu paia. Faafetai atu mo lo outou tuuto. E maoae outou; ua lalelei outou.

O la’u tatalo ia tatou iloa le faatosinaga maumaututu a le Agaga Paia a o tatou malamalama atoatoa o i tatou o fanau a le Atua. Ua ta’ua e “Le Aiga: O Se Folafolaga i le Lalolagi”: “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”¹ O i tatou o “agaga filifilia o e sa faapolopolo e o mai i le atoaga o taimi e auai i le faataotoina o faavae o le galuega tele o aso e gata ai.”² Na folafola mai e Peresitene Russell M. Nelson: “Na aoaoina oe i le lalolagi o agaga e saunia ai oe mo soo se mea ma mea uma o le a e feagai ai i le taimi o lenei vaega o nei aso e gata ai (tagai i le MF&F 138:56). O lena aoaoga e tumau i totonu ia te oe!”³

O outou o atalii ma afafine filifilia o le Atua. O loo ia te outou le mana e faatoilalo ai le fili. Peitai, ua iloa e le fili po o ai outou. Na te iloa lou tupuaga faalelagi ma e saili ina ia faamuta lou gafatia faalelalolagi ma faalelagi e ala i le faaaogaina o F e tolu:

• Faasese

• Faalavefau

• Faalotovaivai

Faasese

Na faaaoga e le fili le meafaigaluega o le faasese i aso o Mose. Ua folafola atu e le Alii ia Mose:

“Faauta, o oe lava o loʼu atalii. …

“Ua ia te a’u se galuega mo oe, … ma ua tusa oe ma la’u Toatasi na Fanaua.”⁴

E lei leva ona uma lenei faaaliga mamalu, ae taumafai Satani e faasese Mose. O upu na ia faaaogaina e mata’ina: “Mose e, le atalii o le tagata, ifo mai ia te a’u.”⁵ O le faasese sa le na o se valaaulia e ifo atu ia Satani, ae o le faasese foi i le ala na ia faamatalaina ai Mose o se atalii o le tagata. Manatua, faatoa uma lava ona ta’u atu e le Alii ia Mose o ia o se atalii o le Atua, na foafoaina i le faatusa o le Toatasi na Fanaua.

Sa naunau le fili i lana taumafaiga e faasese Mose, ae sa teena e Mose i le faapea atu: “Satani, alu ese ia mai ia te a’u, aua ua nao le Atua lenei e tasi o le a ou ifo atu i ai, o le Atua lea o le mamalu.”⁶ Sa manatua e Mose po o ai o ia—o se atalii o le Atua.

O le afioga a le Alii ia Mose e faatatau foi ia te oe ma a’u. Ua foafoaina i tatou i le faatusa o le Atua, ma o loo i ai Sana galuega mo i tatou e fai. E taumafai le fili e faasese [i tatou] e ala i lo tatou faagaloina po o ai moni i tatou. Afai tatou te le malamalama po o ai i tatou, o lona uiga e faigata ona tatou iloa le ituaiga tagata e mafai ona avea ai i tatou.

Faalavefau

E taumafai foi le fili e faalavefau i tatou ia o ese mai ia Keriso ma Lana ala o feagaiga. Na faasoa mai e Elder Ronald A. Rasband le mea lenei: “O le mamanu a le fili o le aveesea mai lea o i tatou mai molimau faaleagaga, ao le finagalo o le Alii o le faamalamalama ma faagauai atu i tatou i Lana galuega.”⁷

I o tatou aso, e tele faalavefau, e aofia ai le Twitter, Facebook, taaloga vitio e faafoliga e moni, ma le tele o isi mea. O nei tulaga faatekinolosi e ofoofogia, ae afai tatou te le faaeteete, e mafai ona latou faalavelave ia i tatou mai le faataunuuina o lo tatou gafatia paia. O le faaaogaina o ia mea ma le talafeagai e mafai ona aumaia ai le mana o le lagi ma faatagaina ai i tatou e molimauina vavega a o tatou saili atu e faapotopoto Isaraelu ua faataapeapeina i itu uma e lua o le veli.

Ia tatou faaeteete ae aua le faasamasamanoa i lo tatou faaaogaina o tekinolosi.⁸ Ia saili pea mo auala e mafai ai e tekinolosi ona tatou latalata atu i le Faaola ma faatagaina ai i tatou e faataunuu Lana galuega a o tatou saunia mo Lona Afio Mai Faalua.

Faalotovaivai

O le mea mulimuli, e manao le fili ina ia faalotovaivai i tatou. Atonu tatou te lotovaivai pe a tatou faatusatusa i tatou lava i isi pe lagona tatou te le o ola e tusa ai ma faamoemoega, e aofia ai o tatou lava olaga.

Ina ua amata laʻu polokalama faafomai, sa ou lagonaina le lotovaivai. E na o le fa tamaiti na taliaina e le polokalama i lena tausaga, ae o isi tamaiti aoga sa atamamai. Sa maualuluga ni o latou togi i suega ma ni aafiaga faalegaluega i tofiga o pulega sinia, ma sa latou faaalia le talitonuga i o latou tomai. Ina ua uma a’u vaiaso muamua e lua i le polokalama, na amata ona ou lagonaina ni lagona o le faalotovaivaia ma le masalosalo, na toetoe lava a lofituina ai a’u.

Sa tonu ia te au afai e ao ona ou faamaeaina lenei polokalama fa-tausaga, e tatau ona ou faamaeaina le faitauina o le Tusi a Mamona i semesa taitasi. O aso taitasi a o ou faitau, sa ou iloaina ai le tautinoga a le Faaola e faapea, o le a aoao mai e le Agaga Paia mea uma ia te a’u ma o le a ou manatua ai mea uma.⁹ Sa toe faamautu ai po o ai a’u i le avea ai ma se atalii o le Atua, na faamanatu mai ia te a’u e ‘aua nei o’u faatusatusaina aʻu lava i isi, ma tuuina mai ia te a’u le talitonuga i laʻu matafaioi paia ia faamanuiaina.¹⁰

A’u uo pele, faamolemole ‘aua ne’i faatagaina se tasi na te faoa lou fiafia. ‘Aua le faatusatusaina oe lava i isi tagata. Faamolemole ia manatua upu alofa a le Faaola: “Ou te tuuina atu ia te outou le [filemu], o lo’u [filemu] ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale, o outou loto, aua foi tou te matatau.”¹¹

Ma e faapefea ona tatou faia? E faapefea ona tatou maua lenei filemu, manatua po o ai i tatou, ma faatoilalo ai F e tolu a le fili?

Muamua, ia manatua o le poloaiga muamua ma le sili o le alofa i le Atua ma o tatou loto, manatu, mafaufau, ma le malosi.¹² O mea uma tatou te faia, e tatau ona faaosofia e lo tatou alolofa ia te Ia ma Lona Alo. A o tatou atiina ae lo tatou alolofa mo i Laua e ala i le tausia o a Laua poloaiga, o le a faateleina lo tatou gafatia e alolofa ai ia i tatou lava ma alolofa atu ai i isi. O le a amata ona tatou auauna atu i aiga, uo, ma tuaoi aua o le a tatou vaai atu ia i latou e pei ona silasila mai le Faaola ia i latou—o ni atalii ma ni afafine o le Atua.¹³

Lua, tatalo atu i le Tama i le suafa o Iesu Keriso i aso uma, aso uma, aso uma.¹⁴ E ala atu i le tatalo e mafai ai ona tatou lagonaina le alofa o le Atua ma faaali atu lo tatou alolofa mo Ia. E ala i le tatalo tatou te faailoa atu ai le lotofaafetai ma ōle atu mo le malosi ma le lototele e gauai atu ai o tatou loto i le finagalo o le Atua ma ia taialaina ma taitaiina i mea uma.

Ou te uunaia outou e “tatalo atu i le Tamā ma le malosi atoa o le loto, ina ia faatumulia outou i lenei alofa, … ina ia mafai ona avea outou ma atalii [ma afafine] o le Atua; a oo ai ina afio mai o ia o le a tatou faapei o ia.”¹⁵

Tolu, faitau ma suesue i le Tusi a Mamona i aso uma, aso uma, aso uma.¹⁶ O a’u suesuega o le Tusi a Mamona e foliga mai e sili atu pe a ou faitau faatasi ma se fesili i le mafaufau. A tatou faitau faatasi ma se fesili, e mafai ona tatou mauaina faaaliga ma iloaina na saunoa mai le Perofeta o Iosefa Samita i le upumoni ina ua ia tautino mai, “O le Tusi a Mamona o le tusi aupito sili ona sa’o i soo se isi lava tusi i luga o le fogaeleele, … e sili ona latalata atili atu o le tagata [po o se tamaitai] i le Atua i lona ola ai i ona mataupu, nai lo se isi lava tusi.”¹⁷ O le Tusi a Mamona o loo i ai afioga a Keriso ma e fesoasoani ia i tatou e manatua ai po o ai i tatou.

Ma le mea mulimuli, ia taumamafa ma le agaga tatalo i le faamanatuga i vaiaso uma, vaiaso uma, vaiaso uma. E ala mai i feagaiga ma sauniga o le perisitua, e aofia ai ma le faamanatuga, e faaalia ai le mana o le faaleatua i o tatou olaga.¹⁸ Na aoao mai Elder David A. Bednar: “O le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. O le faatinoga o le taumamafa i le faamanatuga, na o le faamanatuga lava, e le faamagaloina ai ni agasala. Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma le agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou.”¹⁹

A o tatou aai ma feinu ma le lotomaualalo i le faamanatuga, tatou te manatua mafatiaga a Iesu i lena faatoaga paia ua ta’ua o Ketesemane ma Lana taulaga i luga o le satauro. Tatou te faaali atu le lotofaafetai i le Tama mo le auina mai o Lona Alo e Toatasi na Fanaua, lo tatou Togiola, ma faaali atu lo tatou naunau e tausi Ana poloaiga ma manatua pea o Ia.²⁰ O loo i ai le malamalamaaga faaleagaga e fesootai ma le faamanatuga—e patino [i le tagata lava ia], e mamana, ma e manaomia.

A’u uo, ou te folafola atu a o tatou taumafai e alolofa i le Atua ma o tatou loto atoa, tatalo i le suafa o Iesu Keriso, suesue i le Tusi a Mamona, ma aai ma feinu ma le agaga tatalo i le faamanatuga, o le a tatou maua le tomai, ma le malosi o le Alii, e faatoilalo ai faiga faasese a le fili, e faaitiitia ai mea faalavefau ia e faatapulaaina lo tatou gafatia paia, ma tetee atu i mea faalotovaivai ia e faaitiitia lo tatou malosi e lagona ai le alofa o lo tatou Tama Faalelagi ma Lona Alo. O le a tatou malamalama atoatoa po o ai i tatou o ni atalii ma afafine o le Atua.

Uso e ma tuafafine, ou te faasoa atu ia te outou lo’u alofa ma folafola atu lau molimau ou te iloa o loo soifua le Tama Faalelagi ma o Iesu o le Keriso. Ou te alofa ia i Laua. O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi. O i tatou, i le avea ai ma tagata o Lana Ekalesia, ua i ai se tofiga paia e faapotopoto Isaraelu ma saunia le lalolagi mo le Afio Mai Faalua o le Mesia. I le suafa o Iesu Keriso, amene.

Faamatalaga

1. O Le Aiga: O Se Folafolaga i le Lalolagi,” Liahona, Me 2017, 145.

2. Mataupu Faavae ma Feagaiga 138:53; tagai foi Mataupu Faavae ma Feagaiga 138:54–56.

3. Russell M. Nelson, “Tutu Atu o ni Tagata Moni o le Meleniuma,,” Liahona, Oke. 2016, 53.

4. Mose 1:4, 6.

5. Mose 1:12.

6. Mose 1:20; tagai foi i le Mose 1:16–19, 21.

7. Ronald A. Rasband, “Ne’i Galo ia te Oe,” Liahona, Nov. 2016, 115.

8. Tagai i le Becky Craven, “Faaeteete faasaga i le Faasamasamanoa,” Liahona, Me 2019, 9–11.

9. Tagai i le Ioane 14:26.

10. O la tatou matafaioi paia o le faamanuiaina, o le mauaina lea o le ola e faavavau e tusa lava pe maua e se tasi le tulaga e manatu le lalolagi o ni manuia i taumafaiga faalelalolagi. E faamanatu mai e le Agaga Paia ia i tatou lo tatou matafaioi paia ma le ituaiga o tagata e mafai ona avea ai i tatou pe a tatou tumau i le ala o le feagaiga ma faatoilalo, faatasi ai ma le malosi o le Alii, ia faaosoosoga a le fili.

11. Ioane 14:27; ua faaopoopo le faamamafa.

12. Tagai i le Mataio 22:37–38.

13. Tagai i le Ioane 3:16; 1 Ioane 4:19; Mosaea 2:17.

14. Tagai i le 3 Nifae 18:18–21.

15. Moronae 7:48; ua faaopoopo le faamamafa.

16. Tagai i le Kevin W. Pearson, “Tumau i le Laau,” Liahona, Me 2015, 114–16.

17. Faatomuaga i le Tusi a Mamona.

18. Tagai i le Mataupu Faavae ma Feagaiga 84:20–21.

19. David A. Bednar, “Faatumauina Pea le Faamagaloina o a Outou Agasala,” Liahona, Me 2016, 61-62.

20. Tagai i le Moronae 4:2–3; 5:1–2; Mataupu Faavae ma Feagaiga 20:76–79. Faamolemole ia matau, o loo tatou ola i se taimi tatou te matua manaomia ai Lona Agaga e faatasi pea ma i tatou.