Mea na Faamamafa Mai mai le Konafesi Aoao Faaleafatausaga Lona 189

Na tuuina mai pea lava pea e taitai o le Ekalesia o e na saunoa mai i le taimi o le konafesi aoao le valaaulia ina ia—ia fiafia atili, ia paia atili, ia avea atili e pei o le Faaola, ma ia fesoasoa i isi ia faia foi faapea.

O le mea e sili ai, na latou faia lena suiga e foliga e mafai lava e i tatou taitoatasi ona ausia.

“E finagalo le Alii i Ana fanau uma ia tofo i faamanuiaga e faavavau o loo maua i totonu o Lona malumalu,” o le aoao mai lea a Peresitene Russell M. Nelson. “… O le agavaa faaletagata lava ia e ulufale atu ai i le maota o le Alii e manaomia ai le tele o sauniuniga faaleagaga a le tagata lava ia. Ae faatasi ai ma le fesoasoaniga a le Alii, e leai se mea e faigata.”

Mauaina o le Fiafia ma le Paia

Ua valaaulia e Peresitene Nelson i tatou taitoatasi ina ia agavaa mo faamanuiaga o le malumalu (tagai i le itulau 120).

Sa faamalamalama mai e Peresitene Henry B. Eyring le sootaga i le va o le faateleina o le paia ma le faateleina o le fiafia (tagai i le itulau 100).

Sa aoao mai e Elder D. Todd Christofferson i tatou i le ala e maua ai “le olioli o le Au Paia” (tagai i le itulau 15).

O Se Valaaulia ia Alofa ma Faasoa Atu

Sa aoao mai e Peresitene Nelson le taua o le alofa atu i o tatou tuaoi ma auiliili mai aafiaga taua o le galuega fesoasoani agaalofa a le Ekalesia (tagai i le itulau 96).

Sa faamalamalama mai e Elder Dieter F. Uchtdorf le mana o le valaauliaina o isi e “o mai ina matamata” (tagai i le itulau 86).

Na faamatalaina e Sister Cristina B. Franco le olioli o le faasoaina atu o le talalelei (tagai i le itulau 83).

Faamalolosia o le Autalavou

Na fofogaina mai e le perofeta ni suiga i faalapotopotoga a le autalavou lea o le a faamalosia le autalavou i au peresitene o le korama ma au peresitene o vasega e tulai ae ma taitai (tagai i le itulau 38).

Na tuuina mai e Elder Quentin L. Cook le auala o le a faagaoioia ai le taitaiga o le Perisitua Arona (tagai i le itulau 40).

Na faasoa mai e Sister Bonnie H. Cordon ni suiga i le faalapotopotoga a tamaitai talavou (tagai i le itulau 67).

Fausiaina o Malumalu; Fausiaina o i Tatou

Sa fofogaina mai e Peresitene Nelson ia malumalu fou e valu i le taimi o le sauniga a tamaitai (tagai i le itulau 120).

I le aoauli o le Aso Sa, sa ia aoao mai e uiga i le agavaa e ulu atu i le malumalu ma faalauiloa mai ia fesili o pepa faataga o le malumalu ua faafouina (tagai i le itulau 120).