Toe Faafouina Fesili o Pepa Faataga ma Isi Talafou o Malumalu

O toe faafouga o fesili o le faatalanoaga o pepa faataga o le malumalu na fofogaina mai e Peresitene Russell M. Nelson i le taimi o le konafesi aoao o Oketopa 2019 (tagai i le itulau 121). E tumau pea tulaga faatonuina o malumalu, ae o nisi o fesili ua toe faaupuina ina ia manino atili. Ua tatau ona maua e taitai talafeagai o le Ekalesia se tusi a le Au Peresitene Sili na tusia i le aso 6 Oketopa, 2019, lea e aofia ai fesili ua toe faafouina.

Na fofogaina mai foi e Peresitene Nelson ni fuafuaga mo ni malumalu fou se valu (tagai i le itulau 79). O malumalu fou o le a i ai i Freetown, Sierra Leone; Port Moresby, Papua Niu Kini; Bentonville, Arkansas, ISA; Bacolod, Filipaina; McAllen, Texas, ISA; Cobán, Kuatemala; ma Orem ma Taylorsville, Iuta, ISA.

Talu mai le konafesi aoao ia Aperila 2019, ua uma ona faapaiaina malumalu i Kinshasha, Temokarasi Ripapelika o Congo; Lisbon, Potukale; Port-au-Prince, Haiti; ma Fortaleza, Pasila; ma le toe faapaiaina i Oakland, Kalefonia, ISA; Memphis, Tennessee, ISA; Frankfurt, Siamani; Oklahoma City, Okalahoma, ISA; ma Raleigh, North Carolina, ISA.

Sa suatiaina le eleele mo malumalu i Yigo, Guam; Praia, Cabo Verde; San Juan, Puerto Rico; Lima, Peru (Los Olivos); ma o Belém, Pasila, ma nofoaga sa filifilia mo malumalu i Aukilani, Niu Sila, ma Layton ma Saratoga Springs, Iuta, ISA.

Sa faia ni fuafuaga faalauaitele mo le toe faafouina o le Malumalu o Sate Leki, lea o le a tapunia ia Tesema ma toe tatala i le 2024, ma le malumalu o St. George Iuta, lea e tapunia ia Novema 2019 ma o le a toe tatalaina i le 2022.