Maua e ala i le Mana o le Tusi a Mamona

Saunia e Elder Rubén V. Alliaud

O Le Fitugafulu

E tatau ona lagona e tagata uma ma ia maua e le mana o upumoni o loo i ai i le Tusi a Mamona.

Pe a ou asiasi atu i tagata liliu mai i o latou fale, o se tasi o fesili ou te fiafia lava e fesili soo ia i latou e pe na faapefea ona latou iloa ma o latou aiga le Ekalesia ma pe na faapefea ona oo ina latou papatiso. E le afaina pe o le tagata sa i ai i lena taimi o se tagata e toaga mai pe e lei toe auai mai i le lotu mo le tele o tausaga. O le tali lava e tasi: faatasi ma se ataata ma le pupula o o latou fofoga, e amata ona latou faamatala ai le tala o le auala na maua ai i latou. O le mea moni, e foliga mai o le tala o le liuaina o le tala lava e tasi o le auala na maua ai i tatou.

O Iesu Keriso Lava Ia o le Alii o mea leiloloa. E popole o Ia mo mea e leiloloa. O le mafuaaga moni lena sa Ia aoao mai ai faataoto tatou te maua i le mataupu 15 o Luka: o le faataoto o le mamoe na leiloa, le tupe na leiloa, ma le, faataoto mulimuli, o le atalii faamaumauoa. O nei tala uma e tofu uma lava ma se mea e tutusa ai: E le afaina pe aisea ua leiloa ai. E le afaina e tusa lava pe na latou iloa o latou leiloloa. E i ai se lagona lofituina o le olioli lea na alagaina atu, “Ia tatou olioli ia; aua ua ou maua [le mea] na leiloa.”¹ I le faaiuga, e leai se mea e leiloa moni ia te Ia.²

Se’i o’u faasoa atu lava ia te outou i lenei aoauli se tasi o mea aupito sili ona taua ia te a’u—o le tala i le auala na maua ai a’u.

A o toeitiiti atoa lo’u 15, ae valaaulia a’u e lo’u uncle, o Manuel Bustos ia faaalu sina taimi ma ia ma lona aiga iinei i le Iunaite Setete. O se avanoa sili lea mo a’u e aoao ai sina Igilisi. Sa liliu lo’u uncle i le Ekalesia i le tele o tausaga na muamua atu, ma sa i ai sona agaga faafaifeautalai maoae. Masalo o le mafuaaga lea sa talanoa ai lo’u tina ia te ia, e aunoa ma lo’u iloaina, ma fai i ai o le a ioe i le valaaulia i le tuutuuga e tasi: ia aua nei ona taumafai e faatalitonu a’u ia avea ma se tagata o lana Ekalesia. O i matou o Katoliko, ma ua augātupulagā o matou avea ai, ma sa leai se mafuaaga e sui ai fua. Sa ioe atoa i ai lo’u uncle ma tausi lana upu lea na oo lava i se fesili faigofie e uiga i le Ekalesia, sa ia le manao lava e tali.

Ioe, o le mea sa le mafai e lo’u uncle ma si ona toalua lelei, o Marjorie, ona aloese ai o le avea ma tagata sa i ai i laua.³

Sa tofi a’u i se potu sa i ai se potutusi telē o tusi. Sa mafai ona ou vaaia i lenei potutusi, sa i ai masalo e 200 kopi o le Tusi a Mamona i gagana eseese, o le 20 o na tusi i le FaaSipaniolo.

I se tasi aso, i lo’u fiailoa, sa ou ave i lalo se kopi o le Tusi a Mamona i le FaaSipaniolo.

O se tasi o na kopi lea e vaivai le faavaa lanu moana vaivai, ma le ata o le agelu o Moronae i luma. Ina ua ou susueina, i le itulau muamua sa tusia ai le folafolaga lenei: “Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.”

Ona faaopoopo mai lea: “Ma o le mana o le Agaga Paia e mafai ona outou iloa ai le moni o mea uma lava.”⁴

E faigata ona faamatala le aafiaga o nei mau i lo’u mafaufau ma lo’u loto. Ma le faamaoni lava, ou te lei saili mo “le upumoni.” Sa na o a’u o se talavou, fiafia i le olaga, olioli i lenei aganuu fou.

E ui i lea, faatasi ma lena folafolaga i le mafaufau, sa amata ai ona ou faitauina faalilolilo le tusi. A o ou faitau atili, sa ou malamalama afai ou te manao moni lava ia maua se mea mai lenei aafiaga, e tatau la ona ou amata tatalo. Ma e tatou te iloa lelei uma lava le mea e tupu pe a e filifili e le gata e faitau ae tatalo foi e uiga i le Tusi a Mamona. Ia, o le mea tonu lena sa tupu ia te au. O se mea matua faapitoa ma tulagaese tele—ioe, e pei lava o le mea o loo tupu i le fia miliona o isi i le lalolagi atoa. Sa oo ina ou iloa e ala i le mana o le Agaga Paia e moni le Tusi a Mamona.

Ona ou alu atu lea i lo’u uncle e faamatala ia te ia le mea na tupu ma ua ou sauni ina ia papatisoina. Sa le mafai e lo’u uncle ona taofiofi lona te’i tele. Sa oso i totonu o lana taavale, alu atu i le malaevaalele, ma toefoi mai lea ma la’u pepa malaga i le vaalele e toe foi atu i le fale, faatasi ma se faamatalaga sa faatuātusi i lo’u tina e faapea, “E mamā a’u ma lenei mea!”

I se isi tulaga e sa’o o ia. Sa maua tonu a’u e le mana o le Tusi a Mamona.

Atonu e toatele ua maua e ala i faifeautalai ofoofogia i le lalolagi atoa, i tulaga uma e ala i auala faavavega. Pe atonu foi na maua i latou e auala atu i uo sa tuu ma le mautinoa e le Atua i o latou ala. Pe atonu foi na maua i latou e se tasi mai lenei tupulaga pe na auala mai i se tasi o o latou tuaa.⁵ Po o le a lava le tulaga o i ai, ina ia alualu i luma i se liua moni faaletagata lava ia, e le pine, ae tatau ona latou oo uma i ai ma ia maua e le mana o upumoni o loo i ai i totonu o le Tusi a Mamona. I le taimi lava e tasi, e tatau ona filifili patino i latou lava e fai se tautinoga moni i le Atua o le a latou tauivi e tausi Ana poloaiga.

Ina ua ou toefoi atu i Buenos Aires, sa iloa ai e lo’u tina sa ou manao moni lava ina ia papatisoina. Talu ai sa i ai sina o’u uiga faatautee, nai lo le tetee mai la ia te a’u, sa ia ‘au ma le atamai ia te a’u. Ma e aunoa ma le iloaina, sa faia ai e ia lava lo’u faatalanoaga o le papatisoga. O le mea moni, ou te talitonu sa loloto atu lana faatalanoaga nai lo faatalanoaga ia e faatautaia e a tatou faifeautalai. Sa ia fai mai ia te a’u, “Afai e te manao ina ia papatiso, o le a ou lagolagoina oe. Ae e muamua o le a ou fai atua ni fesili, ma ou te manao ia e matua mafaufau loloto ma tali mai ma le faamaoni. E te tautino mai e te auai i le lotu i Aso Sa uma lava?

Sa ou fai atu ia te ia, “Ioe, o le a ou faia lena mea.”

O e iloa le umi o le lotu?”

“Ioe, ua ou iloa,” na ou fai atu ai.

Sa ia tali mai, “Ia, afai e te papatiso, o le a ou faamautinoaina e te alu i le lotu.” Ona ia fesili mai lea ia te a’u pe ua ou loto moni lava e le inu ava malosi pe ulaula.

Sa ou tali atu, “Ioe, o le a ou tausisia foi lena mea.”

Ona ia fai mai lea, “Afai e te papatiso, o le a ou mautinoa o le tulaga lava lena e i ai.” Ma sa faaauau ai i lena ala i le toetoe o poloaiga uma.

Sa valaau mai lo’u uncle i lo’u tina e ta’u ia te ia e aua le popole, e le toe umi ae ou te’a ma nei lagona. Fa tausaga mulimuli ane, ina ua ou maua lo’u valaauga e auauna atu i le Misiona a Urukuei Montevideo, sa valaau atu ai lo’u tina i lo’u uncle e fesili i ai po o a fea tonu o le a te’a ai a’u ma nei lagona uma. O le mea moni e mai le taimi sa papatisoina ai a’u, sa avea lo’u tina ma se tina fiafia atu.

Sa ou iloa sa taua le Tusi a Mamona i le faagasologa o le liuaina e ala i le muai tofo i le folafolaga e faapea “o le a latalata atu ai se tagata i le Atua e ala i le usitaia o ona mataupu.”⁶

Sa faamalamalama mai e Nifae le faamoemoega autu o le Tusi a Mamona i le ala lenei:

“Ona ua matou galulue maelega e tusia nei mea, e faatauanau atu ai ia matou fanau, ma o matou uso foi, ia talitonu ia Keriso, ma ia faalelei ma le Atua. …

“Ma [o lea] matou [te] tautalatala [ai] e uiga ia Keriso, ua matou olioli ia Keriso, ua matou talai atu Keriso, [ma] ua matou vavalo e uiga ia Keriso, … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”⁷

O le Tusi a Mamona atoa ua faatumulia i lena lava faamoemoega paia e tasi.

Mo lenei mafuaaga, soo se tagata faitau lava e tautino atu i se suesuega faamaoni e uiga i ai, faatasi ma se agaga o le tatalo, e le gata o le a aoao e uiga ia Keriso ae o le a aoao mai ia Keriso—aemaise lava pe a latou faia le faaiuga o le “faataitaia o le mana o le afioga”⁸ ma aua le vave teena ona o manatu faailogalanu o le le talitonu⁹ ona o mea ua ta’u mai e isi e uiga i mea latou te lei vaai lava i ai.

Sa saunoa Peresitene Russell M. Nelson: “A ou mafaufau i le Tusi a Mamona, ou te mafaufau i le upu mana. O upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.”¹⁰

O la’u valaaulia i lenei aoauli ia i tatou uma taitoatasi, e tusa lava po o le a le umi ua avea ai tatou ma se tagata o le Ekalesia, ia faataga le mana o upumoni o le Tusi a Mamona ia maua i tatou ma toe opomau i tatou ma i lea aso ma lea aso a o tatou saili atu ma le filiga mo faaaliga faaletagata lava ia. O le a ia faia pe a tatou faatagaina.

Ou te molimau atu ma le faamaoni o loo i ai i le Tusi a Mamona le atoaga o le talalelei a Iesu Keriso ma o le a faamautu mai e le Agaga Paia lona moni i lea taimi ma lea taimi i soo se tasi o e, faatasi ma se loto faamaoni, e saili atu i le malamalama e oo i le faaolataga o o latou agaga.¹¹ I le suafa o Iesu Keriso, amene.