Toʻo Kongokonga Lalahi mei he Konifelenisi Lahi Fakavaeuataʻu Hono 190
ʻI he lotolotonga ʻo e taʻepaú, naʻe maʻu ʻe ha kakai ʻe laui miliona ha mōmeniti ʻo e nonga lolotonga e konifelenisi lahi ne fakahoko ʻi he ʻaho 3–4 ʻo ʻOkatopa 2020. Naʻe tākiekina kitautolu ʻe he kau taki ʻo e Siasí kia Sīsū Kalaisi ʻaki ha ngaahi pōpoaki ʻo e uouangatahá mo e ʻofá, ʻamanaki leleí mo e fakamoʻuí, pea mo e nonga ʻi he taumuʻa fakalangí.
Na‘e akoʻi mai ʻe Palesiteni Lāsolo M. Nalesoni ʻa e founga ke tau maʻu ai e ngaahi tāpuaki ʻo e hoko ko e kakai ʻo e ʻOtuá.
“ʻI hoʻo fili ko ia ke tuku ke lāngilangiʻia ʻa e ʻOtuá ʻi hoʻo moʻuí, te ke aʻusia ʻiate koe pē ko hotau ʻOtuá ko ʻha ʻOtua ʻo e ngaahi mana’ [Molomona 9:11].” —Palesiteni Russell M. Nelson (vakai ki he peesi 92)
Naʻe lea ha kau lea tokolahi ʻo kau ki he tupulaki fakataautaha ʻo fakafou ʻi he muimui kia Sīsū Kalaisí, falala kiate Iá, mo e fakavaivaiʻi hotau lotó ki Hono finangaló.
“‘I heʻetau tafoki loto-fakatōkilalo [kia Sīsū Kalaisí], te Ne fakalahi ʻa ʻetau malava ke liliú.” —Becky Craven (vakai ki he peesi 58)
Naʻe ʻi ai e kaunga ʻa e kolonavailasi foʻoú ki he meʻa naʻa tau mamata mo fanongo ai ʻi he konifelenisí. Ka neongo ia, naʻe toe ʻomi ʻe he aʻusia lahi angé ha fakakaukau lahi ange ʻi he ʻikai ngata pē ʻa e nofotaha e kau leá ʻi he ʻamanaki leleí ka ʻi ha mahino lahi ange ki he palani ʻa e ʻOtuá ki heʻetau fiefia taʻengatá.
“[ʻOku] hoko ʻa e ngaahi sivi ʻi he moʻui fakamatelié ko ha konga mahuʻinga ʻo ʻetau fakalakalaka taʻengatá. … ʻOku ou lotua ʻoku tau ako … ʻa e ngaahi lēsoni mahuʻinga ko ia ko e ngaahi aʻusia faingataʻá pē ʻokú ne toki akoʻi kitautolú.” —ʻEletā David A. Bednar (vakai ki he peesi 8)
ʻI hono uesia ʻe he moveuveu fakasōsialé ʻa e ngaahi feituʻu lahi ʻo e māmaní, naʻe fakahalaiaʻi ʻe he kau takí ʻa e laulanú mo e fetāʻakí. Na‘a nau kole mai kiate kitautolu ko e Kāingalotú ke tau hoko ʻo taha ʻi he anga māʻoniʻoni, feinga ke faaitaha ʻi he ngaahi faikehekehé, pea tokoni ke langa ha sōsaieti angatonu mo ʻofa.
“ʻOku tau moʻui ʻi ha taimi ʻoku fuʻu mālohi ai e ngaahi ʻā vahevahé. … ʻE lava ke tau hoko ko ha mālohi lahi ke langaki hake mo tāpuekina kotoa ʻa e sōsaietí.” —ʻEletā Quentin L. Cook (vakai ki he peesi 18)
ʻI hoʻo toe fakamanatu ʻa e konifelenisí ʻi he makasini ko ʻení, ʻoku mau fakatauange te ke toe aʻusia ʻa e ʻamanaki lelei mo e ongo fakalaumālie naʻá ke fuofua ongoʻí, pehē ki hoʻo maʻu ha ngaahi fakakaukau foʻou ʻi hoʻo ako he ngaahi māhina ka hoko maí.