Fakamatala fekau‘aki mo e Ouau ʻo e Temipalé

Na‘e tuku mai ʻe he Kau Palesitenisī ʻUluakí ʻa e pōpoaki ko ʻení ʻi he ʻaho 20 ʻo Siulai 2020, ʻo fekauʻaki mo e ngaahi liliu ki he ouau ʻenitaumeni fakatemipalé:

“Ko e ngaahi akonaki, ngaahi talaʻofa, mo e ngaahi ouau toputapu ʻo e temipalé naʻe kamata ia mei he kuongamuʻá, pea ʻoku tākiekina ai e fānau ʻa e ʻOtuá kiate Ia ʻi heʻenau fakahoko ha ngaahi fuakava lahi ange mo ako lahi ange kau ki Heʻene palaní, ʻo kau ai e fatongia ʻo e Fakamoʻui ko Sīsū Kalaisí.

“Fakafou ʻi he tataki fakalaumālié, kuo tuʻo lahi e liliu ʻa e ngaahi founga fakahinohino ʻi he aʻusia he temipalé, ʻo aʻu mai pē kimuí ni mai, ke tokoni ke mahino lelei ange ki he kāingalotú mo nau moʻui ʻaki e meʻa ʻoku nau ako ʻi he temipalé.

“‘Oku kau ʻi he konga ʻo e aʻusia ʻi he temipalé ʻa hono fakahoko e ngaahi fuakava pe ngaahi palōmesi toputapu ki he ʻOtuá. ʻOku maheni ʻa e kakai tokolahi mo e ngāue fakataipe ʻoku fakahoko fakataha mo e ngaahi fuakava fakalotú (ʻo hangē ko e lotú, ko e fakauku ha tokotaha ʻi he papitaisó, pe ko e piki nima lolotonga ha ouau malí). ‘Oku fakahoko fakataha ha ngaahi founga fakataipe faingofua tatau ʻi hono fakahoko ʻo e ngaahi fuakava fakatemipalé.

“ʻI he hohaʻa ki he kakai kotoa pē pea mo ha holi ke fakalahi e aʻusia ako ʻi he temipalé, kuo fakamafaiʻi ai ha ngaahi liliu kimuí ni ki he ouau ʻenitaumeni fakatemipalé. Koe‘uhí ko e tuʻunga toputapu ʻo e ngaahi ouau fakatemipalé, ʻoku mau kole ki hotau kāingalotú mo e ngaahi kaungāmeʻá ke ʻoua te nau kau ʻi he fakamahamahalo pe aleaʻi ʻa e ngaahi liliú ni ʻi he kakaí. Ka ‘oku mau fakaafeʻi e kāingalotu ʻo e Siasí ke nau hokohoko atu ke hanganaki ki he ʻaho te nau lava ai ʻo foki pea toe kau kakato ki he ngāue fakatemipale toputapú ʻi he faʻa lotu mo e loto houngaʻia.”