Fakamatala Fakamuimuitaha ki hono Fakaleleiʻi ʻo e Himí

‘I Sune ʻo e 2018, naʻe fanongonongo ai ha fakalelei ki he himi ʻa e Siasí mo e tohi hiva ʻa e fānaú, fakataha mo ha kole ke ʻomi ha fakamatala tokoni mei he mēmipá ʻo fekauʻaki mo e hiva toputapú pea mo ha ui ke fakahū mai ʻe he mēmipá ha ngaahi himi motuʻa, ngaahi hiva, mo e fakalea. Na‘e tali ʻe ha kāingalotu ʻe meimei 50,000 ki ha savea fekauʻaki mo ʻetau hiva toputapu lolotongá. Na‘e vahevahe foki ʻe he niʻihi ne kau ki aí ʻa ʻenau ngaahi ongo fekauʻaki mo e ngaahi hiva ne filifili mei he ngaahi tui fakalotu kehé ʻa ia ʻoku kei fakakaukauʻi ke fakakau ai.

Na‘e maʻu ha ʻū hiva ʻe 16,000 tupu mei he kāingalotu ʻi he ngaahi fonua ʻe 66. ʻOku lolotonga toutou vakaiʻi ʻa e ngaahi himi mo e ngaahi hiva motuʻa ko ʻení ʻe ha kulupu ʻo ha kāingalotu mohu talēniti fakavahaʻapuleʻanga pea mo e ngaahi kōmiti fakaleleiʻi ʻi he hetikuota ʻo e Siasí.

‘Oku houngaʻia ʻa e ngaahi kōmití ki he kāingalotu he funga ʻo e māmaní ʻi hono foaki honau taimí mo e talēnití ke tokoniʻi e niʻihi kehé ke nau ofi ange ki he Fakamoʻuí ʻo fakafou he hiva toputapú. ʻI hono vakaiʻi fakalelei ʻa e ngaahi fokotuʻu ne fakahū maí, ʻoku ʻi ai e ʻamanaki ʻe lava ʻo maʻu ʻa e ngaahi fokotuʻutuʻu foʻoú ʻi ha ngaahi taʻu lahi mei heni.