Polokalama ‘Initaneti Maʻá e Ngaahi Lisi ʻo e Lotu ‘i he Temipalé

Kuo fa‘u ha polokalama ʻi he ʻinitanetí ke lava ai ʻa e kāingalotú ʻo ‘ave ki he temipalé ha ngaahi hingoa ʻo e fāmili pe ngaahi kaungāme‘a ko e taumuʻa ke fakahū ‘a e ngaahi hingoa ko iá ki he lisi ʻo e lotú. ʻE lava ʻo fakahoko he taimí ni ʻa e ngaahi kole ke fakahū ha hingoa ki he lisi ʻo e lotu ʻa e temipalé ʻaki e ʻaʻahi ki he peesi fakamatala ʻo ha faʻahinga temipale pē ʻi he ChurchofJesusChrist.org/temples pea lomiʻi ʻi he fehokotakiʻanga ki he lisi ʻo e lotú. ʻE lava foki ke fakahoko ‘a e ngaahi kolé ʻo fakafou ‘i he konga ʻo e Ngaahi Temipalé ‘i he mobile app Member Tools. ‘I he taimi pē ʻoku fakahū ai ʻa e ngaahi hingoá, ʻe ‘ave kinautolu ki he temipale ko iá (pe ki he temipale ofi taha ʻoku ngāué).

ʻOku lotua ʻe he kāingalotu ʻi he ngaahi tui fakalotu lahi honau ngaahi ʻofaʻanga mo e niʻihi kehe ʻoku fepaki mo e mahamahakí pe ngaahi faingataʻa kehe. ‘Oku fakamatalaʻi ʻe he folofolá ʻa e ngaahi sīpinga ʻo e taimi naʻe lotu ai ʻa Sīsū Kalaisi ʻi ha ngaahi kulupu mo naʻinaʻi foki kiate kinautolu naʻe ʻi aí ke nau lotu. ʻOku fakahoko ʻa e founga tatau ko ʻení ʻi he temipalé, ʻa ia ʻoku fakataha mai ai e kāingalotú ʻi he tui mo e lotu, ʻo kole ki he ʻOtuá ke faitāpuekina ʻa e niʻihi fakafoʻituitui ʻi he ngaahi lisi ʻo e lotú.