Pīsope L. Todd Budge
Tokoni Ua ʻi he Kau Pīsopeliki Pulé
Hili e hoko ʻa Pīsope L. Todd Budge ʻi he māhina ʻe 18 ko ha Fitungofulu Taki Māʻolunga, kuo hikinimaʻi ia ko e Tokoni Ua ʻi he Kau Pīsopeliki Pulé. ʻOkú ne fetongi ʻa Pīsope Dean M. Davies, ʻa ia kuo uiuiʻi ko ha Fitungofulu Taki Māʻolunga.
Naʻe ʻosi ʻa Pīsope Budge mei he ʻUnivēsiti Pilikihami ʻIongí ʻi he 1984 mo hono mataʻitohi BA ʻi he ʻekonōmiká. Naʻá ne ngāue ʻi he Bain & Company Japan; Citibank, N.A.; mo e GE Capital ʻi Siapani mo ʻAtalanitā, Siōsiā, USA. Naʻá ne hoko ko e palesiteni mo e ʻōfisa pule ki he Tokyo Star Bank Limited ʻi he 2003, ʻo ne hoko ai ko e sea ki he poate ʻa e pangikeé mei he 2008 ki he 2011. Na‘á ne hoko foki ko ha mēmipa ʻi he poate ʻo e kau talēkita ʻi he Kautaha Vakapuna Hawaiian.
Ne ʻi ai ha taimi ʻi he moʻui ʻa Pīsope Budge, lolotonga ʻene fakakaukau ke liliu ʻene ngāue maʻuʻanga moʻuí, naʻá ne maʻu ai ha faleʻi mahuʻinga. Naʻe fakahā ange ʻe ha tokotaha faifaleʻi kiate ia, “ʻOku tau fiemaʻu ha kakai faitotonu ʻi he pisinisí,” mo tānaki ange ʻe hanga ʻe heʻene ngāue maʻuʻanga moʻuí ʻo ʻoange ha ngaahi faingamālie lahi ke ne faleʻi mo tokoniʻi ai e kakaí.
Ko hono moʻoní, naʻe maʻu moʻoni ʻe Pīsope Budge ha ngaahi faingamālie lahi ʻi heʻene ngāue maʻuʻanga moʻuí ke hoko ai ko ha tākiekina ki he leleí ʻi he malaʻe ʻo e pisinisí, kau ai hono fakaava e ngaahi matapā ke vahevahe ʻa e ongoongoleleí ʻi Siapani, ʻa ia naʻá ne ngāue ai kimuʻa ko ha faifekau ʻi he Misiona Siapani Fukuoká. Na‘á ne hoko kimui ange ko e palesiteni ʻo e Misiona Siapani Tokioó.
Kuó ne akoʻi ʻo pehē, “Ko e ongoongo fakafiefia ʻo e ongoongoleleí ʻoku ʻikai ko ha talaʻofa ʻo ha moʻui ʻoku hao mei he mamahí mo e ʻahiʻahí ka ko ha moʻui ʻoku ʻi ai hono taumuʻa pea ʻuhingamālie—ko ha moʻui ʻe lava ai hotau ngaahi mamahí mo e faingataʻaʻiá ʻo ʻmole atu … ʻi he fiefia ʻa Kalaisí’ [ ʻAlamā 31:38].”1
Na‘e fanauʻi ʻa Lōleni Toti Pasi ʻi he ʻaho 29 ʻo Tīsema 1959, ʻi Pitisipeeki, Kalefōnia, USA. Naʻá ne fetaulaki mo Loli Kapena lolotonga hono taʻu ʻuluaki ʻi he ʻUnivēsiti Pilikihami ʻIongí. Naʻá na mali ʻi he 1981 ʻi he Temipale Lōkani ʻIutā. Ko ha ongomātuʻa kinaua ki ha fānau ʻe toko ono.
Kimu‘a pea uiuiʻi ʻa Pīsope Budge ko ha Fitungofulu Taki Māʻolungá, naʻá ne hoko ko ha Fitungofulu Fakaʻēlia, palesiteni fakasiteiki, sekelitali pule fakasiteiki, palesiteni ʻo e Kau Talavoú he siteikí, pīsope, mo e palesiteni ʻo e kōlomu ʻo e kaumātuʻá.