Ngaahi Tefitoʻi Meʻa Mahuʻinga ʻo e Ongoongoleleí
Kuo Folofola Mai ʻa Sīsū Kalaisi Ke Tau Maʻu ʻa e Sākalamēnití
ʻOku fakamaʻa mo fakamoʻui ʻa kitautolu ʻi heʻetau manatua ʻa hotau Fakamoʻuí ʻi he uike kotoa pē.
The Last Supper (Ko e ʻOhomohe Fakaʻosí), tā fakatātaaʻi ʻe Carl Heinrich Bloch; ʻīmisi ʻo e finemui ʻoku lotú tā ʻa Angela Suitter; Prayer at Gethsemane (Lotu ʻi Ketisemaní), tā fakatātaaʻi ʻe Del Parson; ʻOku Mou Manatu Maʻu Ai Pē Kiate Au, tā fakatātaaʻi ʻe Gary L. Kapp, ʻoua naʻa hiki hano tatau
Kimuʻa pea pekia ʻa Sīsū Kalaisí, naʻá Ne taumafa fakaʻosi ʻa ia ʻoku ui ko e ʻOhomohe Fakaʻosí. ʻI he ʻosi ʻa e maʻu meʻatokoni ko ʻení, naʻá Ne fakafeʻiloaki ʻa e sākalamēnití ki Heʻene kau muimuí. Naʻá Ne pakipaki e maá pea tāpuakiʻi ia. Naʻá Ne folofola ange, “Fai ʻeni ʻi he fakamanatu kiate au” (Luke 22:19). Hili iá, naʻá Ne tāpuakiʻi mo tufaki ha ipu uaine.
Konga ʻo e Moihū Fakauiké
ʻI he taimi naʻe fakafoki mai ai e Siasi ʻo Sīsū Kalaisí ki he māmaní, naʻe hoko ʻa e sākalamēnití ko ha konga ia ʻo e moihū fakauiké. Lolotonga ʻa e lotú, ʻoku tāpuakiʻi pea tufaki ʻa e sākalamēnití ʻe kinautolu ʻoku nau maʻu ʻa e lakanga fakataulaʻeikí. ʻOku nau lotu ʻo fakaʻaongaʻi e ngaahi lea mei he folofolá (vakai, Tokāteline mo e Ngaahi Fuakava 20:75–79). Pea ʻoku kai leva ʻe he tokotaha kotoa pē ʻi he haʻofangá ʻa e maá pea inu ʻa e vaí ke fakamanatu ʻa Sīsū Kalaisi mo ʻEne feilaulau maʻatautolú, ʻi he founga naʻá Ne kole mai ke tau fakahokó.
Teuteu ke Maʻú
Ko e teuteu ke maʻu ʻa e sākalamēnití, ʻoku totonu ke tau fakakaukau moʻoni ki heʻetau tōʻonga moʻuí mo e ngaahi filí. ʻOku totonu ke tau fakatomala mei he ngaahi fehalaaki mo e angahala ʻo e uike kuo mahili atú, kau ai mo hono kolea ha fakamolemole mei he ʻOtuá. ‘Oku ʻikai fie maʻu ia ke tau haohaoa kae toki maʻu ʻa e sākalamēnití, ka ʻoku totonu ke tau loto-fakatōkilalo.
Mahulu Hake ʻi he Maá mo e Vaí
Ko hono maʻu ʻo e sākalamēnití ko ha taimi toputapu mo māʻoniʻoni ia. ʻOku fakamanatu mai ʻe he lotu tāpuakiʻi ʻo e sākalamēnití ko e taimi ʻoku tau maʻu ai ʻa e maá mo e vaí, ʻoku tau manatu ai ki he sino mo e taʻataʻa naʻe foaki ʻe Sīsū Kalaisi maʻatautolú. ʻOku tau palōmesi ke muimui kiate Ia mo moʻui ʻi ha moʻui ʻoku faka-Kalisitiane. ʻOku tau palōmesi ke feinga ke tauhi e ngaahi fekau ʻa e ʻOtuá. Ko hono olá, ʻe hanga ʻe he Laumālie Māʻoniʻoní ʻo fakafiemālieʻi, tataki mo fakamoʻui kitautolu.
Fakafoʻou e Ngaahi Fuakavá
Ko e taimi ʻoku maʻu ai ʻe kitautolu kuo papitaisó ʻa e sākalamēnití ʻi he loto maʻá, ʻoku tau fakafoʻou ʻa e fuakava ne tau fakahoko ʻi he papitaisó. ʻOku kau heni ʻa hono maʻu ʻo e Laumālie Māʻoniʻoní mo hono fakamaʻa mei he angahalá ʻo hangē pē ʻoku toe papitaiso foʻou kitautolú. Ko e ʻamanaki lelei mo e ʻaloʻofa ʻeni ʻoku ʻomi ʻe Sīsū maʻá e taha kotoa pē. ʻOku ʻikai teitei tōmui ke fakatomala pea fakamolemoleʻi.
Ko e Hā e Fakamatala ʻa e Folofolá fekauʻaki mo e Sākalamēnití?
ʻOku totonu ke tau sivisiviʻi fakalaumālie kitautolu, pea fakakaukauloto moʻoni kimuʻa pea toki maʻu ʻa e sākalamēnití (vakai, 1 Kolinitō 11:28).
Hili e Toetuʻu ʻa Sīsuú, naʻá Ne fakahā ki Hono kakai ʻi he ongo ʻAmeliká ʻa e founga ke maʻu ai ʻa e sākalamēnití (vakai, 3 Nīfai 18).
Kuo enginaki mai ʻe he kau pālofita ʻo onopōní ke tau ngāue ʻaki ʻa e maá mo e vaí ki he sākalamēnití, ka ko e meʻa ʻoku tau kai pe inú ʻoku ʻikai fuʻu mahuʻinga ia (vakai, Tokāteline mo e Ngaahi Fuakava 27:2). Ko e taimi ʻe niʻihi, ʻoku fie maʻu ʻe ha niʻihi ʻoku ʻikai sai ki ha niʻihi ʻo e meʻakaí, ke fakaʻaongaʻi ha meʻakai ʻoku meimei tatau mo e maá.