Ko Ha Fakatovave ki he Houalotu Sākalamēnití
Ne u fakakaukau kuo mau toe tōmui pē ki he sākalamēnití.
Laʻitā mei he Getty Images
ʻI heʻema hiki mei he ʻIunaiteti Siteití ki Vietinemí, ne u fakapapau mo hoku husepānití he ʻikai te ma teitei liʻaki lotu. Hili ha taʻu ʻe taha, naʻe teʻeki ke ma liʻaki tuʻo taha ha Sāpate, ka naʻá ma faʻa tōmui pea ʻikai faʻa maʻu e sākalamēnití. Naʻe kamata ʻemau houalotu sākalamēniti ‘i he 8:30 pongipongi. ʻI heʻema maʻu ha fānau iiki ʻe toko tolú, ne faʻa hangē ʻa e teuteu taimi totonu ia ki he lotú ka ngali taʻemalavá.
Ne fie maʻu ke mau fili fakafāmili ke mau aʻu kei taimi maʻu pē ki he lotú mo maʻu ʻa e sākalamēnití. Ko ha ngāue faingataʻa ia, ka naʻa mau aʻu taimi totonu ki he lotú ʻi ha Sāpate hokohoko ʻe fā. Ne u fakatokangaʻi e faikehekehe ʻo e feinga ne mau fakahokó. Ne lahi ange e ngaahi aʻusia fakalaumālie ne mau maʻu lolotonga ʻa e uiké.
Ka neongo ia, ne tōmui ʻemau ʻā hake ʻi he Sāpate hono hokó. Kuo ʻosi 7:30 a.m. Naʻá ku talaange ki hoku husepānití naʻe ʻikai ha toe ʻamanaki lelei, ka naʻá ku fakakaukau ki he founga te mau mohu tāpuekina ai kapau te mau fai homau lelei tahá ke mau teuteu pē. Ko ia, naʻa mau fakavave leva!
ʻI he taimi naʻa mau aʻu atu ai ki he lotú, kuo mau tōmui ʻaki e miniti ʻe 20. Naʻá ku ongoʻi kuo mau tōnounou. Ne mau fanongo ki ha hiva ʻi heʻemau hū atú, pea ʻi heʻeku fakaava e matapaá, naʻe lue ha tokotaha ki he tuʻunga malangá ke lotu.
“Ko e himi kamata ē?” Ko ʻeku fanafana atu ki he faifekau naʻe tuʻu he veʻe matapaá.
Naʻá ne tali mai, “ʻIo. Ne mau kamata tōmui he ʻahó ni.”
Ne u fuʻu ʻohovale. Ne u fakakaukau kuo mau toe tōmui pē, ka ne taimi tonu pē ʻemau aʻu ki he lotú! Naʻe tafe ʻa e loʻimatá ʻi hoku fofongá ʻi heʻeku ongoʻi e ʻofa ʻa e Tamai Hēvaní ki hoku kiʻi fāmilí mo aú.
Naʻa mau toki ʻilo kimui ko e taimi ne aʻu atu ai e kau faifekaú ki falelotu he Sāpate ko iá, ne nau toki fakatokangaʻi ne ʻikai ha taha ne haʻu mo ha mā ki he sākalamēnití. Naʻe ʻikai ha falekoloa ʻe ofi mai, pea ʻoku faʻa faingataʻa ke maʻu ha mā ʻi Vietinemi. Hili ha taimi siʻi ʻo ʻenau hohaʻá, ne manatuʻi ʻe he ongo faifekaú ne ʻi ai ha mā ʻi hona ʻapí.
ʻI he ngaahi ʻaho siʻi kimuʻa atú, naʻe omi e ongo ʻeletaá ki homau ʻapí ke maʻu meʻatokoni efiafi. ʻI he efiafi ko iá, ne u taʻo ai ha mā maʻanaua. Naʻe tōmui e kamata ʻa e lotú he pongipongi Sāpaté he naʻe lele ʻa e ongo ʻeletaá ki hona ʻapí ke ʻomi e mā ne u taʻo maʻanauá!
ʻOku ʻafio‘i ʻe he ʻOtuá ʻa ʻetau ngaahi ngāue ke faifeinga ke tauhi ʻEne ngaahi fekaú. Neongo ʻoku tau faʻa tōnounou, ka ʻokú Ne ʻofaʻi kitautolu pea te Ne teuteuʻi ha ngaahi founga maʻatautolu ke tau lavameʻa ai—ʻo aʻu pē ki he taimi ke tau maʻu ai e taimi lotú.