“ʻOku Ou Fie ʻAlu ki Palataisi”
ʻI he taimi naʻá ku lotu mo kole ai ki he ʻOtuá fekauʻaki mo e tōʻonga moʻui foʻou ko ʻení, naʻá ku ongoʻi fakapapau ange ki he moʻoni kuó u maʻú.
Laʻitā mei he Getty Images, fakatātaaʻi ʻe ha kau mōtolo.
Ne u hoko ko ha mēmipa mateaki ʻo ha tui fakalotu ʻe taha, ka naʻe kamata ke u ako ʻa hono ngaahi akonaki fekauʻaki mo e pulekatolió. ʻOku ʻakoʻi ʻe he fakakaukau ko ʻení ʻoku hū ʻa e laumālié, hili ʻa e mate fakatuʻasinó, ki ha feituʻu ʻoku tatau mo ha fale fakapōpulá, ʻa ia kuo pau ke fakahaohaoaʻi ai kimuʻa pea toki ʻalu ki palataisí.
ʻI heʻeku fakakaukau ki he mamahi ʻa e ngaahi laumālié ʻi pulekatolió, naʻá ku fakakaukauloto ki hoku kahaʻu fakalaumālié pea mo hoku vā mo Sīsū Kalaisí. Naʻe kamata ke u lotu, “Ko e hā ha meʻa kuo pau ke u fai ke u mavahe ai mei pulekatolió? ʻOku ou fie ʻalu ki palataisi.”
Ko e ʻuluaki meʻa ne haʻu ki heʻeku fakakaukaú ko e moʻui ʻaki e Ngaahi Fekau ʻe Hongofulú. Naʻá ku ongoʻi kapau te u fai ia, ʻe lava ʻe he ʻaloʻofa ʻa e ʻEikí ke tokoniʻi au ke u hao mei pulekatolió. Naʻá ku tukupā ke tauhi e ngaahi fekaú pea kamata ha vahaʻataimi fakamātoato ʻo e ʻaukai, lotu, ako ʻa e folofolá, mo fakalaulauloto.
Lolotonga e taimi ko ʻení, naʻá ku ongoʻi naʻe ueʻi au ke ʻeke ha fehuʻi taʻeʻamanekina kau ki ha toketā ʻi he kilīniki naʻá ku ngāue ai ko ha ʻakauniteni pulé.
Ne u pehē ange, “Toketā Taipaoti, ʻoku ʻi homou siasí ʻa e ʻEiki ko Sīsū Kalaisí?”
Naʻá ne talamai ʻokú ne kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe talu mei he taimi ko iá mo hono tataki ʻe he Laumālie ʻa ʻema fealeaʻakí. Naʻá ku fehuʻi kiate ia fekauʻaki mo e ngaahi faikehekehe ʻi hono siasí mo haʻakú. Naʻá ne fakamatala mai kau ki he Tohi ʻa Molomoná. ʻI he hoko atu ʻema talanoá, naʻá ku ongoʻi ha fiefia lahi. Naʻá ku ongoʻi ne u maʻu ʻa e tali ki heʻeku ngaahi lotú.
Hili ha ʻaho ʻe ua mei ai naʻe ʻomi ʻe he ongo faifekaú ha Tohi ʻa Molomona kiate au, ʻa ia naʻá ku lau mo ako fakataha mo kinaua. Naʻá ku ʻiloʻi ʻa hono fakaofo ke ako ha ngaahi meʻa foʻou mei he folofolá. Naʻe kamata ke u tauhi ʻa e Lea ʻo e Potó.
ʻI he taimi ne u fakatokangaʻi ai kuo ʻikai ke u toe fie kau ki hoku siasí, ʻa ia naʻá ku kau kāivi ki aí, naʻá ku fifili pe ko e hā nai e meʻa ʻoku hokó. Naʻá ku lotu ʻo kole ki he ʻOtuá fekauʻaki mo e tōʻonga moʻui foʻou ko ʻení. ʻI heʻeku fai iá, naʻá ku ongoʻi fakapapau ange ki he moʻoni kuó u maʻú. Naʻá ku fakakaukau ke kau ki he Siasí, neongo ne u ʻiloʻi ʻe fakatangaʻi au.
Naʻe hoko mai ʻa e fakatangá, ka naʻe fakamālohia au ʻe he ʻEikí. ʻOku ou ʻilo ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha tali ia ki heʻeku lotu fakamātoato: “ʻOku ou fie ʻalu ki palataisi.” ʻOku ou ʻilo te u lava ʻo ʻalu ki ai hili ʻeku maté, kapau te u tauhi faivelenga ʻa e ngaahi fekau ʻa e ʻOtuá.