Fakaʻilekitulōnika Pē: Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Tataki ʻe he ʻEikí
ʻOku ʻafioʻi kitautolu ʻe he ʻEikí mo e meʻa ʻoku totonu maʻatautolu he taimi ní.
Faitaaʻi ʻe Cody Bell
Sīseli
Kimuʻa peá ma malí, naʻe ako ʻa ʻOnitelea ke maʻu hono PhD pea naʻá ne maʻu ha ngāue ʻi he ʻUnivēsiti ʻo Misikení. Naʻá ma mali pea ma hiki ki Misikeni. Ne faifai pea kamata ke ʻi ai ha ngaahi palopalema he ngāue ʻa ʻOniteleá pea fie maʻu ai ke liliu ki ha ngāue ʻe taha.
Naʻá ma kei talavou, ne ma toki mali pē, pea naʻe ʻikai ke ma ʻiloʻi ʻa e meʻa ke faí. Ne ma pehē ke ma lotua ia.
ʻOnitelea
ʻI ha ʻaho ʻe taha, naʻá ku ʻalu ki he ʻunivēsití ʻo sio ʻi ha papa ne hiki ai e ngaahi ngāue ʻataá. Naʻá ku tohi kole ai ki ha ngāue kehekehe ʻe tolu. ʻI ha uike pē ʻe taha, naʻe tali mai ke u ngāue ʻi he ngāue kotoa ko ʻeni ʻe tolú.
Sīseli
Ne ma fifili pē ko e hā e meʻa te ma faí. Ne ma toe lotu pē. Naʻe ʻi ʻIngilani ha ngāue ʻe taha, ka ne ma fie nofo pē ʻi he ʻIunaiteti Siteití. Ko e taha naʻe ʻi Tekisisi, pea ko e ngāue ʻe tahá naʻe ʻi Melileni ofi ki Uāsingatoni, D.C. Ko e ngāue ʻi Meliení ko e ngāue ʻi he NASA. Ko ha tangata saienisi ʻa ʻOnitelea ko ia naʻe ngalingali ko ha feituʻu lelei ia ke ne ʻalu ki ai.
ʻOnitelea
ʻI heʻema hiki ki Melilení, naʻá ku fakaʻuli kae mohe ʻa Sīseli. Naʻe kei hengihengi pē ʻi he taimi naʻá ku sio ai ki he Temipale Washington D.C.
“ʻĀ hake! ʻĀ hake! ʻOkú ke lava ʻo sio ki ai?” Ko au ia kia Sīseli. “ʻOku hangē ha kāsoló!”
Sīseli
Naʻá ku talaange kia ʻOnitelea ʻe lava pē ke ma ʻaʻahi ki ai ha ʻaho. Naʻe ʻikai te ma ʻilo pe ko e hā ia. Hili ha ngaahi ʻaho siʻi mei heʻema aʻu ki Melilení, naʻá ku ʻalu ki he laipelí ke fakaʻaongaʻi e initanetí ke kumi ha ngāue mo vakai ʻeku ʻīmeilí.
Naʻe fanongo ha fefine ʻoku ngāue ai ki he anga e tō ʻeku leá peá ne ʻeke mai pe ko ʻeku haʻú mei fē. Naʻá ku talaange ko ʻeku haʻú mei Palāsila pea naʻe kamata ke ma talanoa. Ko hono hingoá ko ʻEtinā. Naʻá ku talaange naʻá ma toki hiki mai mei Misikeni pea talaange mo e feituʻu ʻokú ma nofo aí.
Ne pehē mai ʻe ʻEtinā, “ʻOku ou nofo ʻi he fale nofo totongi tatau.”
ʻI he taimi ne u foki ai ki he laipelí ʻi he ʻaho hono hokó, ne pehē mai ʻe ʻEtinā, “ʻOku ou fiefia hoʻo toe ʻasi maí. ʻOku ou fie fakaafeʻi koe mo ho husepāniti ki hoku ʻapí ke tau maʻu meʻatokoni efiafi.”
Naʻá ku fakakaukau ʻoku ngali kehe koeʻuhí he naʻe ʻikai te ne ʻiloʻi au. Naʻá ne pehē mai leva, “Naʻá ku lotua koe he koeʻuhí naʻá ku ongoʻi ha meʻa ne matuʻaki makehe he taimi ne u feʻiloaki ai mo koe ʻaneafí.”
Naʻá ma ō ki hono ʻapí pea ʻiloʻi naʻe toki pekia atu pē hono husepānití. Hili e kai efiafí, naʻá ne tā ʻi he pianó ʻa e, “ʻEiki, Te U Muimui Atu,” (Ngaahi Himi, fika 127). Naʻá ne talamai ko e himi ia ne manako ai ʻa hono husepānití pea naʻe tā ia ʻi heʻene meʻafakaʻeikí. Naʻá ne fakamatala mai leva kiate kimaua fekauʻaki mo e palani ʻo e fakamoʻuí peá ne fakaafeʻi kimaua ke mau ō ʻo lotu.
Ne mau ō ki he lotú pea naʻe talitali lelei kimaua ʻe he kakai naʻe ʻi aí. Naʻá ma fakakaukau ke mau ō he Sapate hono hokó. Ne ma loto ke fanongo ki he ngaahi lēsoni fakafaifekaú. Naʻe loto ʻa ʻEtinā ke fakahoko e ngaahi lesoní ʻi hono ʻapí. Naʻá ma ō ki he lotú he Sāpate kotoa ʻi ha māhina ʻe nima. Naʻe teuteuʻi homa lotó mo e laumālié ki he papitaisó.
ʻOnitelea
ʻI he taimi naʻe fanongonongo ai homa papitaisó, naʻe mataʻi ʻohovale ʻa e tokotaha kotoa. Ne nau pehē mai, “He ʻoku ʻikai ke mo siasi kimoua? Ka ʻokú mo maʻulotu pē he uike kotoa!” Naʻe makehe homa papitaisó. Naʻe meimei ke ʻi ai kotoa ʻa e kāingalotu ʻo e uōtí.
Hili ha taʻu ʻe taha mei ai naʻe silaʻi kimaua ʻi he Temipale Washington D.C. ʻI heʻema ō ki he temipalé, ne ma fakatokangaʻi ko e kāsolo ia ne ma sio ki ai he taʻu e taha kimuʻá!
Sīseli
Hili ʻema sila ʻi he temipalé, naʻe lahi e ngaahi meʻa naʻe ʻikai ngāue leleí.
Hili e ʻaho 11 ʻo Sepitema 2001, naʻe faingataʻa ke fakafoʻou ʻema visá. Naʻá ku loto-mamahi koeʻuhí he ne u toki ʻosi mei he kolisi fakakomuinitií pea tohi kole ki ha sikolasipi kakato ki he ʻUnivēsiti ʻo Melilení. Naʻe ʻikai ke u maʻu ʻa e sikolasipí, pea naʻe teu ke tāpuni mo e ngāue fakatotolo ʻa ʻOniteleá.
Ne ma fakakaukau naʻa kuo hokosia e taimi ke ma foki ai ki Palāsilá.
ʻOnitelea
Naʻe fakahā mai ʻe heʻema pīsopé te ma lava ʻo tokoni ki ha kāingalotu tokolahi ʻi Palāsila mo tupulaki ʻi ha ngaahi founga he ʻikai ke ma malava ʻo tupulaki ai ʻi he ʻIunaiteti Siteití. Naʻá ne faleʻi kimaua ke ma nofo ofi ki he Siasí.
Naʻá ne talamai, “Mo ō ki Palāsila pea ngāue maʻá e ʻEikí.”
Hili ʻema nofo ʻi Palāsila ʻi ha vahaʻataimi, ne haʻu ʻema palesiteni siteikí ki homa ʻapi nofoʻangá ʻo uiuiʻi au ke u hoko ko ha pīsope. Hangē naʻá ku ongoongoʻi pē ʻe uiuiʻi aú. ʻI ha pō ʻe ua kimuʻa pea uiuiʻi aú, naʻe ʻikai ke u lava ʻo mohe. Naʻá ku faʻa fakakaukau mo ako.
Sīseli
Ne u fifili pe ko e hā e meʻa ʻoku hokó. Naʻá ku sio ki heʻene liliú kimuʻa pea uiuiʻi iá.
ʻOnitelea
ʻI heʻeku fuofua hoko ko ha pīsopé, ne toko 80 ʻa e kāingalotu mālohi ʻi homau uōtí. ʻI he taimi naʻe tukuange ai aú, ne toe tokolahi ange e kāingalotu ne maʻulotu maʻu peé, pea ne ʻalu atu mo ha kau faifekau ʻe toko 12 ki he malaʻé mei homau uōtí. Naʻe fakafiefia ia!
Naʻe tukuange au ʻi he taimi naʻe tukuange ai ʻa Palesiteni Tieta F. ʻUkitofa mei he Kau Palesitenisī ʻUluakí. ʻOku ou manatuʻi ʻa e lea ʻa Palesiteni Lāsolo M. Nalesoni ʻo pehē ʻoku ʻi ai ha fatongia foʻou mo mahuʻinga ʻo Palesiteni ʻUkitofa ʻi he Kōlomu ʻo e Kau ʻAposetolo ʻe Toko Hongofulu Mā Uá.
Hili ha māhina ʻe tolu mei ai, naʻe ui au ko e tokoni ʻuluaki ʻi he kau palesitenisī fakamisioná. Naʻe ʻikai ke u ʻalu ʻo ngāue fakafaifekau, ka ʻoku ou saiʻia ʻi hoku uiuiʻí. ʻOku ou fakalataʻia he ngāue mo e kau faifekaú. ʻOku ʻafioʻi au ʻe he ʻEikí. Naʻá Ne ʻafioʻi naʻe fie maʻu ke tukuange au mei he pīsopé kae lava ke u ngāue ʻi he taimi mo e feituʻu totonu maʻakú.