ʻOku Fie Maʻu ʻe he Māmaní Ha Houʻeiki Fafine Faivelenga

Talu mei he ngaahi ʻuluaki ʻaho ʻa e Faʻē ko ʻIví, mo hono fakahoko ʻe he houʻeiki fafiné ha fatongia mahuʻinga ʻi hono tokoniʻi ke fakahoko e palani ʻa e ʻOtuá ki Heʻene fānaú. ʻI he māhiná ni, ʻoku tau maʻu ha faingamālie ke ako lahi ange ki ha niʻihi ʻo e houʻeiki fafine ne nau hoko ko ha kau paionia ʻi he ngaahi fuofua ʻaho ne Fakafoki Mai ai ʻa e ongoongoleleí. Hangē ko ʻení, te tau lava ʻo laukonga ʻi he peesi 25 fekauʻaki mo e loto-toʻa ʻa ʻEma Sāmitá. ʻI heʻetau ako ʻa e Tokāteline mo e Ngaahi Fuakava 25, ʻoku tau fanongo ai ki he folofola ange ʻa e ʻEikí ke ne faʻu ha tohi ʻo e ngaahi himi toputapú.

ʻOku hokohoko atu hono Fakafoki Mai ʻo e Ongoongoleleí ʻi hotau kuongá, pea ʻoku fie maʻu ʻe he māmaní ʻa e tokoni mahuʻinga ʻa e houʻeiki fafine faivelengá ʻo lahi ange ʻi ha toe taimi kimuʻa. ʻI he peesi 12, te ke lava ʻo laukonga ai ki he founga kuo mātā ai ʻe kitautolu ʻoku hoko ko e kau ʻŌfisa Māʻolunga ʻi he Siasí ʻa e ngāue ʻo e mālohi ʻo e lakanga fakataulaʻeikí ʻi heʻetau moʻuí. Ko e mālohi ko ʻeni ʻo e lakanga fakataulaʻeikí, ʻa ia ʻoku faingamālie ki he kakai tangata mo fafiné, ko e meʻa ia ʻokú ne fakangofua e ngāue ʻa e ʻOtuá ke hokohoko atu ʻi he māmaní. Te ke lava foki ʻo lau e pōpoaki meia Palesiteni M. Lāsolo Pālati ʻi he peesi 8 fekauʻaki mo e houʻeiki fafine ne nau tokoni ke tākiekina ʻene moʻuí.

ʻOku tatau ai pē pe ko e hā hotau tuʻunga tangata pe fefiné, taʻu motuʻá, matakalí, pe ngaahi tūkunga kehé, ko e fānau ʻofeina kotoa kitautolu ʻa e ʻOtuá ʻoku tau maʻu ha tofiʻa mo ha ivi malava fakalangi.

Fakaʻapaʻapa atu,

Palesiteni Joy D. Jones

Palesiteni Lahi ʻo e Palaimelí