Ko ha Fakaʻapaʻapa ki ha Puleako Semineli
ʻOku tau faʻa tāpuekina e moʻui ʻa e niʻihi kehé taʻe te tau fakatokangaʻi ia.
Laʻitā mei he Getty Images, fakatātaaʻi ʻe ha kau mōtolo.
Naʻe mahamahaki hoku husepāniti ko Seulí ʻi ha ngaahi taʻu lahi ʻi heʻene hoko ko e puleako semineli maʻá e ngaahi uooti naʻe fakataha ʻi homau ʻapisiasí. ʻOku ʻikai te u tui ʻoku ʻilo ʻe ha taha ʻa e faingataʻa kiate ia ke ne tuʻu hake ʻi he pongipongi kotoa pē—tautautefito ki he ngaahi māhina pōnonou mo mokoʻīʻī ʻo e faʻahitaʻu momokó—ke ʻalu ki homau ʻapisiasí. Hili ha taimi nounou mei ai, naʻá ne mālōlō.
ʻI he hili ha ngaahi taʻu mei he mālōlō ʻa Seulí, naʻá ku ʻohovale heʻeku maʻu ha tohi ne ongo ki hoku lotó mei ha finemui ne hiki mei homau feituʻú ʻi he ngaahi taʻu kimuʻa atú. Naʻá ne faʻo ia ʻi he tohi fakaafe ki heʻene malí. Naʻe pehē ʻe he tohí:
“Naʻá ku matuʻaki fakaʻapaʻapaʻi ho husepānití pea naʻá ku loto-mamahi ʻaupito ʻi heʻeku fanongo kuó ne siʻi pekiá. Ko e puleako semineli lelei taha ia ne mau maʻú. Ko e pongipongi kotoa pē naʻá ne tatali ʻi he veʻe matapaá ke fakaava ia mo talitali lelei ʻa e tokotaha kotoa pē. Hili e kalasí, naʻá ne toe fakaava pē ʻa e matapaá mo ne pehē, ‘ʻOfa ke mou maʻu ha ʻaho lelei ʻi he ako!’
“Naʻá ku fakapapauʻi maʻu pē ke fakamālō kiate ia mo talaange ʻemau houngaʻia ʻiate iá. Naʻá ku ongoʻi malu ange ʻi heʻene ʻi aí.
“Naʻá ne loto-fakatōkilalo maʻu pē, pea naʻe ʻiloʻi ʻe he tokotaha kotoa pē ʻa ʻene angaʻofá. ʻOku ou tui naʻe lelei ange ʻeku maʻukalasí koeʻuhí naʻe ʻikai ke u loto ke mokosia ʻa Misa Pesivini ʻi heʻene talitali mo fakakaukau ʻoku ou lolotonga fononga atu pe tōmuí. Ko ha tangata fakaofo ia pea ʻe manatua maʻu pē ia.”
ʻOku ou tui naʻe ʻikai fakakaukau ʻa Seuli ʻe ʻi ai ha taha te ne kei manatuʻi ia ʻi he hili ha ngaahi taʻu lahi. Ka naʻe kei manatuʻi ia ʻe he finemui faʻa fakakaukau ko ʻení, pea naʻá ne angaʻofa feʻunga ke ʻomi ʻa e tohi manatumelie ko ʻení kiate au, ʻa ia naʻá ku houngaʻia ke maʻú.
ʻOku kamata ʻaki ʻa e himi “Ko e Taki ki he Lelei” (fika 186) ʻa e ngaahi lea ko ʻení:
Ko e taki ki he leleí
Ke hā ai Hoʻo mēsí,
ʻA e tāpuaki mei ʻolungá
Lea mo e ngāue ʻi he ʻofá.
Naʻá ku fili ʻa e himi ko ʻení ki he meʻafakaʻeiki ʻo Seulí koeʻuhí ʻoku ou tui ʻoku tau faʻa tāpuekina e moʻui ʻa e niʻihi kehé taʻe te tau fakatokangaʻi ia. ʻOku ou ʻilo naʻe tāpuekina ʻe Seuli ha ngaahi moʻui kehekehe ʻaki ʻene angaleleí, ngāue tokoní, mo e ʻofá.