ITUKUTUKU NI VEILIUTAKI NI IWASEWASE
iVakatakila ki na Tamata Yadua—E Dua na iVakadinadina Mai Vua na Kalou, na Tamada
O ira na parofita era sega ni tamata duadua ga era rawa ni ciqoma na ivakatakila. Mai na nomu yalodina tiko, sa rawa mo ciqoma na ivakatakila me vukei iko baleta na nomu gagadre dina, ilesilesi, kei na taro eso ka me vukei iko me vaqaqacotaki na nomu ivakadinadina.1
Niu railesuva yani na 40 na yabaki noqu lewena tu mai na Lotu i Jisu Karisito ni Yalododonu Edaidai, au qoroya ka vakavinavinaka vakalevu ki na noqu ivakatakila dodonu, sa veisautaka na noqu bula mai vua na Tamaqu Vakalomalagi lomani sa yaco oti, ka se yaco tikoga ena gauna oqo, ki na noqu bula.
Au nanuma deivaki tiko na isevu ni gauna a yaco vakaidina vei au na noqu ivakatakila. Au a se yabaki 17 kina; a yaco oqo ena nodrau vale na noqu itubutubu e Suva, e Viti. Au a tiko duadua ena noqu rumu ni moce, ka wilika tiko na iVola i Momani ena gagadre dina meu kila vakai au ke dina na ivola oqo. Oqo na ibolebole rau a solia vei au na daukaulotu tudei o Elder Rian Nelson kei Elder Randy Price ni oti na nodrau lesoni baleta na parofita o Josefa Simici kei na sala a taura kina na peleti koula mai vua e dua na agilosi, ka qai vakadewataka na ivola ki na vosa Vakavalagi.
Oi rau na daukaulotu o ya a wilika na veitikina eso mai na iVola i Momani ena gauna ni neitou veituberi, ka rau a wasea na nodrau ivakadinadina e kaukauwa ka veivakararamataki. A tara sara ga na yaloqu mai loma, kau sa vinakata meu kila vakai au ga ke sa dina sara na veika rau a wasea baleta na Kalou . . . kau vinakata meu cavuta na veika rau a kaya ena yaloqaqa kei na yalonuidei vata ga.
Au a wilika tiko na 3 Nifai wase 11; ni a vakasauri ga mai noqu sa tekivu kila vinaka sara ka vakararamataki. Au a raitayalotaka na iVakabula, o Jisu Karisito, ni sa siro sobu mai lomalagi ka tucake tu ena kedra maliwa na lewevuqa ka dedeka tu na Ligana, ka sureti ira me ra lako mai Vua, mera tara na mawe ni ivako ena Ligana kei na Yavana. Era a qai cakava oqo vakayadudua, ia ni sa oti, era a tekiduru e ra ka sokalou Vua ni sai Koya na Mesaia sa yalataki tu mai2.
Sa uabaleti au na yalo vinaka, vakacegu kei na sautu ki na kequ ituvaki taucoko kau a tagi ena loloma, vakavinavinaka, ka vakacaucautaka na Turaga vakakina ki na Nona ilesilesi ni loloma kei na loloma veivueti. Vakasauri ga na noqu sa kila sara ni sai koya oqo na ivakadinadina vakayalo mai lomalagi . . . ni veika au a wilika tiko ka vakila e yaloqu sa ka dina ka sa mai vua na Kalou.
Na veiyalo totoka au a vakila vata kei rau na daukaulotu ena siga sa oti o ya sa lesu mai, ia ena gauna oqo au a tiko duadua. Na veivakauqeti ni Yalo Tabu sa baleti au ga ka kaukauwa sara. Au a sega ni vinakata na gauna vakamareqeti oqo me oti. Au a qai kila kina e kea na cava na ivakatakila ki na tamata yadua. Na veigauna cava ga au dau wasea kina na ka oqo ena 40 na yabaki sa oti, na veivakadeitaki kamica o ya ni Yalo Tabu e vakasinaita na yaloqu.
E dua tale na gauna au a taura kina e dua na noqu ivakatakila o ya ena gauna au a se veiqaravi tiko kina vaka-peteriaki ni iteki. Au a kurabui ka yalomalumalumu sara niu dau ciqoma na ivakatakila mai vua na Yalo Tabu ena veigauna yadua au dau tabaka kina na buradeladra na lewenilotu era lako mai mera ciqoma na nodra veivakalougatataki vakapeteriaki. Ena veigauna yadua oqori na matata ni veivakauqeti au a ciqoma a vakatikori vakamatata sara ki na noqu vakasama ka a rawa vei au meu solia ki na na tamata yadua na veivakalougatataki a vinakata na Kalou, na Tamadra, mera ciqoma. A noqu itavi ga meu vakarorogo vinaka sara . . . ka cavuta yani na veika au sa ciqoma.
E dina ga ni rau duidui sara na ka au a sotava, na kena usutu bibi ga o ya niu gadreva na ivakatakila mai vua na Kalou meu vakavulici, dusimaki ka vakacegui kina; ka sa tu vei au na vakabauta ni na vakalougatataki au o Koya ena kena gauna.
Na noda parofita bula, o Peresitedi Russell M. Nelson, a vakavulica vei keda na ivakavuvuli ni ivakatakila ena Koniferedi Raraba ni Epereli 2020. A kaya kina:
“Sa tuvanaka vei keda na Parofita Josefa Simici e dua na iwalewale meda vakamuria ena kena wali na noda lomatarotaro. Ena nona a vakauqeti ena yalayala nei Jemesa ni kevaka sa lailai vei keda na vuku meda na kerea vua na Kalou, ni cauravou o Josefa a kauta vakadodonu na nona taro vua na Tamada Vakalomalagi. A kerea me soli vua na ivakatakila, ka yaco na nona vakasaqaqara me dolavi kina na iotioti ni itabagauna oqo.
“Ena iwalewale vata oqo, na cava ena dolava vei iko na nomu vakasaqaqara? Na vuku cava e lailai vei iko? Na cava o vakila ni sa nomu gagadre totolo mo kila se kila vinaka? Vakamuria na ivakaraitaki nei Parofita Josefa. Raica e dua na vanua vakanomodi mo rawa ni lako kina vakawasoma. Vakayalomalumalumutaki iko e matana na Kalou. Sovaraka na yalomu taucoko vua na Tamamu Vakalomalagi. Gole vua me sauma mai nomu taro ka kune vakacegu.
“Masu ena yaca i Jisu Karisito me baleta na nomu leqa, nomu rere, nomu malumalumu—io, na veika e dau tagica tu na yalomu. Oti mo qai vakarorogo! Vola na veivakasama era lako mai ki na nomu vakanananu. Vola na nomu nanuma ka muria ena nomu cakava o sa vakauqeti kina mo taura. Ni ko cakava tiko na iwalewale oqo ena veisiga veitaravi, veivula veitaravi, veiyabaki veitaravi, ena yaco mo “tubu ena loma ni ivakavuvuli ni ivakatakila” (Wase 10: Masu kei na iVakatakila Yadua, Nodra iVakavuvuli na Peresitedi ni Lotu: Josefa Simici).3