NODA TABANA
Me Yaco na Nomuni Lewa
E vakavulica vei keda o Jisu meda dau masu ena vakabauta e taucoko ka nuitaka ga na Kalou. A vakaroti iratou na isevu ni Nona tisaipeli, “ni dou sa masu, dou kaya, . . . Me yaco na nomuni lewa. Me caka na lomamuni e vuravura, me vaka sa caka mai lomalagi” (Luke 11:2).
Na usutu ni vosa eke o ya na, “Me yaco na nomuni lewa.”
Sa kena ivakarau vei keda meda dau lomaleqataka na noda gagadre vakatamata, au nanuma kina ni da dau calata tiko na ivakaro oqo. Se so na gauna, eda dau kaya, “Me yaco na nomuni lewa,” e vakavuqa ga me dau vakasama sara e muri, ia e sega ni dodonu me vakaoqo.
Na Kalou sa kila na ka kecega ka kaukauwa ena ka kecega. Eda sa soli keda ki na Nona lewa baleta ni sa vakasinaiti tu o Koya ena loloma tawayalani kei na rai tawamudu sa gadrevi kina meda tudonutaka na noda gagadre ena sala dodonu. Na nuitaka na Nona lewa kivei keda sa vatu ivakadei ni masu gugumatua.
A vakaraitaka vakavinaka na iVakabula o Jisu Karisito na ivakavuvuli oqo, mai Kecisemani, ni sa vakamalumalumutaki sara ena icolacola bibi vakatani ni ivalavala ca kei vuravura, a vakamamasu kina o Koya, “I Tamaqu, kevaka e rawarawa, me lako tani mada vei au na bilo oqo: ia me kakua ga ni vaka na noqu lewa, me vaka ga na nomu lewa” (Maciu 26: 39).
Na noda masu ena rairai dau sega ni rogoci ena sala eda nuitaka tiko, ia na gauna eda laiva me yaco ga na Nona lewa, sa yalataka tu vei keda na Tamada mai Lomalagi na vakacegu ena veigauna dredre.
Ena dua na yakavi bogi ni sa tauvimate bibi tiko kina o tamaqu, au a tekiduru ena yasani noqu loga ka masu ena kaukauwa ni yaloqu kei na lomaqu taucoko vua na Turaga me vukei au meu kila na ka meu cakava meu vukei tamaqu kina. Au a masu ena taucoko ni vakabauta kei na nuitaka na Tamaqu Vakalomalagi. Au a masu ka cegu, ka masu tale, ka cegu tale, niu saga vakaukauwa me tudonu na noqu vakasama. Au a saga vakaidina meu vakarorogo matua vua na Yalo Tabu.
A qai yaco maivei au e dua na veivakauqeti, kau kaya e lomaqu, “O sa kerea tikoga vua na Turaga me solia vei iko na ka o vinakata. Vakacava na ka e vinakata o Koya?”
Oqo na vosa a qai tarava mai gusuqu, “Tamaqu Vakalomalagi, au sa vinakata vakaidina me bula o tamaqu. Au sa vinakati koya vakaidina me tiko vata kei keitou. Ia kevaka sa sega ni nomuni ituvatuva oqo vua, ia sa lomaqu dina sara meu sa sereki koya. Sa lomaqu sara meu ciqoma na nomuni lewa.”
A qai vosa na Turaga ki yaloqu ka kaya vei au, “Na luvequ yalodina, baleta ga ni sa lomamu mo ciqoma na Noqu lewa ka sega ni nomu lewa, o sa na kune vinaka ka vakalougatataki ena vakacegu.”
Ena mataka e tarava, sa lesu tale o tamaqu talei ki vale vua na Tamada Vakalomalagi . . . au a qai vakila e dua na yalo totoka e vinaka kei na vakacegu malumu ki lomaqu. Au a vakila vei au na loloma savasava ni Kalou.
Dina ga niu a rarawa, a vakamalumutaka na Turaga na voravora o ya ka a cakava na mosi meu rawa ni vosota. A yaco tikoga meu vakila na Nona vakacegu ena vuqa na sala duidui, vakakina maivei ira e vuqa na itokani kei na lewe ni vuvale. Au vakila niu sa vakalougatataki vakalevu, me vaka ga a yalataka na Kalou vei au.
Au a masu tale meu vakavinavinakataki Koya, ka tukuna na levu ni noqu lomani Koya.
Au sa vakavinavinaka vakalevu ki na isolisoli talei ka totoka ni masu. Na veivosaki kei na Tamada mai Lomalagi sa dua na ka vakasakiti dina. Me sa noda na vakabauta meda ciqoma kina na Nona lewa ena ka kecega, ka nuitaka ni Nona loloma vakalou ena vukei keda meda basikata yani na ibolebole ni bula.