Vakaturi Saioni Cake

Mai vei Elder Gerrit W. Gong

Ena Kuoramu ni iApositolo Le Tinikarua

Ni da sa vakalougatataki ena kosipeli vakalesui mai na Yalododonu Edaidai, eda sa kacivi meda vaqaqacotaka na Lotu ka tarai Saioni cake.

Ena itukutuku ni veigauna taucoko, era sa dau segata na tamata ni Turaga me ra vakatura cake e dua na isoqosoqo ni kosipeli e rawa ni vakaitikotiko kina o Koya. Me da yaco me dua na itikotiko ni Yalododonu vakaoqo, e dodonu me da vulica me da vakatabuya ka vakaduavatataka na yaloda kei na noda vakasama, caka dodonu e sega kina na veileti kei na veisaqasaqa, ka bula voli ena dodonu ka sega na dravudravua vei keda (raica na Mosese 7:18).

Me ivakaraitaki, ni oti nodrau lewena o John kei Maria Linford na Lotu i Jisu Karisito ni Yalododonu Edaidai mai Gravely, Igiladi, ena 1842, a yaco o John me peresitedi ni tabana ni vanua oya. Ia, o ira na veiwekani kei na itokani, era a sega ni wasei ena reki erau a kunea na Linfords ena Veivakalesuimai. Kevaka era sega ni rawa ni uqeti John me lako tani mai na nona lotu vou, era na qai “vakawalokaitaki koya kina” ena nodra biuta na nona bisinisi ni caka ivava.

Ena 1856 a solia kina na iLavo Vure ni Biuvanua vei John kei Maria na madigi me rau biuvanua ka gole ki na Buca o Salt Lake. Rau a soko yani ki New York kei na tolu na luvedrau tagane. Mai kea eratou a gole ki Iowa City, Iowa, ka ratou biubiu mai kina ena Julai ni 1856 vata kei na kabani malumalumu ni qiqi nei James G. Willie.

Ena itekivu ni 21 ni Okotova, volekata na bati ni Uciwai na Sweetwater e Wyoming, a cavuta kina o Joni na iotioti ni nona vosa.

“Au marau ni tou sa lako mai,” a kaya vei Maria ni a tarogi koya ke sa veivutunitaka nodratou a biuti Igiladi mai. “Au na sega ni bula me’u yacovi Salt Lake, ia ena rawa vei iko kei iratou na cauravou, ka’u sa sega ni veivutunitaka na ka kece datou sa lako curuma mai kevaka me ratou na tubucake na cauravou ka tara cake na nodratou matavuvale e Saioni.”¹

Na Cava Na Saioni?

E vica na ulutaga ena taudaku ni sucu ni Turaga o Jisu Karisito era sa vakauqeti ira vakalevu cake na parofita kei na Yalododonu e liu kei na gauna oqo mai na vakasoqoni vata tale ni mataqali i Isireli kei na kena tarai cake o Saioni me vakavakarau ki na iKarua ni Lako Mai ni iVakabula.²

Na cava na vuna sa rui bibi kina o Saioni vei ira na Yalododonu Edaidai—ena gauna oya kei na gauna oqo, ena vanua cava ga era kunei kina na tamata ni Turaga?

A cauraka o Elder Bruce R. McConkie (1915–85) ena Kuoramu ni iApositolo Le Tinikarua, “Mai na siga i Atama ki na gauna oqo—ena veigauna kece e tu kina na nona tamata na Turaga; ena veigauna kece era vakarorogoca na domona ko ira era muria na nona ivakaro; ena veigauna kece era qaravi koya kina ena lomadra taucoko na nona yalododonu—sa tu ko Saioni.”³

Na ivolanikalou e vakamacalataka e dua na isoqosoqo vaka-Saioni. O Inoki, e dua na parofita vakabauta cecere ena gauna nei Noa, “a tara e dua na koro levu ka vakayacana me Koro Tabu, io ko Saioni” (Mosese 7:19). A tiko e kea na Turaga vata kei ira na Nona tamata, a vakalougatataki ira kei na nodra vanua (raica na Mosese 7:16–18). Sa kaya vei Inoki na Turaga, “Raica koi au na Kalou; Na Tamata Yalosavasava na yacaqu” (Mosese 7:35).

E dua na rai kei Saioni oya me tauyavutaki e dua na vanua duavata ni vakabauta ka yavutaki ena ivakavuvuli vakasilesitieli ni lomalagi, ka ra rawa ni lako vata kina kei Koya na tamata ni Kalou kei na Kalou Vakataki Koya sa dau tiko kina.

E vakadinadinataka na iVola i Momani ni oti na nona veisiko ki na Vuravura Vou na iVakabula sa tucaketale, “era sa saumaki vua na Turaga na tamata kecega ena dela ni vanua taucoko. …

“Era sa taukena vata na ka kecega ena kedra maliwa; ka sa sega e dua sa vutuniyau se dravudravua; bobula se itaukei, ia era sa galala kecega ka vakaivotavota ena isolisoli vakalomalagi. …

“Ka sa yaco ni sa sega na veileti ena vanua, ni sa tiko e lomadra na tamata na loloma ni Kalou” (4 Nifai 1:2, 3, 15).

Vakaiyaragi ena iValavala Dodonu kei na Kaukauwa

Na gauna nei Inoke a gauna ni ivalu, vakadave dra, rere, butobuto, kei na veicacati—ni “kaukauwa i Setani sa tu e delai vuravura” (Mosese 7:24; raica talega na tikina e 16, 17, 33). Ia a yalodina o Inoki, ka sa kacivi koya na Turaga me kacivaka na veivutuni.

A kaya na Turaga vei Inoki ni “veivakararawataki levu” vata oqo (Mosese 7:61)) ena yaco ni se bera na iKarua ni Nona Lako Mai. “Me vaka au sa bula, au na lako vakaidina mai ena veisiga mai muri, io na siga ni caka ca kei na veisausaumi, io au na lako mai me’u vakayacora na ka au a bubuluitaka vei iko ena vukudra na kawa i Noa” (Mosese 7:60).

Me baleta na noda gauna, a tukuna kina vakaoqo o Peresitedi Russell M. Nelson, “Au raica na matedewa levu oqo na [COVID-19] sa dua ga vei ira na tauvimate e takava na noda vuravura, oka kina na veicacati, lomolomora vakamatanitu, veivakaduiduitaki, ivalavala kaukauwa, veidabui, kei na lailai ni yalovinaka.”⁴ Ia, sa tu vei keda na veivakadeitaki vakaparofita. A kaya talega o Peresitedi Nelson:

“Eda sa bula tiko ena siga ‘era a namaka tu ena yalo vakanuinui ko ira na noda qase.’ [Vunau kei na Veiyalayalati 121:27.] Eda sa tu sara ga qo e liu meda ivakadinadina bula kina na ka a raica o Nifai na parofita ena raivotu duadua ga, ni ‘kaukauwa ni Lami ni Kalou’ ena sobuti ira mai ‘na nona tamata ni veiyalayalati na Turaga, ka ra sa veiseyaki tu e delai vuravura; ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere.’ [1 Nifai 14:14.]

“Oi kemuni, na taciqu kei na ganequ, sa ikemuni na tagane, yalewa, kei na gone, a raica o Nifai.”⁵

Na veisureti me vakasoqoni ka vakalougatataki ira era tiko ena yasa ruarua ni ilati, tarai Saioni, ka vakarautaki vuravura ki na iKarua ni Nona Lako Mai na noda iVakabula e oka kina o keda yadua. “Vei ira kece na tamata era a bula e vuravura,” a kaya o Peresitedi Nelson, “sa ikeda sara ga eda na vakaitavi ena cakacaka ni iotioti ni vakasokumuni cecere oqo.”⁶

Eda na Yaco Vakacava Ki Kea?

Ni ra sa vakalougatataki na Yalododonu Edaidai ena kosipeli vakalesui mai, eda sa “kacivi meda cakacaka ena were ni vaini [ni Turaga], ka tara cake na [Nona] lotu, me vakabulabulataki kina ko Saioni” (Vunau kei na Veiyalayalati 39:13). Na cakacaka oqori e gadrevi kina na loloma, duavata, vakabauta, veiqaravi, solibula, kei na talairawarawa.

“Ni da lomana na Kalou ena lomada taucoko ka tovolea meda bula savasava me rawa ni da vakataki Koya, ena lailai na veivala kei na veileti ena keda maliwa. Ena levu cake na duavata,” a kaya o Elder Quentin L. Cook ena Kuoramu ni Apositolo Le Tinikarua. A kuria: “Na duavata e … rabailevu, na kena ibalebale ia e matanataka na imatai kei na ikarua ni ivunau levu, o ya meda lomana na Kalou ka lomani ira na wekada. E vakatakila na kawatamata i Saioni sa ‘semati na lomadra ena duavata’ [Mosaia 18:21].”⁷

Ena loloma kei na duavata oya, eda sa cakacakataka na vakabauta meda ciqoma na Veisorovaki ni noda iVakabula, ka na rawa ni veisautaki keda ni da vakasavasavataka na yaloda kei na noda bula (raica na Mosaia 3:19 kei na Vunau kei na Veiyalayalati 97:21). Eda vakasoqoni ira vata mai era sa tuvakarau me ra lako mai vua na Turaga ena ivalavala dodonu. Mai na veicakacaka vakalotu tabu kei na ivakavuvuli vakasilesitieli, eda sa sureta kina na kaukauwa ni bula vakalou ki na noda bula (raica na Vunau kei na Veiyalayalati 105:5). Vakatabui ena noda duavata kei na Kalou kei keda vakataki keda, eda tarai Saioni cake ka vakavakarau ki na iKarua ni Lako Mai.

“Na loloma uasivi sa ikoya na loloma taucoko i Karisito,” e kaya o Peresitedi Henry B. Eyring, na iKarua ni Daunivakasala ena Mataveiliutaki Taumada. “Ia sa ikoya na vakabauti Koya kei na mana taucoko ni Nona Veisorovaki tawayalani o na vakadonui kina, vakakina o ira o lomana ka qarava, me baleta na isolisoli vakalou mo laki bula ena veimaliwai ni Saioni sa yalataki tu ka sa vaqarai tu vakabalavu.”⁸

Vakavakarau ki na Veisiga ena Lako Mai

group of young men sitting in a Church class

Era vakatavulica na parofita ni gauna oqo ni noda lako mai vua na iVakabula e ka ni yalayala yadua, ka sega ni vanua e tiko kina.

“Ena veisiga taumada ni Lotu, na saumaki e dau kena ibalebale na biuvanua talega,” e vakamacalataka o Peresitedi Nelson. “Ia edaidai na vakasoqoni vata sa yaco tiko ena veivanua yadua. Sa lewa na Turaga me tauyavutaki ko Saioni ena veituvaki yadua sa solia o Koya vei ira na Nona Yalododonu mera sucu ka itaukei kina.”⁹

Ni da karona na bolebole kei na veivakalougatataki ni tarai cake o Saioni ena noda matavuvale, tabana, tabanalevu, iteki, kei na itikotiko raraba, eda na raici John kei Maria Linford ki na siga era sa tubucake kina na luveda kei na makubuda “mera tubu cake ka susuga cake na nodra matavuvale e Saioni” ena veimatanitu, veimataqali, kei na duivosavosa.

Ni da vakasaqara taumada na Turaga kei na Nona ivalavala dodonu, eda na masulaka “me toso tiko ga na nona matanitu e vuravura, me ra ciqoma ko ira na tamata, ka ra vakarautaki ira ki na siga ena qai yaco mai, io na siga ka na lako sobu kina mai lomalagi na Luve ni Tamata, ka vakaisulu ena iserau ni nona lagilagi, me sota kina kei na matanitu ni Kalou sa tauyavutaki e vuravura.” (Vunau kei na Veiyalayalati 65:5).