Yavu ni Kosipeli

Koniferedi Raraba: E Dua na Soqoni ni Lotu e Vuravura Raraba

Eda vakarorogo vei ira na parofita kei ira na iliuliu tale eso ni Lotu ena gauna ni koniferedi raraba. Era vakavulica vei keda na veika e vinakata na Kalou meda rogoca.

Ena veivula ni Epereli kei na Okotova, na Lotu e dau vakayaco soqoni ka vakatokai me koniferedi raraba. Era veivakavulici ka vakadinadinataki Jisu Karisito kina kei na Nona kosipeli o ira na iliuliu. Na koniferedi raraba e dau vakayacori e Salt Lake City, Utah, Amerika, ka kaburaki e vuravura raraba ena 90 na veimataqali vosa. Na lewenilotu kei ira na so tale era taleitaka era sa sureti mera vakarorogo ki na vosa.

Na iMatai ni Koniferedi ni Lotu

A tauyavutaki vakalawa na Lotu ena dua na soqoni ena 6 ni Epereli, 1830 (raica na Vunau kei na Veiyalayalati 20). A vakayacori na imatai ni koniferedi raraba ena ika 9 ni Jiune, 1830. Mai na gauna oya, sa dau vakayacori na koniferedi raraba ena veidusimaki ni Peresitedi ni Lotu ena vanua cava ga e rawa era soqoni vata kina na lewenilotu. Ena 1840 vakacaca, sa tekivuna na iliuliu me vakayacori vakarua ena dua na yabaki na koniferedi.

Na Sala e Tuvai Kina na Koniferedi Edai

Era na vosa na Mataveiliutaki Taumada, na Kuoramu ni iApositolo Le Tinikarua, kei ira na iliuliu tale eso ni Lotu ena gauna ni koniferedi raraba. Era vakarautaka na sere vakaivakatagi na Matasere na Tabernacle ena Lomanibai ni Valetabu kei na matasere tale eso ni Lotu. Na koniferedi yadua e lima na kena soqoni: tolu ena Vakarauwai kei na rua ena Sigatabu.

Nodra iVakavuvuli na iLiuliu

Ena veivula ni se bera na koniferedi, era dau masulaka na iliuliu ni Lotu na veika mera vakavulica. E vakauqeti ira na Turaga mera kila na veika mera tukuna. Era vakavuvulitaka na dina ni kosipeli ka sureti keda meda muria na ivakaro ni Kalou. Era vakadinadinataki Jisu Karisito talega ka vakayaloqaqataki keda meda muri Koya.

Vuli mai na Koniferedi

Ni bera na koniferedi raraba, sa rawa ni da masu meda rogoca na veika e vinakata na Turaga meda vulica. Ni da vakarorogo ki na veivosa oqo, ena vakavulici keda na Yalotabu ena veika eda gadreva meda kila. Ni oti na koniferedi, e basika na vosa ena ChurchofJesusChrist.org, ena Gospel Library app, kei na Liaona. E rawa ni da masulaka na vulici ni veivosa eso me na kilai vinaka na veika me baleti Jisu Karisito kei na Nona kosipeli.

Mai na iVolanikalou

E vakatavulica o Jisu Karisito ni dodonu meda dau sota wasoma (raica na 3 Nifai 18:22).

Ni ra sokalou vata na lewe ni Lotu, ena tiko vata kei ira na Turaga (raica na Maciu 18:20).

A vakaroti ira na lewe ni Lotu na Turaga me ra “veidusimaki ka veivakatataki cake vakataki kemudou” (Vunau kei na Veiyalayalati 43:8).

Ni ra sa yalodina ka cakacakataka na nodra vakabauti Karisito na lewe ni Lotu, ena tiko vata kei ira na Nona Yalotabu ni ra soqoni vata (raica na Vunau kei na Veiyalayalati 44:2).

E Tiko Talega ena iLavelave Oqo

Keimami nuitaka ni ko ni sa marautaka na vulica na veika ni koniferedi raraba. Oqo eso tale na vosa ni kosipeli mai na ilavelave oqo:

Cakacaka ni veisosomitaki: Vakayacori na cakacaka vakalotu, me vaka na papitaiso, ena valetabu me baleti ira ka sega na nodra madigi mera ciqoma ni ra se bula tiko (raica na tabana e 17).

Bula rawati koya: Mo cakava na nomu vinaka duadua mo rawata ga na veika o gadreva (tabana e 24).

Vosa Vakatautauvata: E dua na italanoa ka na vukei keda meda vulica e dua na lesoni bibi (tabana e 27).