“Oqo Na Yaca Ena Kacivi Kina Na Noqu Lotu”

Mai vei Peresited Henry B. Eyring

Karua ni Daunivakasala ena Mataveiliutaki Taumada

Ni da vakayagataka na yaca taucoko ni Lotu, eda sa vakalougatataki ka vakalougatataki ira na tani.

various people walk by a Church sign in Korean

Mai Aferika, o ira na tamata yadua era vaqara tiko e dua na lotu me ra lewena e tukuni ni ra sa tatadrataka tiko. Ena nodra tadra, era a vakasalataki me ra vakasaqara e dua na lotu ka vakatokai ena yaca i Jisu Karisito. Ni ra vaqaqara tiko, era kunea walega e dua na lotu e itakele ni yaca ni iVakabula—Na Lotu i Jisu Karisito ni Yalododonu Edaidai.

E Amerika vaka-Latina, e vica na Yalododonu Edaidai era tukuna ni nodra veisureti vei ira na itokani me ra tiko ena “Lotu Momani” era a sotava na veilecayaki. A veisau oya ni ratou sa veisureti ki na Lotu i Jisu Karisito ni Yalododonu Edaidai. “Kevaka e vakatokai na nomudou lotu me Lotu i Jisu Karisito,” era sauma na nodra itokani, “keitou vinakata me keitou na laki raica yani.”

E Amerika, a sureti ira na tiko wavoliti koya e dua na cauravou ena Lalai ki na nona papitaiso. A kaya e dua na italatala ni dua tale na vakabauta ni na sega ni lako ki na dua na papitaiso ni “Lotu Momani”. Ia baleta ni rawa ni tukuna o koya ni lotu nei cauravou oya e vakanamata vei Jisu Karisito, a lako vata kei watina na italatala.

Ni taroga e dua na itini ni waqavuka e dua na lewe ni Lotu me baleta e dua na imeli, a sauma mai na lewenilotu, “ldschurch.org.”

“Na lotu cava oya?” a taroga na itini.

“Na Lotu i Jisu Karisito ni Yalododonu Edaidai,” a sauma yani o lewenilotu.

“Au dau cakacaka me vica vata na siga ka sega vakadua ni rawa me’u tukuna na veika e baleta na Turaga,” a kaya na itini. “Ni’u kila ni’u vosa tiko vua e dua tale e Lotu Vakarisito sa dau taucoko dina na noqu siga.”

A vakavoutaka vakatotolo na lewe ni Lotu na nona itukutuku ni waqavuka kei na itikotiko vou ni imeli ni Lotu: ChurchofJesusChrist.org.¹

Sa Vakavotukana e Dua na Yalayala

family walking in front of a Church building

O ira na italanoa totoka oqo era matataka na kena vakayacori e dua na iyalayala a vakayacora o Peresitedi Russell M. Nelson vei ira na Yalododonu Edaidai ena Okotova 2018 ka vakakina ena Epereli ni 2020.

“Au yalataka vei kemuni kevaka eda solia noda igu me da vakalesuya na yaca donu ni Nona Lotu na Turaga, o Koya e Nona na Lotu oqo ena sovaraka mai Nona mana kei na veivakalougatataki e uluda na Yalododonu Edaidai, me vaka eda se bera vakadua ni bau raica,” e kaya o Peresitedi Nelson. “Ena noda na kilaka kei na kaukauwa ni Kalou me vukea noda kauta na veivakalougatataki ni kosipeli vakalesui mai i Jisu Karisito ki na veimatanitu, veimataqali, duivosavosa, kei na tamata ka vakarautaka na vuravura me baleta na iKarua ni Nona Lako mai na Turaga.”²

Wale tikoga oqo, ena noqu akaude ni veimaliwai raraba, au a sureti ira na lewe ni Lotu me ra tukuna vei au me baleta na veivakalougatataki era sa ciqoma ena kena vakayagataki na yaca donu ni Lotu. A tara na yaloqu ni’u a ciqoma e sivia na 2,600 era veitaratara mai.

Au via wasea eso oqo vei kemuni. Era na rogo matalia baleta ni o sa ciqoma na veivakalougatataki vata oqo ni ko a muria na ivakasala nei Peresitedi Nelson.

Voleka sara vei Jisu Karisito

A vakauqeti au na ivakadinadina i Jekope me baleta na kena sa vukei koya na yaca taucoko ni Lotu me vakanamata vua na iVakabula: “Au raica ni noqu vakanamata vei Jisu Karisito sa drodrova yani na veitiki kece sara ni noqu bula,” a wasea vei au. “Ni’u taura na sakaramede, au vakasamataki Koya kei na Nona solibula ni veisorovaki. Ni’u wilika na ivolanikalou, au dau kauwaitaka vakalevu cake na Nona vosa kei na veika tale eso e baleti Koya. Oqo e sa toroi au voleka yani Vua ka sa vukei au me’u kila vakavinaka cake na Nona itavi vaka noqu iVakabula ka Dauveivueti.”

Au vakila ni’u kalougata ni’u vulica na ibalebale ni yaca ni iVakabula vei Beth kei Bryce: “Au sa vakila e dua na isema voleka sara vua na noqu iVakabula,” e kaya o Beth. “Ni’u tarogi se lotu cava au gole kina, au dau sauma ni’u lewena na Lotu i Jisu Karisito ni Yalododonu Edaidai, ka’u vakila e dua na yalo dina ni’u sa taukei kina. Au sa nodra na Nona tamata. Au lewe ni Nona matavuvale. Au sa Nona.”

E tukuna vei au o Bryce ni yaca donu ni Lotu e vukei koya me “nanuma tiko o cei au qarava kei cei au segata me’u vakataka vakalevu cake. E veivakananumi vei au ni iVakabula sa ikoya ka solia na ivakavuvuli oqo ka ni ra sega ni vu mai vua na tamata.”

“Na Yaca ni iVakabula e Tu Kina na Kaukauwa”

A kaya o Haley, e dua na daukaulotu tudei: “Ni vakayagataki na yaca dodonu ni Lotu ni Turaga ena kauta mai e levu cake na kaukauwa kei na lewa ni da vakavulici ira na tamata ena Nona kosipeli vakalesui mai. Ni’u kaya ‘Na Lotu i Jisu Karisito ni Yalododonu Edaidai,’ sa vakadeitaka ka vakadinadinataka na Yalo ni Turaga ni oqo na Lotu ni Turaga sa vakalesuimai ki vuravura edaidai. Au taleitaka ni’u dau vakayagataka na yaca dodonu baleta ni’u sa vakuria talega na noqu ivakadinadina bula ki na dina oya!”

A qai kaya vei au o Nicola: “E liu, kevaka au a kaya ‘Momani,’ ena so na gauna ena cariba na veilecayaki oya vei ira eda sega ni vakabauta vata. E voleka ni o rogoca na vakusakusa ni vakanananu ni veika kece era sa bau rogoca me baleti ‘ira na Momani.’ Ia oqo sa tiko e dua na vakacegu, e vakavuqa ni dau ciqomi. Na yacana na iVakabula e tiko kina na kaukauwa. E kauta mai o Koya na vakacegu. Sa tubu na noqu ivakadinadina me baleta na dina ni kosipeli ena noqu cavuta na yaca dodonu ni Lotu. Au dau vakila na Yalotabu ena veigauna kece au cavuta kina. Ena so na gauna sa ikoya kece o ya na ka au rawa ni tukuna me baleta na veika eda vakabauta, ia sa rauta o ya.”

Vakamatatataki ni Vakasama Cala

A kaya o Harold, e dua na parofesa ni univesiti e Amerika, ni vakayagataka taucoko na yaca ni Lotu sa vukei koya me vakamatatataka na nanuma cala. A kaya vei au ni dua na gonevuli, a saga me vakalekalekataka e dua na veivosaki baleta na lotu, a kaya, “Au nanuma ni veimatalotu kece era Lotu Va-Karisito, vakavo ga vei ira na Momani.”

Ni’u raica o ya sa dua na gauna koula me’u vakamatatataka na vakasama cala oya, a kaya o Harold, “Au a tukuna vei ira na gonevuli ni ‘Momani’ e dua na yacabuli e soli vei ira na lewe ni Lotu ena vuku ni noda vakabauta na iVola Tabu kei na iVola i Momani me rua na ivakadinadina vakaivolanikalou makawa i Jisu Karisito.”

A sovaraka vei au o Mary na yalona, ka wasea na kena sa vakalougatataki koya na yaca taucoko ni Lotu ena nodra vakavulici na luvena: “Sa lailai na veilecayaki vei ira na luvequ ena gauna au vakavulica kina vei ira ni da sa Yalododonu ni Lotu i Jisu Karisito ena iotioti ni gauna oqo ka sega ni tukuni keda tiko ni da ‘Momani.’ Era dau veilecayaki ka taroga, ‘Na cava na vuna e Momani kina? E kena ibalebale beka oya ni da sega ni lotu Vakarisito?’ Au vakila ni veisau oqo e sa vukei ira ni ra vosa vei ira eso tale na gone e koronivuli era sega ni vakabauta.”

“Oi Au e Dua na Daukaulotu i Jisu Karisito”

A yalataka o Peresitedi Nelson ni gauna eda vakayagataka kina na yaca dodonu ni Lotu, “ena tu vei keda na kilaka kei na kaukauwa ni Kalou” me vakatetei na kosipeli. A vakauqeti au o Teresa ena nona italanoa me baleta na ka a yaco ni tarogi koya e dua na itokani ena cakacaka me baleta na Lotu. Ni oti na ivakasala nei Peresitedi Nelson, a tekivu o Teresa me wasea na yaca taucoko ni Lotu.

“A malele mai o koya ki na Lotu,” a kaya vei au. “A vaqaqa o koya ena vica na vula ka qai, veivakurabuitaki, ni a papitaisotaki koya na luvequ, na bisopi. Au a marau vakalevu ena siga o ya, ka vakakina na noqu matavuvale. Sa dei tu na yalayala.”

E kaya o Jordan ni vuqa na tamata era se sega tiko ni kila vinaka na yaca ni Lotu. “Ni vakayagataki taucoko na yaca ni Lotu,” e kaya o koya, “e solia vei au e dua na gauna me’u vakamacalataka na kena yavutaki na Lotu vei Jisu Karisito kei na vuna eda vakatokai keda kina meda Yalododonu Edaidai.”

Ena gauna a tarogi Chloe kina e dua na turaga kevaka e “daukaulotu Momani,” a vakadinadinataka vakaukauwa, “Sega, au sa daukaulotu i Jisu Karisito.” A kaya vei au o Chloe ni a gadreva na turaga oqo me sa muria na iVakabula, a qai vakavulici koya ni Lotu i Jisu Karisito ni Yalododonu Edaidai sa liutaki tiko mai vua na iVakabula. A qai tukuna vua na itukutuku me baleta na Nona Lotu.

“Vakatoka na Lotu ena Yacaqu”

sister missionaries talking to a family in front of a Church building

Ni sa vakaraitaka na yaca ni Nona Lotu vua na Parofita o Josefa Simici, a kaya kina na iVakabula, “Ni sa ikoya oqo na yaca ena kacivi kina na noqu lotu ena veisiga mai muri, io na Lotu i Jisu Karisito ni Yalododonu Edaidai” (Vunau kei na Veiyalayalati 115:4). A kaya kina vei ira na Nifai, “Mo ni vakatoka kina na lotu oqo ena yacaqu,” ni “kevaka sa sega ni vakatokai ena yacaqu, ena rawa vakaevei me noqu lotu?” (3 Nifai 27:7,8).

Au vakadinadinataka vata kei na dua na Yalododonu Edaidai e yacana o Tommie ni gauna eda vakayagataka kina na yaca taucoko ni Lotu, eda sa vakalougatataki ka vakalougatataki ira na tamata. A kaya vei au o Tommie, “Ni’u wasea vei ira tale eso na veivakalougatataki ni’u lewena na Lotu i Jisu Karisito ni Yalododonu Edaidai ena gauna e qaqa kina na veiqati kei na rere, au kila ni’u sa vukei ira tiko eso mera kila ni sa tiko na ivakaruru mai na cava kei ira na tisaipeli i Jisu Karisito, era kauwaitaki ira ka muri Koya.”