Domodra na Yalododonu Edaidai
Noqu iTokani Vakabisinisi se noqu Veikacivi?
Ni’u tovolea me’u vakayacora na noqu itavi ni matabete, a vakaraitaka vei au na Turaga ni kila tu o Koya na kequ ituvaki vakailavo.
iTaba mai na Getty Images
Ena gauna au a kacivi kina me’u peresitedi ni kuoramu ni italatala qase ena 2000, e vitu ga na italatala qase era a dau tiko ena soqoni ni matabete. Vakatalega kina, keitou a sega ni cakava vinaka tiko na neitou cakacaka ni veituberi ena vuvale—ena gauna oqo sa veisiko—ni veiqaravi.
Au kila ni keimami sotava tiko e dua na bolebole levu me vakauqeti ira na italatala qase me ra yaloqaqa mai. O koya gona, sa tekivu sara, me keimami sa tauyavutaka vou na ilesilesi kei na toroi cake ni veiliutaki.
Baleta ni’u loya vakataki au, au dau veilakoyaki vakalevu. Au sa rui osooso, ia au vinakata me’u vakayacora na noqu itavi vakamatabete.
Dua na siga, au a vodo basi ki na dua tale na korolevu me’u taleva lesu kina e dua na itokani vakabisinisi. Baleta ni sa tadre sara na noqu veika vakailavo, au nuitaka toka ni na vakadonuya o noqu itokani vakabisinisi me saumi au rawa e liu.
Ni’u sa lako yani me’u laki vodoka na basi, au nanuma sara me’u na laki raici ira eso na lewe ni kuoramu ka vakayaloqaqataki ira me ra sikova na nodra matavuvale. Eso era a guilecava ka ra yalataka mera na qai cakava. Eso tale era a yalataka me ra na vakacavara na nodra veisiko ena macawa oya.
Au a marautaka vakalevu na nodra yalayala ka’u sa nanuma me’u sikovi ira ka vakayaloqaqataki ira na vo ni lewe ni kuoramu. Au kidacala, ni sa sivi tale na vakasigalevu. Au sa qai sega tale ni biuta na taoni, ka’u sa mani gole ga yani ki na noqu valenivolavola me’u laki talevalesu kina na kisi nei noqu itokani vakabisinisi.
Au kurabui, ni’u yaco yani ki na noqu valenivolavola, a tucake tu e tautuba kei na dua tale na tamata o noqu itokani. Au a vakamacalataka vei noqu itokani ni’u sa vakarau railesuva na nona kisi ka na tiko e dua na noqu ripote me baleti koya ena siga ka tarava. A kaya ni lako tiko mai me vakaveikilaitaki au vua e dua na itokani vou vakabisinisi. Ni keirau sa veitalanoa oti kei nona itokani, keirau a vakadonuya e dua na isau vakailavo me vukei koya me walia na nona ka vakalawa. Vakasauri ga, sa lewa sara mai o noqu itokani vakabisinisi me sa saumi au rawa e liu.
Vei au, oqori e dua na cakamana. Sa kila tu na Tamada Vakalomalagi ni’u saga tiko me’u yalodina tiko Vua. E kila talega o Koya na noqu gagadre. Sa vakalougatataki au o Koya ena vuqa na sala ena veiyabaki, ia ena gauna oqo sa yaco mai vakailavo na Nona veivakalougatataki. A vakataucokotaka na Nona vosa ena ivolanikalou vei ira era qaravi Koya: “Dou vakasaqara taumada na matanitu ni Kalou, kei na nona yalododonu; ia ena soli me kena ikuri vei kemudou na ka kecega oqo” (Maciu 6:33).
Kei na noda kuoramu ni italatala qase? Sa vakalougatataki keda na Turaga ni da toso yani ki liu ena yalo duavata. Sa tubu na neitou veituberi vakamatavuvale ki na 100 na pasede, ka sa tubu cake na neitou tiko vakamatabete ki na 35 na italatala qase yalodina.
Au vakadinadinataka ni sa rawa meda iyaya kece ni cakacaka ni Turaga ka kunea na reki kei na veivakalougatataki ena noda qaravi Koya ena noda qaravi ira na tani.