Veivuke Mai na Yasa Kadua ni iLati.
Ni’u davo koto ena mosi e valenibula, au vakila na galili me yacova ni’u nanumi ira sara na noqu qase e liu daulomani.
iTaba mai na Getty Images
Ena 2017, au a buketetaka tiko na imatai ni luvei keirau. Keirau sa marau tiko kei watiqu, o Lucas, ia keirau a rere ni sa vakarau yaco mai o Juan Lionel lailai.
Ena dua na lomaloma ni bogi ena itekivu ni Feperueri 2018, sa tekivu veilecayaki na yagoqu. Au se qai vula walu ga kina, ia e kena irairai ni na yaco totolo mai na luvei keirau mai na kena e namaki. Keirau a solega e vica na ka ka gole vakatotolo ki na valenibula. Au a sega tu ni vakarau me’u sa na vakasucu, ia au a qai masu, ka kerea vua na Kalou me vakayacori na Nona lewa dina ga ni keirau rere tiko.
Ni keirau yaco yani ki valenibula, sa laki tukuni sara vei noqu vuniwai ia a kaya ni na qai yaco mai vakamalua. A qiri ka vakau teks o watiqu vei neirau dui itubutubu kei na taci keirau, ia a sega ni dua vei ira a yadra tiko. A tomana tikoga nona qiri kei na vakau teks ena bogi taucoko, ia a sega ni dua a sauma mai. Oqori e vakavuna me’u galili sara.
Ni sa levu cake na mosi ni veilecayaki ni yagoqu, au vakila ni’u sa galili vakalevu cake. Vakasauri ga, sa yaco e dua na ka totoka. Sa tekivu me’u vakasamataki ira noqu qase e liu—vakabibi o tinai tinaqu, o Rosa Mercado, kei tinana, o Javiera Balmaceda.
Ni’u vakananumi rau tiko, au a vakila e yaloqu kei na noqu vakasama ni rau a tiko ruarua vata kei au ena gauna oya. Au a vakila na nodrau tiko ena dua na sala kaukauwa ka kamica ka’u na sega ni vakamacalataka rawa vakataucoko na ka au a sotava oqo. Au a sega ni raici rau, ia au a vakila nodrau voleka, e solia vei au na yaloqaqa, veitokoni, kei na loloma ni rau sa tinaqu ka tiki ni noqu matavuvale. Au vakila ni rau sa agilosi erau mai qaravi au ena noqu gauna ni leqa.
Ena vica na yabaki yani ki liu ena valetabu, keirau a vakayacora kei tinaqu, tamaqu, taciqu, watiqu, na nodra cakacaka vakaveisosomitaki kei na nodra cakacaka vakaveisosomitaki na qase e liu eso. Au kila ni yaloqaqa au a ciqoma kei na yalo au vakila ni ra sa mai tu voleka na noqu qase e liu sa dua na isolisoli mai na kaukauwa kei na lewa ni Kalou.
Mai na gauna oya, au sa dau vakila na yalodra na noqu qase e liu ena so tale na gauna, me vukei au ka dusimaki au me’u dua na tina kei na dua na marama vakawati kei na so tale na ituvaki bibi ni noqu bula.
Au vakadinadinataka ni na sega ni biuti keda duadua tu na Kalou ena sala ni noda bula. Kevaka eda cakava na Nona cakacaka, ena soli vei keda na veivuke mai na yasa kadua ni ilati. Eda na ciqoma na loloma, kilaka, kaukauwa, kei na vakacegu “sa uasivia na ka kecega sa kilai rawa” ( (Filipai 4:7).