Tokoni mei he Tafaʻaki ʻe Taha ʻo e Veilí
ʻI heʻeku tokoto faingataʻaʻia ʻi he falemahakí, naʻá ku ongoʻi tuenoa kae ʻoua kuó u manatuʻi ʻeku ngaahi kui ʻofeiná.
Laʻitā mei he Getty Images
ʻI he 2017, naʻá ku feitama ʻi heʻema fuofua pēpeé. Naʻá ma fiefia mo hoku husepāniti ko Lūkasí ka naʻá ma loto-tailiili ʻi he ʻamanaki ke haʻu ʻa e kiʻi Huani Lainolo.
ʻI ha tuʻapō ʻe taha ʻi he kamataʻanga ʻo Fēpueli 2018, naʻe kamata ke u langā. Naʻá ku kei māhina valu pē, ka naʻe hangē ne ʻamanaki ke haʻu ʻema pēpeé kimuʻa ʻi he taimi ne fai ki ai e ʻamanakí. Ne ma toʻo ha ngaahi meʻa siʻi pē peá ma mavahe fakavavevave leva ki he kilīnikí. Naʻe ʻikai ke u ongoʻi mateuteu ki he langaá, ka naʻá ku lotu ʻo kole ki he ʻOtuá ke fai Hono finangaló neongo ʻema ilifiá.
ʻI heʻema aʻu atu ki he kilīnikí, naʻe fakahā ki heʻeku toketaá ka naʻe talamai ʻe toki aʻu mai ʻamui ange. Naʻe telefoni mo ʻave pōpoaki telefoni hoku husepānití ki heʻema mātuʻá mo e ngaahi tokouá mo e tuongaʻané, ka naʻe ʻikai ke ʻā ha taha ʻia kinautolu. Naʻe hokohoko atu pē ʻene tā telefoni mo e pōpoaki telefoní ʻi he kotoa ʻo e pō ko iá, ka naʻe ʻikai tali mai ʻe ha taha. Naʻá ku ongoʻi tuenoa ʻaupito ai.
ʻI he fakaʻau ke lahi ange ʻa e mamahi mei heʻeku langaá, naʻá ku ongoʻi tuenoa lahi ange. Ka neongo ia, naʻe fakafokifā kuo hoko ha meʻa fakaʻofoʻofa. Naʻe kamata ke u fakakaukau ki heʻeku ngaahi kuí—tautautefito ki heʻeku kuifefine ʻi he tafaʻaki ʻeku faʻeé, ʻa Losa Mekato, mo ʻene faʻē ko Haviela Palamasetá.
ʻI heʻeku manatuʻi kinauá, naʻá ku ongoʻi ʻi hoku lotó mo e ʻatamaí naʻá na fakatou ʻi hoku tafaʻakí ʻi he momeniti ko iá. Naʻá ku ongoʻi ʻena takaofí ʻi ha founga mālohi mo angaʻofa pea ʻikai ke u lava ʻo fakamatalaʻi kakato ʻa e meʻa ne u aʻusiá. Naʻe ʻikai ke u sio kiate kinaua, ka naʻá ku ongoʻi ʻokú na ofi mai, ʻo ʻomai kiate au ha loto-toʻa, tokoni, mo ha ʻofa ʻi heʻena hoko ko ʻeku ngaahi faʻē mo ha konga ʻo hoku fāmilí. Naʻá ku ongoʻi ko e ongo ʻāngelo tauhi mai kinaua kiate au ʻi he taimi ʻo ʻeku faingataʻaʻiá.
ʻI he ngaahi taʻu kimuʻá ʻi he temipalé, ne u fakahoko mo ʻeku faʻeé, tamaí, ngaahi tokouá mo e tuongaʻané, husepānití, ʻenau ngāue fakafofongá mo e ngāue fakafofonga ʻenau ngaahi kui kehé. ʻOku ou ongoʻi ko e loto-toʻa naʻá ku maʻú mo e ongo naʻá ku maʻu ʻoku ofi mai ʻeku ongo kuí ko ha meʻa-foaki ia naʻe fakafou mai ʻi he mālohi mo e mafai ʻo e ʻOtuá.
Talu mei ai, mo ʻeku ongoʻi e laumālie ʻo ʻeku ngaahi kuí ʻi ha ngaahi taimi kehé, ʻo tokoniʻi mo tataki au ko ha faʻē mo ha uaifi pea ʻi he ngaahi tafaʻaki mahuʻinga kehe ʻo ʻeku moʻuí.
ʻOku ou fakamoʻoni he ʻikai teitei tuku ʻe he ʻOtuá ke tau tuenoa ʻi he hala ʻo ʻetau moʻuí. Kapau te tau fai ʻEne ngāué, ʻe tokoniʻi kitautolu ʻe he tafaʻaki ʻe taha ʻo e veilí. Te tau maʻu ʻa e ʻofá, ʻiló, iví, mo e nongá “ʻa ia ʻoku lahi hake ʻaupito ʻi he faʻa ʻiloá” (Filipai 4:7).