Maama ke Maluʻi Kimautolú
Naʻe ʻikai ke hū mai e fakaʻulí mei heʻene lolí, ka naʻá ku ʻiloʻi naʻá ne haʻú ke maluʻi kimautolu.
ʻOlungá: laʻitā mei he Getty Images; loto mālié: laʻitē ʻa e tokotaha haʻana e talanoá
ʻI ha pō momoko ʻe taha ʻi Fēpuelí, ne u fakaʻuli ai mo ʻeku ongo kiʻi tamaikí, fakataha mo ʻeku faʻē ko Soaná ki ʻAitahō. Naʻe kau ʻi heʻemau fakaʻuli houa ʻe valú ʻa e fakaʻuli ʻi ha vahaʻa moʻunga ʻe ua. Lolotonga e taimi ko ʻeni ʻo e taʻú, ʻe lava ke fakatuʻutāmaki ʻa e ngaahi tuʻunga ʻo e ʻeá.
Naʻa mau toki mavahe pē mei Peika Siti, ʻOlikoni, ʻi he taimi ne kamata tō ai e sinoú. ʻI heʻemau fakaʻulí, naʻe fakaʻau ke vave mo lahi ange e tō ʻa e sinoú. ʻI ha ngaahi miniti siʻi mei ai, ʻi heʻemau fou atu ʻi ha vahaʻa moʻungá, naʻe ʻikai ke u lava ʻo sio ki ha meʻa ʻi muʻa ʻiate au, ko ia ai naʻá ku afe leva ʻo tuʻu ʻi he veʻe halá. Naʻá ku lotu ki he Tamai Hēvaní ke tokoni mai ke u hao mo hoku fāmilí. Hili ʻeku lotú, naʻe tuʻu mai ha fuʻu loli uta koloa ʻi mui ʻiate kimautolu, ʻo tuʻu ofi mai ʻaki ha ngaahi senitimita ki heʻeku kaá.
Naʻe ʻikai pē ke hū mai e fakaʻulí mei heʻene lolí, pea naʻe ʻikai ke u teitei sio ki hono fofongá. Ka naʻá ku ʻiloʻi ʻi he momeniti ko iá kuó ne haʻu ke maluʻi kimautolu. ʻI heʻene tau ʻi mui ʻiate kimautolú, naʻá ne fakaʻaongaʻi e maama ʻo ʻene lolí ke fakatokanga ki he kau fakaʻuli kehé ne mau afe ki he kauhalá. ʻI he faifai peá u maʻu ha loto-toʻa ke hoko atu ʻeku fakaʻulí, ne mau toe afe atu ki he halá ʻi mui ʻi ha fuʻu loli ʻe taha, kae nofo pē ʻa e fuofua loli ia ʻi mui ʻiate kimautolú. Naʻa mau lele pē ʻi he vahaʻa ʻo e ongo lolí ʻi heʻena tataki kimautolu mei he fakatuʻutāmakí.
ʻI heʻemau mavahe atu mei he moʻungá, naʻe liliu e sinoú ʻo ʻuha. Naʻá ku fie fakamālō ki he fakaʻuli ʻi mui ʻiate kimautolú, ka ʻi he ʻosi pē ʻemau lelé, naʻe ʻikai ke u lava ʻo sio ki ai. ʻI he taimi ko iá, naʻá ku ʻiloʻi te mau sai pē pea te mau aʻu hao ki ʻapi, ʻa ia naʻe hoko ia.
Kuo teʻeki ai ha taimi ne u ongoʻi manavahē pehē ai ʻi heʻeku moʻuí. ʻOku ou houngaʻia ʻi hono fekauʻi mai ʻe he Tamai Hēvaní ha kau ʻāngelo tauhi ke maluʻi kimautolu, fakamaʻamaʻa ʻemau ngaahi hohaʻá, mo ʻomi kiate au ʻa e mālohi mo e loto-toʻa naʻá ku fie maʻu ke ʻomi ʻaki hoku fāmilí ki ʻapí.
ʻOku pehē ʻe Selesī, ʻoku tā fakataha heni mo ʻene faʻeé, Soana Pelesilā, mo hono ongo foha ko Uaieti mo ʻĀtamá, “Kuo teʻeki ai ha taimi ne u ongoʻi manavahē pehē ai ʻi heʻeku moʻuí.”
ʻOlungá: laʻitā mei he Getty Images; loto mālié: laʻitē ʻa e tokotaha haʻana e talanoá
Ko e meʻa fakaolí, he ko e ʻofefine au ʻo ha taha fakaʻuli loli. Naʻe tali ʻe he Tamai Hēvaní ʻeku lotú ʻaki ʻEne ʻomi ha ngaahi maluʻi kiate kimautolu ʻo fakafou ʻi he kau fakaʻuli lolí. Naʻe tupulaki lahi ʻeku fakamoʻoní he pō ko iá—ʻo ʻikai ngata pē ʻi he lotú ka ʻokú Ne ʻiate kitautolu maʻu ai pē pea taʻengata foki.