Leʻo ʻo e Kau Māʻoniʻoni ʻi he Ngaahi ʻAho Kimui Ní
Tokotaha ʻOku Ou Fakafofongaʻi Fakalaó pe Ko Hoku Uiuiʻí?
ʻI heʻeku feinga ke fakahoko hoku ngaahi fatongia lakanga fakataulaʻeikí, naʻe fakahā mai ʻe he ʻEikí ʻokú Ne ʻafioʻi hoku tuʻunga fakapaʻangá.
Laʻitā mei he Getty Images
ʻI he taimi ne ui ai au ko e palesiteni ʻo e kōlomu ʻo e kaumātuʻá ʻi he 2000, ko e kaumātuʻa pē ʻe toko fitu ne nau maʻu e fakataha lakanga fakataulaʻeikí. ʻIkai ngata aí, naʻe ʻikai ke mau fakahoko lelei ʻa e faiako fakaʻapí—ui ko e ngāue fakaetauhi ʻi he taimí ni.
Naʻá ku ʻiloʻi naʻa mau fehangahangai mo ha pole lahi ke ueʻi e kaumātuʻá ke fai honau fatongiá. Ko ia, naʻa mau fakakaukau ke toe fokotuʻutuʻu foʻou e ngaahi ngāué mo tokangaʻi lelei ange kinautolu.
Koeʻuhí ko ha loea ngāue tauʻatāina au, ʻoku lahi ʻeku fefonongaʻakí. ʻOku ou fuʻu femoʻuekina ʻaupito, ka naʻá ku fie fakahoko hoku ngaahi fatongia ʻo e lakanga fakataulaʻeikí.
ʻI ha ʻaho ʻe taha, naʻe pau ke u fononga pasi ki ha kolo ʻe taha ke muimuiʻi ha ngāue mo ha tokotaha ʻoku ou fakafofongaʻi fakalao. Koeʻuhí naʻe feʻamokaki ʻeku ngaahi meʻa fakapaʻangá, naʻá ku fakaʻamu ʻe loto-lelei e tokotaha ʻoku ou fakafofongaʻi fakalaó ke tomuʻa totongi mai ha paʻanga.
ʻI heʻeku fononga ke heka he pasí, ne u fakakaukau ke u ʻaʻahi ki ha kau mēmipa ʻo e kōlomú mo fakalotolahiʻi kinautolu ke ʻaʻahi ki honau ngaahi fāmilí. Kuo ngalo ʻi ha niʻihi ka naʻa nau tukupā ke fai ia. Naʻe tukupā ha niʻihi ke fakaʻosi ʻenau ngaahi ʻaʻahí ʻi he uike pē ko iá.
Naʻá ku fuʻu fiefia ʻi heʻenau ngaahi tukupaá peá u fakakaukau ai ke u ʻaʻahi mo fakalotolahiʻi e kau mēmipa kehe ʻo e kōlomú. Kimuʻa peá u fakatokangaʻí, kuo fuoloa e hoʻataá. Ko ia, naʻe ʻikai ke u mavahe mei he koló, ka ne u fakakaukau ke ʻalu ki hoku ʻōfisí ʻo toe vakaiʻi ʻa e fakamatala hopo ʻa e tokotaha ʻoku ou fakafofongaʻi fakalaó.
Ne u ʻohovale ʻi heʻeku aʻu atu ki hoku ʻōfisí, naʻe tuʻu mai ʻi tuʻa e tokotaha ʻoku ou fakafofongaʻi fakalaó mo ha tokotaha kehe. Naʻá ku fakamatala ange ki he tokotaha ʻoku ou fakafofongaʻi fakalaó naʻe ʻamanaki ke u toe vakaiʻi e fakamatala hopó pea ʻoange ha lipooti ki ai he ʻaho hono hokó. Naʻá ne pehē mai ko ʻene haʻú ke fakafeʻiloaki au ki ha tokotaha foʻou ke u fakafofongaʻi fakalao. Hili haʻaku talanoa mo hono kaungāmeʻá, ne ma felotoi ki ha totongi ke u tokoniʻi ia ke fakaleleiʻi ʻene meʻa fakalaó. Fakafokifā pē, kuo fakahoko mai ʻe he tokotaha ʻoku ou fakafofongaʻi fakalaó ke tomuʻa totongi mai ha paʻanga.
Kiate au, ko ha mana ia. Naʻe ʻafioʻi ʻe he Tamai Hēvaní naʻá ku feinga ke tauhi faivelenga kiate Ia. Naʻá Ne ʻafioʻi foki ʻeku ngaahi fiemaʻú. Kuó Ne tāpuekina au ʻi ha ngaahi founga lahi ʻi he ngaahi taʻu kuo hilí, ka ʻi he taimi ko ʻení naʻe hoko fakapaʻanga mai ʻEne tāpuakí. Naʻá Ne fakahoko ʻEne folofolá kiate kinautolu ʻoku tauhi kiate Iá: “Mou fuofua kumi ʻa e puleʻanga ʻo e ʻOtuá, mo ʻene māʻoniʻoní; pea ʻe fakalahi ʻaki ʻa e ngaahi meʻá ni kotoa pē kiate kimoutolu” (Mātiu 6:33).
Pea naʻe hā ʻemau kōlomu ʻo e kaumātuʻá? Naʻe tāpuakiʻi kimautolu ʻe he ʻEikí ʻi heʻemau ngaʻunu atu ʻaki ha laumālie uouangatahá. Naʻe ʻikai fuoloa kuo aʻu ʻemau faiako fakaʻapí ki he pēseti ʻe 100, pea tupu tokolahi ʻemau kau maʻu fakataha lakanga fakataulaʻeikí ʻo toko 35.
ʻOku ou fakamoʻoni te tau lava kotoa ʻo hoko ko ha ngaahi meʻangāue ʻi he ngāue ʻa e ʻEikí pea maʻu ʻa e fiefia mo e ngaahi tāpuaki ʻi he tauhi kiate Ia ʻaki ʻetau tokoni ki he niʻihi kehé.