Maʻá e Ngaahi Mātuʻá
Akoʻi fekauʻaki mo Hono Tauhi ʻo e Ngaahi Fuakavá mo Hono Langa Hake ʻo Saioné
faitā ʻa Alexandre Borges
Siʻi Ngaahi Mātuʻa,
ʻI he makasini ko ʻení, ʻoku mau fakatauange ʻoku mou fiefia ʻi he ngaahi fakamatala ki hono tauhi ʻo e ngaahi fuakavá, langa hake ʻo Saioné, ʻiloʻi e ngaahi founga ʻa Sētané, mo ha ngaahi meʻa lahi ange. ʻOku ʻi he peesi ko ʻení ha ngaahi fakakaukau ki hono fakaʻaongaʻi ʻo e makasini ko ʻení ke tokoni atu ki hoʻo akoʻi e ngaahi tefito ko ʻení ki ho fāmilí.
Fealēleaʻaki ʻi he Ongoongoleleí
Ngaahi Fuakavá mo e Tāpuakí
Ko e hā ʻa e ngaahi fuakava, pea ʻoku ʻuhinga ki he hā ke fai ha fuakavá? ʻI heʻene fakamatala ʻi he peesi 30, naʻe tali ʻe ʻEletā Lanitī D. Fangi ʻo e Kau Fitungofulú ʻa e ngaahi fehuʻi ko ʻení. Fakaʻaongaʻi ʻa e fakamatala ko ʻení ke tokoniʻi koe ke aleaʻi ʻa e ngaahi fehuʻi ko ʻení mo ho fāmilí: Ko e hā ha ngaahi fuakava kuó ke ʻosi fai, pea ko e fē ʻokú ke teuteu ke fakahokó? Te tau lava fēfē ʻo tauhi lelei ange ʻetau ngaahi fuakavá? Ko e hā ha ngaahi tāpuaki kuó ke maʻu ʻi hono fai e ngaahi fuakavá?
Langa Hake ʻo Saioné
Fehuʻi ki hoʻo fānaú pe ko e hā ʻenau fakakaukau ki he ʻuhinga ʻo e Saioné. Fakaʻaongaʻi leva ʻa e fakamatala ʻa ʻEletā Kēleti W. Kongo ko e “ʻOmai ʻa Saione” ʻi he peesi 6 ke tokoni ke nau ako lahi ange fekauʻaki mo e ʻuhinga ʻo e Saione ʻi he kuohilí mo e ʻaho ní fakatouʻosi. Fakakaukau ke mou aleaʻi ha ngaahi founga ʻe lava ke tokoni ai homou fāmilí ke langa hake ʻa Saione ʻi homou ʻapí pea ʻi homou koló.
Maluʻi meia Sētané
Feinga ke ʻiloʻi ha ngaahi meʻa mahuʻinga mo ha ngaahi kupuʻi lea mei he “Ko Hono ʻIloʻi e Ngaahi Founga ʻa Hotau Filí” ʻi he peesi 20 pea aleaʻi mo ho fāmilí ha ngaahi founga ʻe ʻahiʻahiʻi ai kinautolu ʻe Sētané. Aleaʻi ha ngaahi founga ʻe lava ke mou ngāue fakataha ai ke fefakamālohiaʻaki ʻi he ngaahi ʻahiʻahi ko ʻení.
Ngaahi Tokoni ki hono Ako ʻo e Haʻu, ʻo Muimui ʻIate Aú
Vakai ki he peesi 26 ki he ngaahi fakamatala ʻi he ngaahi tefito kehekehe ʻi he Haʻu, ʻo Muimui ʻIate Aú ke tokoniʻi hoʻo ako ʻo e Tokāteline mo e Ngaahi Fuakavá he māhina ní.
Fiefia Fakafāmili ʻi he Haʻu, ʻo Muimui ʻIate Aú
Ngaahi Tāpuaki mei he Temipalé
Tokāteline mo e Ngaahi Fuakava 109
Naʻe fakatapui ʻa e Temipale Kirtland ʻi he ʻaho 27 ʻo Māʻasi, 1836. Naʻe lahi ha ngaahi aʻusia fakalaumālie naʻe lekooti mei he meʻa ko ʻeni naʻe hokó.
-
Lau ha niʻihi ʻo e ngaahi fakamatala mei he konga “Ngaahi Leʻo ʻo e Fakafoki Mai ʻo e Ongoongoleleí” ʻi he fakaʻosinga ʻo e lēsoni ʻo e ʻaho 27 Sepitema–3 ʻOkatopa ʻi he tohi lēsoni Haʻu, ʻo Muimui ʻIate Aú.
-
ʻE lava ke tā ʻe he fānau iiki angé ha fakatātā ʻo e Temipale Kirtland.
-
Talanoa fekauʻaki mo e ongo naʻe mei maʻu ʻi he kau atu ki hono fakatapui ʻo e Temipale Kirtland. Ko e hā ha ngaahi fakaikiiki mei he ngaahi fakamatalá ʻoku hā makehe kiate koe?
-
Hivaʻi ʻa e “Ko e Laumālie ʻo e ʻOtuá” (Ngaahi Himí, fika 2), ʻa ia naʻe faʻu ki hono fakatapui ʻo e temipale ko ʻení.
Fealēleaʻakí: Ko e hā ʻoku mahuʻinga ai ʻa e ngaahi temipalé kiate koé? Vahevahe ha ngaahi aʻusia fakalaumālie kuó ke maʻu koeʻuhí ko e ngaahi temipalé.
Siakale ʻo e Loto-Houngaʻiá
Tokāteline mo e Ngaahi Fuakava 98:1
“Ko e moʻoni ʻoku ou pehē kiate kimoutolu ʻe hoku ngaahi kaumeʻa, ʻoua ʻe manavahē, tuku ke fiemālie ʻa homou lotó; ʻio, fiefia maʻu ai pē, pea ʻoatu ʻa e fakafetaʻi ʻi he ngaahi meʻa kotoa pē” (Tokāteline mo e Ngaahi Fuakava 98:1).
-
Tuʻu fuopotopoto ʻo pikinima mo e kau mēmipa ʻo e fāmilí ʻi ho tafaʻakí.
-
ʻOku kamata ha tokotaha ʻo lea ʻaki ha meʻa ʻokú ne houngaʻia ai, peá ne kukuʻi leva ʻa e nima ʻo e tokotaha ʻi he toʻomataʻú pe toʻohemá.
-
ʻOku vahevahe leva ʻe he tokotaha ko iá ha meʻa ʻoku houngaʻia ai pea kukuʻi ha nima, ʻa ia ʻokú ne fakaafeʻi ʻa e tokotaha ko iá ke ne vahevahe ha meʻa ʻoku houngaʻia ai.
-
Vakai pe ko e hā hono fuoloa pea kei hokohoko atu ʻa e siakale ʻo e loto-houngaʻiá.
Fealēleaʻakí: ʻOku anga fēfē ʻa e hangē ʻoku fakatupulaki ia (loto-houngaʻiá) ʻi heʻetau fakahaaʻi ʻa e loto-houngaʻiá? ʻOku fakafiemālieʻi fēfē kitautolu ʻe he loto-houngaʻiá? ʻOku founga fēfē ʻene “tuku ke fiemālie ʻa homou lotó”?