TE MAU ’API NŌ PĀTIFITA

Te ’una’una ’ei mono i te rehu auahi

Nā Yvette Barnes

I te ’ōmuara’a nō te matahiti 2019, ’ua ha’amata te tuahine Setaita Ata i tāna misiōni i roto i te misiōni nō Joao Pessoa i te pae apato’erau hitia’a o te rā nō Peretīria. Tau ’āva’e i muri mai, ’ua pēpē ’ino roa tōna turi ’āvae ’e ’ua ho’i i ’Auterāria nō te hō’ē rapa’aura’a roa.

Nō tōna hina’aro pāpū ’ia fa’aoti i tāna misiōni, ’ua fa’ati’ahia te tuahine Ata ’ia tāvini fa’ahou ā ’ei misiōnare hō’ē matahiti i muri mai, ’e ’ua tonohia ’oia i roto i te misiōni nō Melbourne ’Auterāria. I muri iho i te ’āva’e ’Ātopa 2020, ’ua ro’ohia ’oia i te tahi atu fifi i te pae nō te ea : e mau ’āhoa ha’aparuparu.

Ta’a ’ē noa atu tōna māuiui tino, ’ua fa’ahapa ato’a ’oia iāna iho nō te tāpe’ara’a i tōna mau hoa ’ia rave hope i tā rātou ’ohipa. Ma teie mana’o teimaha i roto i tōna feruriraa, ’ua tapitapi te tuahine Ata i te paraparaura’a i tōna peresideni misiōni, nō tōna ri’ari’a e fa’aru’e ’oi’oi i te ’āua misiōni.

E nehenehe ïa e feruri i tōna ’oa’oa i te ’itera’a e nehenehe tāna e tāmau noa i te tāvini i te Fatu—e nehenehe tōna mau fifi ea e ha’apa’ohia nō te fa’aoti i te toe’a o tāna misiōni. I te ha’apāpūra’a te peresideni Houghton ē e nehenehe ’oia e tonohia i te hō’ē misiōni piha ’ohipa, ’ua fāri’i ’oi’oi te tuahine Ata i te reira, hou ’oia ’a ’ite ai i te huru o te reira. I taua iho mahana ra, ’ua fārerei mai te mau ti’a fa’atere nō te misiōni piha ’ohipa i ’Auterāria, ’o Elder ’e te tuahine Nicholls, iāna nā roto i te rāve’a Zoom nō te uiui iāna ’e nō te ha’amāramarama i te fa’anahora’a.

’Ei misiōnare piha ’ohipa, e ho’i te tuahine Ata i tōna ’utuāfare nō te tāmau i tāna rapa’aura’a ma’i, terā rā e tītauhia iāna ’ia ha’apa’o tāmau noa i tāna tārena misiōnare nō te pure, te tuatāpapara’a pāpa’ira’a mo’a ’e te fa’a’eta’etara’a tino i te mau mahana ato’a. Nā roto i te pure e feruri Elder ’e te tuahine Nicholls i te pūai ta’a ’ē o te tuahine Ata nō te fa’ata’a i te rāve’a maita’i a’e nōna nō te tauturu i te ha’aputuputura’a ia ’Īserā’ela.

I tō rātou fārerei-fa’ahou-ra’a nō te fa’a’āfaro i te mau tītaura’a ’āpī nō tāna tāvinira’a misiōnare, ’ua fa’a’ite mai Nicholls mā ē ’ua ha’amaita’ihia te tuahine Ata i te tārēni nehenehe roa nō te hōho’a anoihi, ē e ’ā’au aumihi rahi tōna ’e e ’aravihi rahi tōna nō te marū. ’Ua fa’a’ite te tuahine Ata i tōna hina’aro ’ia tāvini i roto i te hiero, ’e i muri a’e i te tahi tāu’ara’a parau, ma te pure i te ’ā’au, ’ua tarai rātou i te hō’ē ’ohipa ’āpī nōna :

Fa’aterera’a mata’eina’a : E tāvini te tuahine Ata ’ei fa’atere nō te mau misiōnare piha ’ohipa ato’a i roto i tōna mata’eina’a.
Tāvinira’a ’ohipa anoihi : E hāmani ’oia i te mau hōho’a anoihi nō te fa’auru i te fa’aro’o ia Iesu Mesia ’e i tāna ’evanelia.
Tāvinira’a hiero : E rave ’oia i te ’ohipa i roto i te piha tōro’a i te hiero nō Melbourne (’Auterāria), e fa’aotihia te rahira’a hora nō te mau hepetoma ato’a.

Tāmata-mātāmua-hia i Marite ’e i Canada i te matahiti 2018, ’ua riro te mau misiōni piha ’ohipa ’ei rāve’a nō te feiā ’āpī e’ita e nehenehe e tāvini i te misiōni rave tāmau ’ia « tāvini i roto i te hō’ē vāhi tei fa’ata’ahia nō tōna mau tārēni, tōna ’aravihi, ’e tōna mau hōro’a ».¹ ’Ua tāmatahia te mau misiōni piha ’ohipa i ’Auterāria i te matahiti 2020, i te fa’aotira’a ’o Elder ’e te tuahine Nicholls i tā rāua ha’api’ipi’ira’a feiā fa’atere.

« Ua pararī te mau fāito hāmanira’a ! » Tē fa’ata’a nei Elder Nicholls ē : « E’ita te mau misiōnare piha ’ohipa e ora i pīha’i iho i te hō’ē hoa ; ’aita rātou e ora i roto i te hō’ē vāhi ma te ’ōti’a ta’a ’ē ; e ’ō’omo noa rātou i tā rātou tāreta i’oa ’ia rave ana’e rātou i tā rātou mau ’ohipa misiōnare ».

Mai te mau misiōnare piha ’ohipa tā rāua e arata’i nei, e mea ta’a ’ē mau ato’a te misiōni a Elder ’e te tuahine Nicholls. Tē ora nei rāua i tō rāua iho fare i Gold Cost i Queensland ’e tē ha’apa’o nei rāua i te mau misiōnare e ora ra e rave rahi tauatini kilomētera te tahi ’e te tahi. Tē mā’imi nei rāua i te mau rāve’a tāvinira’a—i roto i te ’Ēkālesia ’e te huira’atira—’e e feruri itoito rāua i ‘rāpae i te ’āfata’ nō te fa’atū’ati i te mau pūai ’e te mau tārēni o te misiōnare tāta’itahi e hina’aro ta’a ’ē tō rātou.

« ’Ua ’ite au ē e tārēni tō’u nō te ’ohipa anoihi », te parau ïa a te tuahine Ata, « ’aita rā vau i fa’a’ohipa i te reira e mea māoro i teie nei. ’Ua ’ite au i teienei ē tē hina’aro nei te Metua i te ao ra ’ia fa’a’ohipa vau i te ’ohipa anoihi nō te tāvini ia vetahi ’ē ».

’A feruri ai ’oia i te mau ’arora’a i te pae nō te ea tei fa’ataupupū i tāna misiōni i te ha’amatara’a, e’ita ïa te tuahine Ata e mā’iti i taua mau tāmatara’a ra nōna iho, ’ua ’ite rā ’oia ē tē fāri’i nei ’oia i teienei i ‘te ’unauna ’ei mono i te rehu auahi’.²

« ’Ua tauturu maoti tō’u tauira’ahia i roto i te hō’ē misiōni piha ’ohipa ’ia ’ite i te mea tā te Metua i te ao ra i hōro’a mai iā’u », ’ua parau ’oia. « Te hō’ē tuha’a rahi o tā’u misiōni piha ’ohipa ’o te ravera’a ïa i te hina’aro o te Fatu ’e te ui-noa-ra’a iāna. E fa’aho’i te reira i te hō’ē ha’api’ira’a i roto i te Mai, Pe’e mai : mai te mea ē e hina’aro tō ’outou nō te tāvini, e ui ïa i te Fatu ’e nāna e arata’i ia ’outou ’ia ’ite e aha tē rave ’e nāhea ’ia tāvini ».