TE MAU ’API NŌ PĀTIFITA
Tei te hoe fa’atere te Atua
Tae roa mai i teie taime, ’ua riro te orara’a ’o Fetauai Unasa Tautiaga Tuifalefa Tiatia ’ei hi’ora’a nō te manuiara’a.
’Ua ha’amata ’oia i tōna tōro’a ha’api’ira’a hau atu i te 27 matahiti i teienei, i muri a’e i te noa’ara’a tāna parau tū’ite i te fare ha’api’ira’a tuatoru nō te ha’api’ipi’ira’a ’orometua nō Hamoa, ’e i muri iho, ’ua noa’a te hō’ē parau ’aravihi tuatoru nō te ha’api’ira’a. I te ’ōmuara’a o te mau matahiti 2000, ’ua fāri’i Fetauai i te mau parau tū’ite fāito toru i te fare ha’api’ira’a tuatoru tuiro’o nō Malua Theological, i reira ato’a tē noa’ara’a iāna te ti’ara’a ’orometua fa’atōro’ahia i roto i te hō’ē o te mau fa’aro’o keresetiano tuiro’o roa a’e nō Samoa.
I taua tau ra, ’ua fārerei ’e ’ua fa’aipoipo ’oia i te tamāhine nehenehe ra ’o Lili Laufiso, ’e ’ua fānau rāua i te tamari’i – 3 tamāhine ’e hō’ē tamāroa. ’Ia tae i te taime nō rāua ’ia mā’iti i te hō’ē fare ha’api’ira’a tuarua nō rātou, ’ia au i te ’ite o Fetauai i te pae nō te ha’api’ira’a, ’ua hi’opo’a māite rāua i tā rāua mau mā’itira’a.
« ’Ua mā’iti māua ’ia ’āfa’i i tā māua mau tamāhine i te fare ha’api’ira’a tuatoru nō Vaiola », te parau ïa a Fetauai, e fare ha’api’ira’a tuarua i Savaii i Hamoa, tei fa’aterehia ’e tei fatuhia e te ’Ēkālesia a Iesu Mesia i te Feiā Mo’a i te mau Mahana Hopea nei. ’Ua riro ïa ’ei fa’aotira’a ta’a ’ē nō te hō’ē ’orometua nō te hō’ē fa’aro’o ’ē, terā rā ’ua fa’ahiahia ’oia i te mau fa’aturera’a mōrare teitei a Vaiola ’e te mau peu niuhia i ni’a i te ’ēkālesia.
’Aita ’o Fetauai i mana’o i taua taime ra ē, e riro teie fa’aotira’a i te fa’a’ama i te hō’ē auahi ’o tē taui i tōna orara’a.
’Aita i maoro ’ua ha’amata tāna mau tamāhine i te tuatāpapa i te parau nō te ’ēkālesia o tā rātou fare ha’api’ira’a tuarua. ’Ua haere rāua i te séminaire (ha’api’ira’a ’evanelia), ’e i roto i tā rāua mau purera’a pō ’utuāfare, e fa’a’ite rātou i te mea tā rātou i ha’api’i mai nō ni’a i te ’evanelia a Iesu Mesia i fa’aho’i-fa’ahou-hia mai.
’Ua rahi roa te au o Fetauai ’e tāna vahine i te mau misiōnare ’o tē hāhaere i tā rāua mau tamāhine i te fare. ’Ua ha’api’i nā tuahine Niutua ’e ’o Laulu ia rātou i te fa’anahonahora’a nō te fa’aorara’a a te Metua i te ao ra, ’e i te ’āva’e ’Ēperēra 2010, ’ua bāpetizohia te mau tamāhine a Fetauai. Tē ha’amana’o rā ’o Fetauai ē i roto i tā rāua mau pure fa’aotira’a tei ’ī i te roimata, ’ua fa’a’ite teie mau tuahine misiōnare maita’i i tō rāua hina’aro hōhonu ’ia tomo ato’a mai te toe’a o tōna ’utuāfare i roto i te ’Ēkālesia.
Tē ha’amana’o ato’a nei ’oia i te hō’ē ha’api’ira’a fa’ahiahia i te hō’ē purera’a pō ’utuāfare ’e te hō’ē nā misiōnare fa’aipoipohia nō Utaha mai. ’Ua ’āfa’i mai ’o Elder ’e te tuahine Krogh i te hō’ē ’āfata faraoa monamona hāmanihia i te fare, tei pū’ohuhia i roto i te hō’ē niuniu ’auri. I muri a’e i te ha’api’ira’a, ’ua rave te ta’ata tāta’itahi i te taime nō te tātara i te niuniu ’auri ē tae roa atu, i te pae hope’a, ’ua ti’a ia rātou ’ia ’īriti i te reira ’e ’ia ’oa’oa i te mau faraoa monamona i roto. I muri iho ’ua fa’a’ite pāpū ’o Elder Krogh ē : i te taime ana’e e ’īriti (tāmarū) tātou i tō tātou ’ā’au i te ’evanelia tātou e fāna’o ai i te au maita’i o tāna mau ha’amaita’ira’a.
’Ua fa’atupu marū noa teie mau ’ohipa patu fa’aro’o i te hō’ē semeio rahi i roto iho i te ’ā’au o Fetauai, ’e ’aita i maoro roa, ’aita i ti’a fa’ahou iāna ’ia pāto’i i tōna hina’aro ’ia tomo mai i roto i te ’Ēkālesia. « [Mai te huru ïa] i roto i te hō’ē tere roa ma te pape ’ore ’e… te mā’a i roto i te mēdēbara », tāna ïa parau.
’Aita i maoro roa ’ua pi’i ’o Fetauai i te ’episekōpo nō terā vāhi nō te fa’anaho i tōna bāpetizora’a, ’e ’aita i hepetomahia, ’ua riro teie ’orometua ha’api’i mātau maita’i, teie ’orometua fa’aro’o, ’ei melo nō te ’Ēkālesia a Iesu Mesia i te Feia Mo’a i te Mau Mahana Hopea nei.
E parau ’āpī hitimahuta rahi roa teie, nō te mau ta’ata iho ā rā i roto i te ’ēkālesia tāna i vaiiho i muri. « ’Ua paraparau te ta’ata nō ni’a i tō mātou fa’afāriura’a… ma te ti’aturi ’ore. [’O] te parau rahi ïa i ni’a i te purūmu, i te mātete ’e i roto i te mau pere’o’o utara’a ta’ata i taua mau taime ra ! » E ’ata Fetauai. Terā rā ’ua ’ino ato’a te fa’aho’ira’a. « E mau hoa tō mātou tei riro mai ’ei ’ēnemi… i roto i tō mātou ’oire iti, [’e] i roto i tō mātou mau fēti’i ».
E tau tauira’a fifi mau, terā rā i teienei tē parau nei Fetauai i taua mau ha’amana’ora’a māuiui ra ’ei mau « ’ohipa ’aramōinahia » nō te mea, tē nā ’ō ra ’oia, « i te marūra’a mai te mau vero pūai i mua ia mātou, ’ua ’ite a’era mātou i te māramarama o te Mesia, ’ana’ana a’e i te tahi noa atu māramarama e ’ana’ana mai nei i roto i tō mātou orara’a ».
’Ua bāpetizohia ’o Fetauai i te matahiti 2013 ra, e ’ua tā’atihia i tōna ’utuāfare nō teie tau ’e nō te tau a muri atu. I te matahiti 2016, ’ua riro ’oia ’ei ’episekōpo, ’e i te matahiti 2017 ’ua pi’ihia ’oia ’ia tāvini ’ei peresideni nō te titi nō Savaii Samoa Pu’apu’a.
’Ia feruri ’oia, hō’ē tātarara’a tā te peresideni Tiatia nō ni’a i tōna tere huehue ē tae atu i te ’evanelia mau a te Mesia. « I roto i te mau fifi ’o tā mātou i fa’aruru ’e te mau fa’aotira’a ’o tā mātou i rave, ’ua… hi’o fa’ahou mātou i te ha’amatara’a ’e i te hope’a : ‘Tei te hoe fa’atere noa te Atua nō te mau vairua ato’a.’ »