“Te Beku n Taian Wewete n te Ekaretia,” Riaona, Maati./Eberi 2022.
Boton te Euangkerio
Te Beku n Taian Wewete n te Ekaretia
Taan kairiiri n te Ekaretia a tuangiia membwa bwa a na beku inanon katabeakiia aika a kakaokoro n arana ae te “wewete.” Taian wewete a anganiia membwa te tai ni beku ibukiia tabeman ao ni kaan riki nakon te Atua.
Tamnei iroun David Bowen Newton
Ngkana ti beku inanon are ti weteaki nako iai, ti buoka katiaan ana mwakuri te Atua. Ti reireiniia tabeman aron Tamara are i Karawa ao Iesu Kristo ao ni buokiia bwa a na kaan riki Nakoia. Ti karekei naba kakabwaia ngkai ti beku ma te kakaonimaki.
Karekean taian Wewete
Koraki ake a beku inanon te Ekaretia a bon weteaki iroun te Atua. Taan kairiiri n te Ekaretia a tataro ibukin ana kairi te Tamnei bwa a na ataia bwa antai ae a na tuanga bwa e na beku inanon wewete aika kakaokoro. Te tia kairiiri e tuanga te membwa bwa a na beku ao e kabwarabwarai taian beku n te wewete anne. N angiin taian wewete, membwa a kamatoaaki n tain botakin te taromauri n te Ekaretia. Membwa n te uoote ke mwaanga a kaota aia boutoka n te kateibai. Aio e nanonaki bwa a kukurei ni buotokaa te aomata are e weteaki. Te membwa ngkanne e na anganaki te kakabwaia iroun te tia kairiiri n te nakoanibonga. Aio e aranaki bwa e a kaokoroaki. E na anganaki te membwa te kariaiakaki ni mwakuri inanon te wewete ao kakabwaia riki tabeua ni buoka teuanne ke neienne ngkai e beku.
Bitiobi
Te bitiobi bon te mataniwi n te uoote. (N te mwaanga, te beretitenti n te mwaanga bon titebo ma te bitiobi.) Te titeiki beretitenti e anga araia mwaane ake a tau n te nakoanibonga bwa a na weteaki bwa te bitiobi. Te Moan Beretitentii e anga te kariaia n te wewete. Te bitiobi ngkanne e katabuaki ao ni kaokoroaki bwa e na beku. E karekea naba taian kiing n te nakoanibonga, are nanona bwa iai te kariaia irouna ni kaira aron te mwakuri n te uoote. Ngkai te bitiobi, e beku ao ni kairiia ni kabane membwa n te uoote.
Beretitentii
Kooram n te nakoanibonga ao te Bootaki n Aine, Ataeinaine, Moanrinan, ao Reirei n Tabati a kairaki irouia beretitentii, ni bon arona te beretitenti ao uoman ana kauntira. Beretitentii n aia kooram unimwaane a weteaki ao ni kaokoroaki iroun te titeiki beretitentii. Te bitiobiriki e tuangiia membwa bwa a na beku inanon beretitentii nako inanon te uoote ao ni kaokoroia. Taan kairiiri ni kabane a beku ibukiia membwa inanon aia kooram ke bootaki. A buokiia membwa ni kainnanoia ao ni buokiia n namakina ana tangira te Atua.
Wewete ake Tabeua
Wewete tabeua n te Ekaretia n aron te anga reirei, ibuobuoki n te katangitang, tauani mwiin te rekooti, bairean waaki ni kakukurei ibukiia kairake ke ataei, ao ni beku n aanga tabeua. Wewete nako n te Ekaretia a kakawaki ao e anganiia membwa te tai ni beku ibukiia tabeman ao ibukin te Atua. Ngkai ti uaia ni beku ni kakoroa nanon ara wewete, ti kakorakoraia tabeman ao ni buoka rikiraken te Ekaretia.