“E Riai bwa N na Nako?,” Riaona, Maati./Eberi 2022.
Bwanaaia Aika Itiaki ni Boong aika Kaitira: Aine n te Onimaki
E Riai bwa N na Nako?
Imwiin are I obwanako n tain ana waaki ni kakukurei te Bootaki n Aine, iai te rinerine ae N na karaoia.
Kaotaki man katotongan te tamnei (model)
Tabeua te tai imwiin ae I kaaina te Ekaretia, te tia kairiiri n te Bootaki n Aine e waningare iaon te bwai ae kamanga. N te tai ae waekoa e a moanna ni waningareai i mataia te koraki. I namakina ae I aki mwengaraoi iai ao I karikai bwa n na obwanako iai.
Au moan iango bwa N a aki manga okira te uoote. I kauka au bwaibwara, ni kataia ni kakaea karauan nanou. Ngke I wareware, I roko n te kibu are e titiraki Iesu nakoia naake aki kukurei n Ana reirei, “Ao ngkami kam kan nako naba?” (Ioane 6:67).
N te tai ae waekoa, I kaeka n au iango, “I aki, N na bon aki nako!”
I tareboniia te beretitenti n te Bootaki n Aine, ao e tuangai bwa N na tareboniia te titita are e a tia n taetae ni kamanga iaou. I tareboniia ao I kaota te bwai are I namakinna. Ti motikia bwa kaotan te nano ni kukukurei e raoiroi ma ti riai n aki taekina te kamanga iaoia tabeman ae ti aki rangi ni kinaiia imataia tabeman. Ti maroroakina naba ae ti na rangi n taraa aron aia namakin membwa ake a boou n te uoote.
I reitinako n iriira te uoote anne inanon tiku n te kawa anne. E mwaiti au taneiai aika a tamaroa imwiin rairakiu nakon te euangkerio.
Inanon mwanangau n tokanikai iaon baika I obwanako iai, I kunei taeka aika a ibuobuoki aikai mai irouia ara taan kairiiri n te Ekaretia:
“Ngkana temanna e taekina ke e karaoa te bwai are ti taku bwa e kamarakiira, te moan bwai ae ti riai ni karaoia ti na bon aki karikia bwa e na kauna nanora ao imwiina reitaki n ti ngkami, n te nano ae raoiroi, ao ni bon nakon te aomata anne.” 1
“I berita nakoimi, bwa ngkai ko rineia n aki taraa ae ko kamarakaki … , ko na namakina ana tangira te [Tia Kamaiu] ao ana kariaia.” 2
I kakaitau bwa I rineia bwa N na aki kitana te Ekaretia ti iaon te taeka ae e kamaraki. Ao I kakaitau bwa te membwa ngai n te Ekaretia ae kaokaki, are I karekea iai te korakora n rangi ni kakaonimaki ao n reitinako iaon te kawai n riki bwa te tia iriira Iesu. I kakaitau n taian reirei irouia burabeti ao abotoro, ake a reireiniira bwa e kanga arora n reitaki ma tarira ao mwanera inanon te euangkerio.
I kona n reitinako ni kakaonimaki ao n rineia bwa N na aki karika ae n na un. I kona ni kabanea au kekeiaki bwa N a riki n aron Kristo ao n namakina ana tangira te Tia Kamaiu ao ana kariaia.
I riai bwa N na nako? I aki. Iai au koaua bwa aio Ana Ekaretia Iesu Kristo ae kaokaki n te aonaaba ni boong aikai ao iai inanona “taekan te maiu ae akea tokina” (Ioane 6:68).