“Ti a Kawara te Tembora,” Riaona, Maati./Eberi 2022.
Bwanaaia Aika Itiaki ni Boong aika Kaitira: Aine n te Onimaki
Ti a Kawara te Tembora
Ngke I tataro bwa N a kangaa ni buoka tinan buu, I uringa te tembora.
Tamnein te Bogotá Colombia Tembora iroun Ivan Ortiz Ponce
N tain te buti n aoraki ae te COVID-19, e kainaki te Bogotá Colombia Tembora. Ibukina bwa I aki konaa n nako iai, n taai tabetai I katamneia n au iango ae I nakonako inanon te tembora, n uringa te mwakuri are I karaoi ikekei ngkai te tia mwakuri n te tembora ngai.
E rikirake ni korakora aorakin ai tinau imwiin te kaokoroaki n te COVID-19 i Colombia. Ngke I tataro bwa N na kangaa ni buokia, I uringa te tembora.
Ngke I iangoa te tembora, I namakina ana kairi te Tamnei ae Raoiroi n tuanga ai tinau ngkana e tangiria ni iangoia bwa aongkoa E kawara “te tabo teuana ae moan te tikiraoi n te aonaaba” ma ngai.
N te bwanaa ae maaraara, e kaeka, “Eng.”
Ti iangoia bwa aongkoa ti moanna man mweengana i Medellin, ni mwananga nakon mweengau i Bogotá, ao ngkanne ti roko n te tembora. Ti iangoia bwa aongkoa ti rinnako ao ni karaoi mwakuri inanon te tembora. Ti iangoia bwa aongkoa ti uaia n tekateka n te ru ae te tiretio, n tataro ni karabwarabwa nakon te Uea.
Imwiina, ti butia Tamara are i Karawa bwa ngkana bon nanona, e na kamarurungaki ai tinau, ao ni kona ni bon oki raoi nakon te tembora. Bon te tai ae onoti, n taneiai ae tabu are e kakorakoraa ao n anganna te unganano.
Teuana te karaki iaon te Tia Kamaiu ae e rangi n rotai e riki n te kawa are Kaberenaum. N te karaki aei e reireiniira bwa te Uea e kona ni kakabwaiaia ao ni kamarurungiia aomata rinanon aia ibuobuoki kaain te utu ke raoraora.
Ngke kaain Kaberenaum a ataia ae Iesu e mena n teuana te auti, a uota nakoina te mwaane ae reke te aoraki irouna ae te nakibaina.
“Ao ngke a aki kona ni kaania ba e bati te aomata, ao a ieta akun te auti ike E mena i aana Iesu: ao ngke a tia n urua, ao a nna te ne ni wene are e wene iai te nakibaina arei.”
Ao ngke e nori aia onimaki Iesu, E taku nakon te mwaane, “Tei rake, tabeka nem ni wene ao nakonako.” (Taraa Mareko 2:1–11.)
N aron te mwaane are e nakibaina, ai tinau e kamarurungaki man mwaakan te Tia Kamaiu rinanon te kakabwaia n te nakoanibonga ao rinanon ana onimaki ao aia onimaki ana utu ao raoraona.
Inanon taai aika ti aki atai kanoaia, I ataia bwa ti kona ni karekei kairara ni kakorakoraia ao n anga te unganano nakoia ake a kainnanoia. Ngkana ti rairaki nakon Tamara are i Karawa ao n ururinga Ngaia ma Natina, ti kona ni karekea te rau, te kantaninga, ao te kamarurungaki.