“Ko Ukoukora Kristo ni Katoa Bong?,” Riaona, Maati./Eberi 2022.
Kairake n Ikawai
Ko Ukoukora Kristo ni Katoa Bong?
Au taneiai inanon te tembora e buokai n ataia ae I kainnanoia bwa N na ukoukora Kristo ni katoa bong.
E maeka te tia korokaraki i Guatemala.
Ngke I uarereke, I aki toki n titirakinai te titiraki “E kona n taetae te Tamnei ae Raoiroi?” “Ngkana I nako karawa, N na nora te Atua?”
Ngkai I a ikawa, I kona n ururungi boong ake mai imwaina ao n noria ae Tamara are i Karawa e aki toki ni kakairai ao ni kaota nakoiu koauan ae bon iai Ngaia, ma I waeremwe n tainako ni kinaa Baina ni mwakuri inanon maiu. I rang kakabwaiaki ni karikirakeaki n te mweenga ae iai inanona Ana euangkerio Iesu Kristo ae kaokaki, ma I tiku ni katan iaan aia koaua tabeman n te tai ae maan. E bon kangaanga irou kakoauaan ae bon iai te Atua.
N te bong teuana, ngke tao 15 au ririki, au bitiobi e katanoata te mwananga nakon te tembora. I bon rang taneiai n te nanako n te tembora ma au utu, ngaia are I iangoia bwa aio tiaki te bwai ae e rangi ni bubura. Kanga bon akea te bwai ae I a tia n namakina ao I aki mataata ni kakawakin berita ao otenanti ake a karaoaki n te tembora.
Ngke e a roko te tai anne, I rin n te tembora ao n oneai nakon au kunnikai ae mainaina. Ngke I mwananga irarikin te kiraati, I nora tamneiu n au kunnikai ae mainanina ao ma te moangare iaon ubu. Ngke I tataningaa rokoia kaain au uoote, e roko irou te miimi. I tabe ni miakina tamaroan te tabo ni bwabetiito ao taian korobanna ngke n te tai ae karina, I namakina te Tamnei ni karaurau n riinga nanou.
N na bon aki kona ni mwaninga te taeka are e roko nakon au iango: “Orson, aio bon ana auti te Uea. E Tangiriko. E tangiriko bwa ko na bita maium ao ni kekeiaki n riki bwa te aomata ae tamaroa teutana imwiin teutana.”
I namakina te tangira inanon taeka akanne ma e waekoa n taonai namakinan te kairua. I aki rangi n tataua ma nanou iaon te tembora ni karokoa te tai aei. Ngaia are I tataro inanou, ni butiia Tamara are i Karawa bwa E na kabwara au bure.
Ao I ataia ae E ongo au tataro ibukina bwa I namakina te rau ae korakora inanou.
N te bong anne, I kamatoaa riki au onimaki ao ni karekea au kakoaua ibukin te euangkerio are I a kaman kakantaningaia. N te bong anne, I a kona n taekinna ni kamatoa n aroia ana reirei Ioane ake uoman: “E a reke iroura te Meetia” (taraa Ioane 1:41).
Te Kawai ae Bebete n Reitaki
Imwiin te taneiai aei, I a kekeiaki n tainako ni kona ni kinaa raoi ana kairoro Tamara are i Karawa inanon maiu man ukoukoran Iesu Kristo ni katoa bong. E ngae ngke e kona te aonaaba ni karikia bwa e na kangaanga te ongo iroun te Tia Kamaiu n tabetai, I a ataia ngkai bwa bon iai Ngaia ao e bon memena irarikiu.
A mwaiti mai ibuakora ni boong tabeua ae ti namakina ae e rangi ni kaan nakoira karawa nakon taai ake mai imwaina. Iai naba boong aika a kangaanga ngke ti korakai n namakina Ana kairoro e ngae ngke ti rang kabanea ara konaa ke boong tabeua ti a rang n tabetabe ao ai akea te tai ae ti ukoria iai. Ma I ataia bwa ngkana iai nanora n ukora Kristo, ti na nora Baina ni mwakuri inanon maiura.
Ngkana ko a namakina ae ko a raroanako ma te Tia Kamaiu, titirakiniko i bon iroum, I kekeiaki ngkai n ukora te Meetia ni katoa bong?
Ngkai ti ukoria n riki n aroia Abotoro ake rimoa, ni katukui ara karaun (taraa Mataio 4:20) ao katabeara ake tabeua ao baike ti tangiri n te tai ae e uarereke n rairaki Nakoina, ti na bon Kunea.
Iai taabo ae e nako mai iai te korakora n te maiu n tamnei are a kona ni buokiira. “Bwa a riki bwaai aika a korakora man bwaai aika uarereke man aki kaangaanga” (Aramwa 37:6). Mwakuri n onimaki aika a uarereke ao waaki ake ti karaoi ni maiu tamneira ni katoa bong a kona ni buokiira ni karikirakea ara konabwai ni kinaa te Uea inanon maiura.
Tabeua bwaai ni mwakuri n te maiu n tamnei aikai a kona n ae bwaai n aron:
-
Te tataro n te Onimaki
-
Kamatebwaian booki aika tabu ma nanom ni koaua ao n nanonna raoi
-
Te beku ibukiia tabeman n aki tabe ma kainnanom
-
Tibwaua am koaua ma raraom
-
Kakauongo nakon anene n taromauri ke katangitang aika a kaoa te tamnei
-
Iriran te Intitute
-
Kawakina te bong ae te Tabati n tabuia
-
Aki mamatam
-
Kakawaran te tembora ni katoa tai
A mwaiti bwaai aika a kona ni buokiira ni kunea Iesu Kristo, ma bon oina raoi te reitinako n Ukoria. E reirei Beretitenti Russell M. Nelson: ”Ngkai ti ukoukoria n riki bwa ana reirei Iesu Kristo, ara kekeiaki ni kan ongo Irouna e riai raoi n nako mai nanora. E anaa te tatauraoi ao te kekeiaki n tainako ni kanoa maeura ni katoa bong ma Ana taeka, Ana reirei, ao Ana koaua.” 1
Ko a Tia Ni Kunea Kristo n te Bong Aei?
E ngae ngke ko aki karekei kaeka ni kabane nakon titiraki ake ko kakaei n te tai aei, reitinako! E bebete bwa ti ukoran Kristo ao rineia bwa a na iai am onimaki Irouna. Ngkana ko kataia n ukora Kristo ni katoa bong rinanon te mwakuri ae uarereke, I ataia bwa ko na kona n namakina Ana mwamwannano mai karawa. I ataia bwa e koaua aei ibukina bwa I a tia n namakinna.
Tamara are i Karawa e atai ara kekeiaki. E aki tabe bwa mwaitira korakoran baike ti karaoi n reiakina tamneira ti ngkana ti kona ni kangai ni katoa bong ma te teimatoa ao te koaua: “N te bong aei I a tia ni kunea te Meetia!”
Bon au tataro bwa ti na kona n ataa ao n tangira ara Tia Kamaiu ni katoa bong. Bwa ti na karaoa are e taekinna Moronaai n “ukoukora Iesu” (Ita 12:41). Ngkoe ao Ngai ti na kunea, n tokin boong nako, temanna are a koreia Mote ao burabeti ake tabeman: Iesu te I‑Natareta. N ukoukora Kristo, ti na nora bain te Atua inanon maiura. Ao mwaitin ukoukoran Kristo ni katoa bong, mwaitin ae ti na kunea Kristo ao ni kona ni kinaa Banaana, ni uotiira ao ni kairiira ngaira ni kabane inanon maiura.