Lokol Pej
Elda Nattress i Toktok long Ova Wan Taosen Yut long Ameriken Samoa
Ova long wan taosen yang pipol i fulumap Pago Pago Sentrol Stek Senta long saes long Sandei naet, 7 Novemba, blong lisin long lida blong Jos we i kam visitim olgeta, Elda K. Brett Nattress.
Elda Nattress i Fas Kaonsela long Pasifik Eria Presidensi blong Jos Ia blong Jisas Kraes blong Ol Lata-dei Sent.
Elda Faapito Auapa’au, Eria Seventi tu i toktok long yut divosen ia.
Ol yang pipol i kam long ol kongregesen truaot long ol aelan long ol faef stek long Ameriken Samoa.
Elda Nattress i talem, “Presiden Nelson i provaedem sam kaonsel blong profet i go long wol long ol taem ia we ol samting i stap muvmuv. Yumi nidim blong gat fet long Jisas Kraes. Mo, yumi mas tingbaot aedentiti blong yumi olsem ol pikinini boe mo gel blong God, mo long tabu wok blong yumi.”
Hem i gohed i talem: “Ol yut long divosen ia i provaedem ol tingting we i kam wetem insperesen. Olgeta oli ol fiuja blong Jos. Hem i wan bigfala blesing blong kaonsel wetem mo lan long olgeta. Fet blong olgeta long Jisas Kraes i strong mo fiuja blong olgeta i braet.”
Wan long ol lida we i stap long taem ia i talem, “Oli kipim ol yang pipol ia ova long wan haf aoa, oli tijim olgeta gospel prinsipol tru long ol tijing blong Jos Presiden Russell M. Nelson mo ol memba blong Kworom blong Olgeta Twelef Aposol.”
Wan yang man long Malaeimi Wod i talem se “rod blong gobak long Kingdom blong God hem i tru long Tabu Tempol.”
Wan yang woman long Pago Pago Wes Stek i talem se, “Blong prea oltaem mo filim spirit blong Lod, mi save kam blong save se Jisas i oltaem stap ia wetem mi.”
Hem i wan gudfala program blong wok tugeta, taem we Elda Nattress i wokbaot i kam insaed long hol blong harem ol ansa blong ol yut taem hem i askem ol kwestin long olgeta abaot hao oli putum Sevya long senta blong laef blong olgeta.