TE MAU ’API NŌ PĀTIFITA
Te fa’aro’o o te hō’ē metua vāhine
’O Tatiafogaega Tausagafou Brown-Fuimaono te i’oa o tō’u māmā.
I tōna ’āpīra’a, ’ua ora na Tatia i roto i te hō’ē faleo’o (fare) na’ina’i ’e tōna ’utuāfare i Matautu Lefaga (Hāmoa). Tōna metua tāne, ’o Palauni Brown, e melo ïa nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’aita rā ’oia i te mea itoito roa i roto i te ’Ēkālesia, e mea maoro. Tē ha’amana’o nei Tatia ē, e fa’aitoito noa tōna metua tāne i tāna vahine ’e i tāna e pae tamari’i (i te reira tau) ’ia haere i tāna purera’a, noa atu ’aita ’oia e nā reira.
E melo itoito te metua vahine o Tatia nō te ’Ēkālesia ’āmuira’a keretetiano nō Hāmoa (EFKS). ’Ia haere ana’e mai te mau misiōnare nō te ’ēkālesia a tāna tāne i tō rātou fare, ’aita roa ’oia e hina’aro e paraparau maita’i ia rātou, ’ua fāri’i rā ’oia i tā rātou tītaura’a e tai’o i te Buka a Moromona. ’Ua fa’atupu teie buka i te ānoenoe i roto iāna, ’e ’aita i maoro—noa atu ē, e pāto’i noa ’oia ’ia fāri’i i te mau ha’api’ira’a a te mau misiōnare—’ua tai’o te metua vahine o Tatia i te Buka a Moromona i te mau mahana ato’a.
I te hō’ē mahana, ’ua ani tōna metua vahine ia Tātia e ’ohi mai i te mau ’ōfa’i pārahurahu rahi nō te tāpe’a i tō rātou pāruru naonao. ’Ua fa’aro’o ’o Tatia i tei parauhia mai e ’ua haere atu ra nā te muara’a o te fare, hou rā ’oia ’a ’ohi ai i te hō’ē ’ōfa’i, topa ihora ’oia i raro, ’aita i ta’a nō te aha ra.
Horo mai nei tōna māmā i pīha’i iho iāna ’e tuō ihora. ’Ua to’eto’e a’ena Tatia ’e ’ua mohe’a ’e ’aita e huti fa’ahou ra i te aho. Te mana’o mātāmua tei tae mai i te ferurira’a o tōna māmā, ’o te pi’ira’a ïa i te mau elder : te mau misiōnare nō te ’ēkālesia a tāna tāne.
I te taera’a mai te mau elder, e rave rahi ïa minuti te maoro tō Tatia ’orera’a i ara mai. ’Ua hōro’a ’oi’oi te mau misiōnare iāna i te hō’ē ha’amaita’ira’a nō te fa’aorara’a, i reira ’oia i te ha’amatara’a i te ara mai, tē ha’amana’o ra Tatia i te fa’aro’ora’a i te reo o te hō’ē elder i te nā-’ō-ra’a : « Māmā, ’eiaha e ha’ape’ape’a. E maita’i mai ’oia. E ’ohipa tā te Metua i te ao ra nōna. E ha’amaita’i-ato’a-hia ’oe ’e tā ’oe mau tamari’i nō tō ’oe fa’aro’o ».
Mai te reira mahana, ’ua fa’a’ite pāpū te metua vahine o Tatia ē, ’ua ha’apāpū mai teie ’ohipa i tupu—te fa’aorara’a māere o tāna tamari’i—i te parau mau nō te buka a Moromona, nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’e, ’oia ho’i, nō te autahu’ara’a a te Atua. ’Ua bāpetizohia ’oia i te matahiti 1959, ’e i te roara’a o tōna orara’a ’ua ha’a i roto i te ’ohipa a Fatu, i roto iho ā ra i te ha’aputuputura’a ia ’Īserā’ela i nā pae e piti o te pāruru.
Hou ’oia ’a fa’aru’e mai ai i te matahiti 2019,—i te 90ra’a o tōna matahiti—’ua ha’amaita’ihia te metua vahine o Tatia ’ia ’ite i te tupura’a mau o te parau tohu a te elder. ’Oia mau e iva tamari’i tāna ’e ’ua riro mai rātou pā’āto’a ’ei melo pūai ’e te itoito i roto i te ’Ēkālesia, e ono i roto ia rātou tei tāvini i tā rātou iho misiōni. Nā rātou i teienei, i te ’atu’atura’a i tā rātou iho mau tamari’i i roto i te ’evanelia a Iesu Mesia, ’e e nehenehe te tahi atu u’i feiā mo’a i te mau mahana hope’a nei e ha’amāuruuru i te hō’ē māmā rū’au ha’apa’o maita’i i te tāmatara’a i te Buka a Moromona.
’Ei tamāhine nā Tatia i roto i teie ’ā’amu, tei roto ïa vau i taua u’i ra. ’O Foketi tō’u i’oa ’e ’ua pa’ari au i pīha’i iho i tō’u māmā rū’au ’o Foketi Masani Le Mamea-Brown, ’e ’aita i hōro’a noa mai iā’u i tōna i’oa, i tōna ato’a rā orara’a here ’e te ha’api’ira’a. Tō’u māmā rū’au—’o ‘Ma’—’ua tāvini ’oia ma te itoito i te fare mai tāna i nā reira i roto e rave rahi pi’ira’a a te ’Ēkālesia, ’e ’ua riro vau ’ei ’ite nō tōna fa’aro’o hau ’e te ’āueue ’ore i te rohira’a i te mau mahana ato’a. ’Ua ha’api’i ’oia iā’u i te aumihi, te tusia, te ravera’a i te ’ohipa, te tāvinira’a ’ā’au hōro’a, ’e te mau temeio ’o tā te haere-tāmau-ra’a i te hiero e fa’atupu.
Nā roto ia Ma, ’ua ha’api’i mai au i te auraro, ’ia riro ’ei ta’ata ’aufau tuha’a ’ahuru ti’a, ’ia ineine nō te mau mea ato’a, ’ia pure tāmau noa, ’e ’ia here ma te ’ōti’a ’ore. Maita’i ē e ora noa vau ’ei ’itera’a pāpū nō te faufa’a ’āi’a nō te fa’aro’o o tō’u māmā rū’au here.